Ninge.
110.
Devit ga pit iakan ra ninge na lotu. No Watong ga tange ta nagu Watong: “Nu kap no tamat na kinkinis kai tano kata na limagu, tuk iau ni bul hasur ira num hiruo napu, hoing tiga linge na bul kakim!” 
No Watong na hakari no num dadas na harkurai meram Saion. Nu kis na harkurai nalamin ta diet ira num ebar. 
Ira num matanaiabar diet na kanan wara harharahut ugu tano num bung na hinarubu. Ira num sigasigam i halhaal, ma no num dadas na hanuat nunuhuan ta ira kaba bungbung hoing no ruur i puko ra malaan. 
No Watong i te hasasalim, ma pa na kios no uno lilik, gaam tange hoken: “No num pinapalim na lamus tunotuno tupas iau na tur hatikai, haruat tano pinapalim na lamus tunotuno tupas iau ing Melkisedek ga gilgil.” 
No Watong ie kaike i tur tika ma ugu wara hadadas ugu. Na paas gisiane ira king tano bunguno no uno ngalngaluan. 
Na hapidanau ira hunhuntunaan ta ira mes na hanuo, na bul hung ira minaat, ma na paas gisiane ira ut na harkurai tano ula hanuo bakut. 
Na mom tano taah i saal tano gagena ngaas. Io kaik, na kap dadas wara petlaar no hinarubu.