17
Jesus va'ora ka'ojomo'iki adani kidipohi
(Mateus 18.6-7, 21-35; Marcos 9.42)
1 Oniaroa, Jesus va'ora ni'aha adani kidipohi:
—Ija'ari va'ora kaborobakhiaki adani ija'ari vahoariha, Jahari kabadania vakabadanira kaimoni. Hoariha-ra kaborovinia kabadanihi, Deua binaabosiki bana ida nahina jaharikia. 2 Jahaki ida ja'di karaho ija'ari mathani ahoni paha bihiakia hokahini ahidaja kaimoni ida ija'ari kodija'ari-ra kaboroboroki. Jahari'oamanija ida oipohina-ra kaborovini Jahari kabadania kabadanija kaimoni.
3 Iabono akava'igairi bana. Ikaabani bana ada iigamini Jahari kabadania kabadaniki mahija bikava'ipahinivini. Bikava'ipahinihi; hari'a ikava'ihokijana bana ida kidihojai asohiriki. 4 Khahi ida iigamini, ira ni'ahi:
“Jahari'oamanija ida kodihojai kadania,
hora akariaka bana.”
Nihi. Iakariaka bana ida iigamini. Hari'a ikava'ihokijana ida bada bini'a'iki. Kidihojai asohiriki ira naihamahi'ianahi; kadania ira kanikharia'ianahi, iakariaka'iana bana! Mahi hoarani bada bini'abakhiaki ida ivajahariki, ira kanikhariabakhiahi jaboni, iakariaka bana jaboni — va'ora ni'aha ada Jesus.
Deu-ra vakajari'daravini varani hini hida
5 Hari. Oniaroa, Jesus athi avavaadahaoniva abonoa vakanikharia'aha:
—Aajo, haria kajoamora bana mahija avijavavini ida Deu-ra akajari'daravini. 6 Oniaroa, Jesus va'ora ni'aha:
—Pa'itxini kaba'i ida Deu-ra avakajari'daravini, Deu-ra avakanikhariavini hihi, a'onira no'avini hihi ida avakanikhariaki. Deu-ra avakajari'daravini oadani, avakaabokaki ida ihi'ai avani rasohani-ra avahonariavini:
“Rasohahi oni 'damani
abohani,
paha bihiakia irakhaihi.”
Ihi'ai avani-ra avahonariahi bana, Deu-ra avakajari'darihi, oniani ida Deua binanamithavini hija bana avakanikhariaki — niha ada Jesus.
Honai abono kabadani varani hini hida
7 Hari. Vara ni'ianaha ada Jesus:
—Rajomi kavaranihia okavaraniki bana ho. Ka'da'di ihiki i. Ivahojaki ada kadahonai abono. Kadahonai abono ira kasiroihaki, va'ora akadava'aki jaboni adani kada'ovilia. Mahi oadani bada bini'aki ida badani ihonariavini hi'iki. Hari. Mithani vaivaini joina vani ni-kadahonai abono-ra ini'aki:
“Hidiaja kha mahija i'baivini.”
8 Ni-niki ida kadavarani. Kadahonai abono-ra ini'ahi:
“Hora ko'baiha'a.
A'diahihi ida 'bai,
hora kavikha bana oibavia mahija o'bai'imidiavini.
O'baina naothinia imaina i'baihi.”
9 Nimania ida ka'da'di kidihonai abono-ra vara ni'avini. Honai abonoa bada bini'ahahavivini kaba'i ida kidika'da'di bihonariavini hiki, ni-kidika'da'dia bini'aki:
“Ijaha'oamanija kodibadani-ra bada ini'ahahavi'iki i.”
Ni-niki ida kidivarani. 10 Onivani fori avihini jahaja. Deus kahonai abono avihiki a'oni. Deus a'onira honariavini hi'ikia avakabadanihahavi'ini naothinia avaabononi vani'a'a bana:
“Ni-nahina arihijahakirihi.
Deus kahonai abono ka'oa arihiki hari.
Haria honariavini hiki ida badani jahakia akabadanina.
Ni-nahina jahani arafiakia akabadaniki.”
Jesus va'ora anaihotaki adani makhira vakavamoniki
11 Hari. Oniaroa, Galiléia kaarabonia ajihiha ada Jesus. Samaria kaarabonia okafianiha, Jerusalém sidaji-ra anikhaha'aha. Aadahaonina oadani ibavi kagoraki kania maakarinia akhano'aha ada Jesus.
12 Hari. Sidaji banininia vahojaki adani 10 vihiki makhira vakavamoniki. Asafi namani-ra najaharikia vakavamonina mani ida va'ora nahojaja napaja sidaji banininija. Jesus kania avikhana kaba'i, ni-Jesu-ra vanamaakariki. 13 Oniaroa, vibaranaha'aha:
—Jesus, haria va'adi bana.
14 Jesus va'ora noki'aha, va'ora ni'aha:
—Ai vihi'a bana mahija sasidotxi vakadiania avarikhavini. Sasidotxi-ra vananokiahivini hi'oni avaasafini namani jaha'iki — va'ora ni'aha ada Jesus.
