Ninge. 119. A haraidaan na kis ta diet ing taie ta da saksakena ta ira udiet tintalen, diet at ing diet la hanahaan haruat ma ira harkurai tano Watong. A haraidaan na kis ta diet ing diet pakile haruatne ira uno harpir, diet at ing diet sisilih tano Watong ma no udiet kidilona lon. Diet pai gil ta nironga. Diet lon mur ira tintalen tano Watong. U te bul hadadas ira num nianga na harakatom bia da mur timaan bakut. Iau manga sip bia i tale bia ni tur dit wara murmur timaan ira num dadas na harkurai. Io huo, iau pa ni hirhir ing iau liklik timaan ta ira num hartula. Meram narako tunat tagu iau ni pirlat ugu ing iau harausur ta ira takodasiana ula harkurai. Iau ni mur ira num dadas na harkurai. Waak ugu ra turtur talur hasakitne iau. Tiga marawaan na tale bia na balaure ira uno tintalen hohe, kaik no uno nilon naga takodas? Na tahut bia na lon murmur ira num nianga. Iau silihe ugu ma no nugu kidilona lon. Waak u bale tar iau bia ni rara laah ta ira num hartula. Iau te suhe no num nianga narakoman tano balagu, kaik iau pa nigi gil tiga sakena taar taam. Watong, a pirhakasing tupas ugu. Hausur iau ta ira num dadas na harkurai. Ma ira palabulugu iau hinawas palai ta ira ula harkurai bakut ing ga hansur tano haam. Iau kanakana wara murmur ira num harpir hoing tikai i guama ta ira uno halengin kinewa. Iau lik murmur ira num nianga na harakatom ma iau lilik timaan ta ira num tintalen. Iau manga guama ta ira num dadas na harkurai. Iau pa ni lik luban se ira num nianga. Gil ta bilbilai tagu, no num tultulai, ma iau nigi lon ma iau ni mur ira num nianga. Papos ira matagu waing iau nigi nes ira bilai na linge saakit kenam narakoman ta ira num harkurai. Iau tiga wasire tano ula hanuo. Waak u suhe ira num hartula bia iau pai tale bia ni nes. No kaatigu i manga mur tunat ira num ula harkurai ta ira kaba bungbung. U la baboor ira ut na latlaat, diet at ing diet la hanahaan talur ira num nianga na harakatom, ma diet na kap ra harpidanau. Waak u haut leh ira tunotuno bia diet na tange hagahe iau ma diet na kukutur sakasaka tagu, kanong iau la pakpakile haruatne ira num harpir. Ira tamat na lualua diet kis tika wara tangtange hagahe iau, iesen iau, no num tultulai, iau ni lik murmur timaan ira num dadas na harkurai. Ira num harpir i la hakanakana iau. Kaike ra harpir i la tartar a bilai na harausur tagu. Di te paas hasur iau taar tano kaabus. Halon iau haruat ma no num nianga. Iau ga tange hapuasne ira nugu mangana tintalen, ma u te taram iau. Hausur iau ta ira num dadas na harkurai. Hapalaine iau uta ira ngaas ta ira num nianga na harakatom, waing nigi lik murmur ira num bilai na gingilaan harsakit. A tapunuk i te ubal tar iau. Hadadas iau haruat ma no num nianga. Kap se no tintalen na hinarabota tagu, ma hamines no num harmarsai ing nu tar ira num harkurai tagu. Iau te pilak leh ira tutun na tintalen. Iau te bul ira num ula harkurai menalua tagu bia ni mur haruatne. Watong, iau la palpalim hadadas tar ta ira num harpir. Waak u bale bia da hahirhir iau. Iau ni hilau mur ira num hartula, kanong nu hapalaine timaan no nugu lilik. Watong, hausur iau wara murmur ira num dadas na harkurai, ma iau pa ni sangeh wara tartaram kaike ra nianga. Tar palpalai tagu waing nigi taram ira num harkurai ma ni mur timaan ma no nugu nilon bakut. Lue iau tano ngaas ta ira num hartula, kanong kaia iau ni silihe ira gungunuama. Hurusane no balagu tupas ira num harpir, ma waak bia ukatiga hono magingin na gumut. Kap