1 Ra bung tagura ra matarahien rawarawa bia no Bung na Sinangeh gata pataam, Maria mana Magadalen, Salomi, ma ne Maria no puasi Jemes dal ga kul lah aring waiwai ing i la sangsangina timaan bia dal na sapur no tamai ne Iesu. 2 Ra Sade ra malaan, bia no kasakesa gata sigara pupuruk taar mon, dal ga haan laah ukaia tano midi. 3 Bia dal ga hanan haan dal ga hartiritiri ta dal bia, “Siga um na pulek sei no haat tano matana no midi?” 4 Iasen, bia dal ga nanaas hut, dal ga nas bia di gata pulek sasei no haat, ma a tamat sakit ia. 5 Io, dal ga haan laka tano midi dal gaam nas lah tiga marawana ma ga kis taar. Ga kis taar tano palpal na sot na lima dal, ma ira nuna taltalona maal ga manga palpalaan. Bia dal ga nas hua, dal ga manga karup na bunurut.

6 No marawana ga tangai ta dal bia, “Waak mutal karup na bunurut. Iau nunurei bia mutal silsilhei Iesu ma Nasaret nong di ga tut tar ia tano kabai. Iapanim kai. I ta lon balin. Mutal nas, no sibaan nong di ga hakuban ia tana iakan. 7 Mutal na haan ma mutal na hasasei ira nuna bulu na hausur, ma ne Pita mah, bia ‘Iesu na luai ta muat uras Galili ma muat na ra nas um ia kaia hoing at gata hasasei tar muat hua.’ ”

8 Io, no bunurut ma ra dedar ga pulus kaikek ra aitul a hahina, dal gaam hilau laah makaia tano midi. Ma pa dal ga hasasei tikai kanong dal ga burut.* Ira buturkus 9-20 pai kis ta ira haleng na tuarena pakpakat ing i bilai sakit.

9 [Bia Iesu ga lon huat balin ra Sade, ga luena puasa muka tane Maria mana Magadalen nong gata tulei hasur sei tar a len ma irua na sakana tanua makaia tana. 10 No hahina ga haan gaam a hasasei diet ing diet git saksakatei Iesu ma kana diet ga susuah ma ra tamat na tapunuk. 11 Ing diet ga hadadei bia Iesu gata lon balin, ma bia no hahina at gata nas tar ia, pa diet ga nurnur.

12 Namur bia airua ta diet ga murmur hani no ngaas i hansur maram Ierusalem, Iesu ga puasa tar ta dir ma ga kikiles no matmataan tana. 13 Dir ga haan tapukus dir gaam a hasasei aring ta diet, senbia pa diet ga nurnur mah ta dir.

14 Namur balin um Iesu ga puasa ta ira nuna sangahul ma tikai na bulu na hausur ma kana dal ga ianiaan. Ga bor diet kanong diet ga manga hadadas ira bala diet ma pa diet ga nurnur bia gata lon balin, hoing aring diet gata nas tar ia diet ga hinawas hua. 15 Io, ga tangai ta diet, “Muat na haan ma muat na hasasei ira tunatuna tano ula hanua bakut tano tahut na hinhinawas. 16 Bia siga tikai na nurnur ma na kap bapitaiso, Kalou na halon ia. Ma sen, bia siga tikai pai nurnur, Kalou na hapidinau ia. 17 Diet ing diet nurnur tagu diet na haminis ken ra mangana hakilang. Diet na saring iau ma ena tar ra dadas ta diet bia diet na tulei hasur sei ira sakana tanua, diet na ianga ma ra mes na nianga ing pa diet ga hausur tanai, 18 diet na palim haut ra sui mah ma ira lima diet, ma bia diet na mamai ta linga na hartuam pa na hagawai tutun at diet. Diet na bul ira lima diet ta ira minasetuana, ma diet na langalanga balin.”

19 Namur, bia no Watong Iesu gata ianga taar ta diet, Kalou ga kap haut ia uram ra mawai gaam kis tano tamat na kinkinis tano sot na lima Kalou. 20 Io, ira bulu na hausur diet ga haan harbasiai, diet gaam warawai utano tahut na hinhinawas ta ira sibaan bakut. Ma no Watong ga papalim tikai ma diet ma ga tar ira hakilang wara hatutun ira nudiet nianga.]