Ninge.
12.
A nianga tupas no tunotuno nong i kure ira ut na ninge: ing da inge iakan ra ninge da ting ira gita ing a mon liman ma itul a sitiring. Devit ga pit ie. Harahut, Watong, kanong taie um tikai ta diet ing diet tar tutun ira udiet nilon taam. Diet ing diet mur timaan God, diet te panim laah um. 
Diet bakut diet la habato ira udiet harwis. Ira palabulu diet la harhau ma ra harabota. 
Na bilai bia no Watong na hapataam ise ira harhau ta ira palabulu diet ma ira karame diet bakut ing diet la butbut me 
ing diet la tangtange bia, “Mehet na petlaar ma ira karame mehet. Mehet at, mehet kure ira palabulu mehet. Taie tikai i tale bia na tikal mehet.” 
No Watong i tange hoken, “I taar burena ta ira magingin na haragahai taar ta ing taie ta harharahut ta diet ma ira sunuah na marmaris ta ira maris, iau ni taman tut um kaiken. Iau ni balaure bat diet sukun sige diet ing diet tange hagahe diet.” 
Ma ira nianga tano Watong i bilai harsakit hoing ira siliwa ing di tun sare leh narako tano tamat na mamahien tano ula iaah wara kapkap se ira bilinge ra liman ma iruo na pakaan. 
Watong, het nunure bia nu nes mur taar at het ma nu balaure het hatikai sukun kaiken ra mangana tunotuno. 
Ira ut na sakena diet haan hurbit bia um, huo mah asa ing i tar hirhir, di hatamat taar ra matmataan ta ira tunotuno.