se ira matagu ta ira linge ing a linge bia mon. Balaure timaan no nugu nilon haruat ma no num nianga. Hatutun ira nianga u ga kukubus taar tagu, no num tultulai, waing daga burte ugu. Kap se tar ira nianga na kukutur tupas iau ing iau hirhir ine, kanong ira num ula harkurai, a bilai at diet. Tutun saakit, no kaatigu i la murmur ira num nianga na harakatom. Balaure bat no nugu lon ma ira num tutun na magingin. Watong, iau sasaring bia no num harmarsai nong pai la patpataam na hanuat taar tagu, io huo, nu halon iau haruat ma ing u ga kukubus taar huo. Io, iau ni tale bia ni balu sige nong na tange hagahe iau, kanong iau nurnur tano num nianga. Bale iau bia ni hinawas palai utano num tutun na nianga, kanong iau kis nanaho ta ira bilbilai ta ira num ula harkurai. Io, iau ni murmur hatikane ira num harkurai, katin, namur, ma pana le pataam. Ma iau ni langalanga timaan, kanong iau te silihe leh ira num nianga na harakatom. Ma iau ni hinawas ta ira num harpir menalua ta ira king ma pa da hahirhir iau. Io, iau guama ta ira num hartula, kaike ra hartula ing iau kalak. Ma iau raun haut ira iruo limagu ukatiga ho ira num hartula ing iau sip, ma iau la liklik murmur ira num dadas na harkurai. Lik leh no num nianga u ga kubus ie tika ma iau, no num tultulai, kanong u te lue iau bia ni kis nanaho ta ira bilbilai ta ira num nianga. No linge i habalaraan iau tano nugu ngunngutaan i hoken, bia no num nianga na kunubus i balaure bat tar no nugu lon. Ira ut na latlaat diet manga hasakit sakasaka tagu, iesen iau pa ni haan talur ira num harkurai. Watong, iau lik kawase ira num ula harkurai u ga bul tar nalua saakit, ma diet habaraam iau. No ngalngaluan i manga tamat tagu kanong ta ira ut na sakena, diet ing diet te waak kapis ira num harkurai. Iau la inginge uta ira num dadas na harkurai ta ira katon iau la hanahaan ukaia. Watong, ra bung iau lik kahe no hinsaam, ma iau la murmur ira num harkurai. No nugu mangana magingin i hoken, bia iau la tartaram ira num nianga na harakatom. Watong, augu no pinlawegu. Iau te kukubus be iau ni mur ira num nianga. Iau te silihe ira num haraidaan ma no nugu nilon bakut. Marse iau haruat ma no num nianga na kunubus. Iau te lik murmur ira nugu magingin ma iau te tapukus taar ta ira num harpir. Iau ni habir ma pa ni halis wara murmur ira num hartula. Bia ira ut na sakena diet na kubus iau ma ra hinau, iau pa ni lik luban ira num harkurai. Iau tangahun ra tingena bung wara tanga tahut saakit taam uta ira num takodasiana ula harkurai. Iau tiga harwis ta diet bakut ing diet ru ugu, ma ta diet ing diet mur ira num nianga na harakatom. Watong, no ula hanuo i hung ma no num harmarsai. Hausur iau ta ira num dadas na harkurai. Watong, u te gil ra tahut taar tagu, no num tultulai, haruat ma no num nianga. Hausur iau ra mintota ma ra bilai na minminonas, kanong iau nurnur ta ira num hartula. Ing iau pa ga harsomane baak ra tamat na tinirih, iau ga haan talur ugu, iesen kaiken um iau mur ira num nianga. A tahut ugu, ma ira linge u gil i bilai. Hausur iau ta ira num dadas na harkurai. Ira ut na latlaat diet te tange ra haleng na bis na nianga utagu, iesen iau taram ira num harkurai ma no nugu kudulena lon. Ira ulu diet i tabanot, iesen iau guama ta ira num harkurai. Ing iau ga harsomane ra tamat na tinirih, ga bilai tagu, kanong ga hausur iau ta ira num dadas na harkurai. Iau nes kilam tano nugu lon bia ira harkurai meram tano haam i manga tirih ta ira arip na subana siliwa