Ninge.
137.
Dahat ga kis taar ta ira gagen taah me Babilon ma dahat ga suah ing dahat ga lik leh Saion. 
Dahat ga sakire ira udahat haap kaia ta ira katena sera, 
kanong diet ing diet ga palim kahe dahat, diet ga tange hadadas bia dahat na inge kaia. Diet ga kukutur ta dahat, diet gaam hatitis dahat bia dahat na inge ira ninge na gungunuama. Diet ga tange bia, “Muat na inge tiga ninge uta Saion ta mehet!” 
Dahat na inge ira ninge tano Watong hohe ma dahat kana tiga mes na taman? 
Ierusalem, bia iau ni luban ugu, i bilai bia no kata na limagu na luban bia na ting habaling no haap hohe. 
Ierusalem, ing bia iau ni luban ugu, ma ing bia iau pai hatamat ugu naliu ta ira mes na linge ing i haguama iau, i bilai bia no karamegu na kumkum ing iau pa ni tale bia ni inge baling. 
Watong, lik tar asa ing ira Idom diet ga gil tano bung di ga dure hasur Ierusalem. Diet ga kakonga bia, “Dure hasur ie! Dure hasur ie ures muk ta ira burena!” 
Babilon, u kis taguro taar um wara hiniruo. A haraidaan na kis ta nong na balu pukus tar taam haruat ma ira linge u ga gil tar ta mehet. 
A haraidaan na kis ta nong na palim kawase ira num nat na bulu ma na se rigisane diet taar ta ira ula haat.