Ninge.
6.
A nianga tupas no tunotuno nong i kure ira ut na ninge: ing da inge iakan ra ninge da ting ira gita ing a mon liman ma itul a sitiring. Devit ga pit ie. Watong, waak u boor iau ma no num ngalngaluan, ma bia nu hapidanau iau ma no num nginangar. 
Nu marse iau, Watong, kanong iau pai dadas haruat. Watong, halangalanga iau, kanong ira surugu i manga makmakis. 
No nugu nilon i mon tamat na ngunngutaan. Na haruat um hunanges, Watong, na haruat um hunanges? 
Talingaan, Watong, ma nu hasangeh iau. Halon iau murmur no num harmarsai nong pa na pataam. 
Taie tikai pa na lik leh ugu ing bia i te maat. Sige tiga nong i la pirpirlat ugu mekaia tano midi? 
Iau te tamaubal um tano sunuah. Tano kidilona bung ra bung iau suah tano suhugu. Ma iau hasulutne no kubegu ma ra polo na matagu. 
I te hansik um ira matagu ing iau suah ma ra tapanuk. Ma dir pai dadas um, i burena ta ira agu suk. 
Muat haan talur iau, muat bakut ing muat gil magingin sakena, kanong no Watong i te taram ira nugu sunuah. 
No Watong i te taram no nugu tintaau wara gaiena harmarsai. No Watong i te haut leh no nugu sinasaring. 
Ira nugu ebar bakut, diet na hirhir ma diet na manga tapunuk. Diet na tahurus tapukus gasien ma ra hirhir.