ma ra gol. Ira lumaam ga gil iau ma ga hakisi iau. Hapalaine iau waing nigi harausur ta ira num hartula. Iau sip bia diet ing diet ru ugu, diet na guama ing diet nes iau, kanong iau kis nanaho ta ira bilbilai tano num nianga. Watong, iau nunure bia i takodas ira num ula harkurai, ma bia narako tano tutun na magingin u te hangungutaan iau. Bale tar no num harmarsai nong pai la patpataam bia na habaraam iau, haruat ma ing u ga kukubus taar tagu, no num tultulai. Marse iau waing iau nigi lon, kanong iau kanakana ta ira num harkurai. Hahirhir ira ut na latlaat kanong diet tung iau ma ra harabota na nianga, iesen iau ni lik mur ira num nianga na harakatom. Diet ing diet ru ugu, iau sip bia diet na haan tapukus ukai ho iau, diet at ing diet palai ta ira num harpir. Iau sip bia no balagu na bilai harsakit, naga haruat ma ira num dadas na harkurai, waing iau pa nigi kaha hirhir. No nugu lon i te maalum ing iau kis kawase no num harhalon, iesen iau kis nanaho ta ira bilbilai tano num nianga. Ira matagu i te manga tirih wara ninaas bia nu gil haruatne ira num nianga na kunubus. Iau tange hoken, “Hunanges um nu habaraam iau?” Tutun bia iau haruat hoing tiga gingop ing di gil ma ra pala bulumakau ing a mis i te rang hagahe tar, iesen iau pai lik luban ira num dadas na harkurai. Iau, no num tultulai, iau ni kis nanaho haruat hunanges? Hunanges kaik nu bul no num ula harkurai wara hapidanau diet ing diet helar tagu? Ira ut na latlaat diet te kil hasur no pise wara hakuni iau. Diet pai lon mur ira num harkurai. I haruat bia da so nurnuruan ta ira num hartula. Harahut iau, kanong ira tunotuno diet helar tagu ma ira bis na nianga. Dahin ma diet gar te hapataam se tar iau mekai ra ula hanuo, iesen iau pa ga waak se tar ira num nianga na harakatom. Balaure bat no nugu lon haruat ma ira num harmarsai, waing iau nigi mur ira kaba harpir mekaia tano haam. Watong, ira num nianga na kis hathatika. I tur dadas aram ra mawe. No num tutun na magingin na haan taar ta ira tunotuno ing diet lon katin ma namur mah. U ga hakisi no ula hanuo, ma i kis hatika taar. Ira num ula harkurai i kis taar tuk katin, kanong ira linge bakut i la tartaram ugu. Ing bia ira num harkurai pa naga haguama iau, iau gor te maat ma ira nugu ngunngutaan. Iau pa ni lik luban ira num nianga na harakatom, kanong ta kaike ra nianga na harakatom u te balaure no nugu lon. Halon iau, kanong a num iau. Iau te silihe leh ira num nianga na harakatom. Ira ut na sakena diet nanaho wara haliare iau, iesen iau ni lik mur ira num harpir. Iau nes bia a mon patpataam ta ira linge bakut, iesen ta ira num hartula, taie ta patpataam ine. Iau la manga kalak tar no num harkurai! Iau lik mur ie tano kidilona bung bakut. Ira num hartula diet gil iau bia ni manga mintot ta ira nugu ebar, kanong kan ra nianga na harakatom i la kis hatika taar ma iau. Iau manga minonas ta ira nugu ut na harausur, kanong iau la liklik murmur ira num harpir. Iau manga palai ta mehet ma ira patuana, kanong iau la tartaram ira num nianga na harakatom. Iau pas ira sakana ngaas waing iau nigi mur ira num nianga. Iau pai haan talur ira num ula harkurai, kanong augu at u te hausur iau. Ira num nianga i namien ududuh! I manga namnamien ta ira tiri na imara akai ra hagu! Iau kap ra palpalai mekai ta ira num nianga na harakatom, io kaik, iau malentakuane ira ngaas ing pai tutun. No num nianga a laam ie ta ira iruo kakigu, ma ra lulungo ie tano nugu ngaas. Iau te sasalim ma iau ni gil haruatnei, bia iau ni mur ira num takodasiana ula harkurai. Watong, i te manga ubal iau ra haleng tinirih. Balaure bat no nugu lon haruat ma no num nianga. Watong, nu haut leh ira pirhakasing tano hagu ing iau kanakana bia ni tar taam, ma nu hausur iau ta ira num ula harkurai. I tutun bia iau la taguro taar bia ni hiruo, nigi maat, iesen iau pa ni lik luban ira num harkurai. Ira ut na sakena diet te kapis tar tiga kuun wara utagu, iesen iau pai rara sukun ira num nianga na harakatom. Iau ni kap usurane hatikane ira num harpir. A sape na kaatigu at diet. Iau te bul no nugu lilik wara gilgil haruatne ira num dadas na harkurai hathatikai tuk bia ni maat. Iau malentakuane diet ira liliklumet na tunotuno, iesen iau sip tar ira num harkurai. Augu no nugu subaan na munmun, ma no nugu bahbahit. Iau kis nanaho ta ira bilbilai tano num nianga. Muat ira ut na sakena, muat na haan talur iau, waing iau nigi mur ira hartula tano nugu God. Balaure timaan iau haruat ma no num nianga, waing iau nigi lon. Ma waak u bale iau bia ni malahuan ta ira linge iau kis kawasei ma ra nurnur. Hatatol iau waing iau nigi kap no harhalon huo, ma nigi manga lik hatikane ira num dadas na harkurai. U malok se diet bakut ing diet tamapas laah talur ira num dadas na harkurai, kanong diet lamus habato ira tunotuno ma ira udiet hinarabota. U te waak se ira ut na sakena bakut tano ula hanuo hoing di gope se ira bilinge ing i booka ta ira siliwa ing di tun ie. Io kaik, iau sip ira num harpir. No palatamaigu i dedar ma ra bunurut wara utaam, ma iau ru ira num ula harkurai. Iau te gil ing i takodas ma i tutun. Waak u bale se tar iau ta ira ut na haraubaal. Hatutun bia iau, no num tultulai, ni kap ira bilbilai. Waak u bale tar ira dadas na ulpat bia diet na ubal iau. Ira matagu i tirih ing iau nanaas tano num harhalon ma ta ira num gingilaan haruat ma no num takodasiana kunubus. Papalim narako tagu, no num tultulai, haruat ma no num harmarsai, ma hausur iau ta ira num dadas na harkurai. Iau no num tultulai. Hapalaine no nugu lilik waing iau ni palai ta ira num harpir. Watong, no pakana bung kaiken um bia nu tut ma nu pakile ira num pinapalim, kanong di te kutus ira num harkurai. Io kaik, iau kalak ira num hartula. No nugu sinisip uta kaike ra hartula i tamat ta dir ma ra gol, a gol at mah ing a tabi matana. Io kaik, iau nes kilam bia ira num nianga na harakatom bakut i takodas, ma iau malentakuane ira kaba ngaas na hinarabota. A bilai saakit ira num harpir, io huo, iau la tartaram diet. No tamtamapapos ta ira num nianga i tar lulungo. I tar palpalai ta ira bawine. Iau panganga ma iau mehmeh, kanong iau masingane ira num hartula. Talingane iau ma nu marse iau, hoing u la gilgil ta diet ing diet kalak no hinsaam. Hadadas ira nugu hinahaan haruat ma ira num nianga na kunubus. Ma waak u bale iau bia ni kis ra henai no dadas ta tiga magingin sakena. Halangalanga iau sukun ira haraubaal ta ira tunotuno waing iau nigi mur ira num nianga na harakatom. Bale bia no matmataan taam na murarang naliu tagu, no num tultulai, ma nu hausur iau ta ira num dadas na harkurai. Ira polo na matagu i manga saal suur ta ira matagu, kanong pa di mur ira num harkurai. Watong, a takodasiana ugu, ma ira num ula harkurai i takodas. Ira harpir ing u te tar, i takodas, ma i tale bia da so nurnuruan ta diet. No balagu i manga mamahien kanong ira nugu ebar diet lilik tatohun ta ira num nianga. Di te walar tar no num nianga na kunubus ma di te nes bia i bilai harsakit, io kaik, iau no num tultulai, iau la sip tar ie. A tutun bia a tunotuno bia mon iau ma di mikiane iau, iesen iau pai lik luban ira num nianga na harakatom. Ira num takodasiana magingin i la kis hatika taar ma ira num harkurai i tutun. A tinirih ma ra tapunuk i te haan tupas iau, iesen iau la kanakana taar ta ira num hartula. Ira num harpir i la takodas hatika taar. Hapalaine no nugu lilik waing iau nigi lon. Iau tataau ma no nugu kidilona lon. Balu iau, Watong. Iau ni taram ira num dadas na harkurai. Iau tataau ukatiga ho ugu. Halon pukus iau ma iau ni mur ira num harpir. Iau tut ra malabungbung ma iau suah wara harharahut. Iau kis nanaho ta ira bilbilai ta ira num nianga. Iau pai la hapulo ira iruo matagu tutun at ra bung, waing iau nigi lik murmur ira num nianga na kunubus. Hadade no ingagu haruat ma no num harmarsai. Watong, balaure bat no nugu lon haruat ma ira num ula harkurai. Diet um ken hutet ing diet pingit saksakena, iesen diet tapaka taar ta ira num harkurai. Watong, augu at ken hutet, ma ira num hartula i tutun. Nalua saakit iau ga harausur ta ira num harpir bia u gate hakisi hatikane tar diet. Nes ira nugu ngunngutaan ma halon iau, kanong iau pai lik luban ira num harkurai. Tur harahut iau ma nu halangalanga ise iau. Balaure bat no nugu lon haruat ma no num nianga na kunubus. No harhalon i tapaka ta ira ut na sakena, kanong diet pai silihe tupas ira num dadas na harkurai. Watong, no num harmarsai i manga tamat. Balaure bat no nugu lon haruat ma ira num ula harkurai. Haleng ira sukagu ing diet hahelar tagu. Iesen iau pai tahurus talur ira num harpir. Iau nes ira ut na harababo ma iau mikiane diet, kanong diet pai mur ira num nianga. Nes bia iau kalak ira num nianga na harakatom. Watong, balaure bat no nugu lon haruat ma no num harmarsai. No burena ira num nianga bakut a tutun. Ira num takodasiana ula harkurai bakut i la kis hatika taar. Ira lualua diet helar bia mon tagu ma taie ta burena, iesen iau dedar ma urur tano num nianga. Iau guama ta ira num nianga na kunubus hoing tikai i paas hasur no uno ebar ma i kap leh ira uno haleng na minsik. Iau malentakuane ma iau malok se no magingin na harabota iesen iau kalak no num harkurai. Iau pirlat ugu ra liman ma airuo na pakaan tiga bung kanong ta ira num takodasiana ula harkurai. A tamat na malum saakit na kis ta diet ing diet kalak no num harkurai, ma taie ta linge na hapuko diet. Watong, iau nanaho tano num harhalon, ma iau la gilgil haruatne ira num hartula. Iau mur ira num harpir, ma iau manga kalak diet. Iau mur haruatne ira num nianga na harakatom ma ira num harpir, kanong warah, ira nugu tintalen u nunure bakut tar. Watong, bale leh no nugu sunuah bia na haan tupas ugu. Tar no palpalai tagu haruat ma ira num nianga. Bale leh no nugu sinasaring bia na hanuat taar taam. Halon iau haruat ma no num nianga na kunubus. No palabulugu na hung ma ra pirhakasing, kanong u la hauhausur iau ta ira num dadas na harkurai. No karamegu na inge garaan ira num nianga, kanong ira num hartula a takodasiana. Bale tar no limaam bia na taguro wara harharahut iau, kanong iau te pilak leh ira num nianga na harakatom. No kaatigu i la murmur no num harhalon, Watong, ma iau kanakana ta ira num harkurai. Bale leh iau bia ni lon waing iau nigi pirlat ugu, ma bale ira num ula harkurai bia diet na harahut iau. Iau te rara hoing tiga sipsip i te panim. Silihe iau, no num tultulai, kanong iau pai lik luban ira num hartula.