Oniaroa, avikhana kaba'i vajahahahavi'aha. 15 Hari. Hoarana abono-ra noki'aha kavamonijanarina, ajoi'aha Jesus kania. Samaria kaaraboni kaija'arini ada makhira ajoi'iki. Ajoina oadani bodi'barahaha Deus jahana-ra khai ni'avini. Jesus kania akhano'aha, 16 Hari. Jesus viaha kajo'atharari'aha, Jesu-ra khai ni'a'aha:
—Jesus ijahaki i kodimoni ihini, hora inajaha'iki i — niha.
17 Jesua bini'aha:
—Va'ora onajaha'iki adani makhira vaipohina 10 vihiki. Deu-ra khai ni'a'iki ada hihada makhira hoarana, akadija'ari hirina kaba'i. Adani hanaja vahojaha vahoariha 9 vihiki? 18 Niha vakhanimanira adani vahoariha vajoiriki Deu-ra khai vani'ara kaimoni?
19 Hari. Jesua bini'aha ada jaha'iki:
—Gaa'a, adaha'a. Hora ikajari'daravini mani ida ira onajahavini hi'ia — niha ada Jesus.
Deus ija'ari hahavi-ra va'ora vaka'da'divini kamahini
(Mateus 24.23-28, 36-44)
20 Hari. Oniaroa, farisio vaipohirikia vanana'dohi'aha ada Jesus:
—Asia mani kamahini ipohija ida Deus ija'ari hahavi-ra va'ora vaka'da'divini kama'dani?
Jesua vakadina'dohi bigathani'aha:
—Nokiariki bana ida Deus ija'ari-ra vaka'da'divini kama'dani. 21 Ni-ija'aria binava'isohirihi ida hoariha:
“Vada ini'a hida kama'dani.”
Ni-ija'aria bini'aki jaboni:
“Vada ini'a oni kama'dani.”
Nokiarihi bana ida Deus ija'ari-ra vaka'da'divini. Deua bivaka'da'divini ida ija'ari va'ini bodinia.
22 Hari. Jesus va'ora nava'isohi'aha adani kidipohi:
—Khaki bana ida mahi hora avanoki'ianavini-ra avanofivini kamahini, hidakaba'i hora avanokivini fori hiki. Ohojana kaba'i avakadiania, ni-hoaranija hora avanoki'ianaki hora avanokivini fori hiki hidakaba'i. 23 Vahoariha a'onira vani'aki bana a'oni:
“Vada vani'a hada vani Cristo.”
Vahoariha a'onira vani'aki bana a'oni jaboni:
“Vada vani'a hi'o Cristo.”
A'onira vani'avini kamahini, hari'a bana vanavanavanaha'a. 24 Bahi korikorihana nama-ra navagajorakivini vani fori hija bana ida ojoina kamahini.
Hovani ija'ari hahavi vakadi'aajo ho. A'onira onava'isohijoravini hiki ida bana okha'ianana viahani namithaki kaimoni. 25 Oimana 'banakaraho'imidiaki bana ho. Ija'ari hidakaba'i vahokiki hora vakajoniki.
26 Noé kohana ava'doroa o'oina viahani kari fori hiki bana ida ojoina kamahini. 27 Noé o'oirina oadani, ni-ija'aria vakava'ibodivaranipa'itxiki ada Deus. Ni-vanofiki ida Deus athi-ra vanaabavini. Vakava'ibodivaraniha'oadahaki ida vakadimahi, vakadi'bai, makhira gamo khama avaakarana hiki. Noé ava'doroa o'oina naothinia, Deua bikarona'iki ida paha karaho, avahidahahavi'iki adani ija'ari.
28 Hari. Onivani fori hija ida jaboni Ló kohana hojana. Sodoma sidajia akara'orina oadani, ni-vanofiki ida Deus athi-ra vakamithavini, ni-vakava'ibodivaranipa'itxiki jaboni ada Deus. Ija'ari hahavi vi'baibakhiaki, vakapavakariki ida vakadinahina, pavakari vanihaki jaboni ida vakadinahina, varakhajahaki adani, vanamonahaki jaboni ida vagorana. Nimania ida vakadimahi. 29 Hari. Ló Sodoma sidajia akara'ona naothinia, Deua bikanakhanorari'ihi ida siho kaha'dini, siho kanadarani kihiki, va'ora naabinihahavi'aha adani Sodoma sidaji kaija'arini. 30 Onivani fori hija ida jaboni bana onokiana kamahini.
31 Va'ora onava'isohijoraki bana adani ija'ari gora 'da'dini a'ani sohiriama'okia vahojana onokiana kamahini:
“Avigajoraki'a bana.
Hari'a avikhajakosi bana avagorania,
avakadinahina-ra avaranikhavini.”
Va'ora onava'isohijoraki adani ija'ari vakadisiroia vahojaki, vagorana avajoirara kaimoni. 32 Vakava'ihoki bana ida Ló kagamo kohana varani hini. Vada va'ora ni'aribanivini mani ida napohimajani hi'ia. 33 Hari. Ija'ari va'ini bodinia abononi ni'ahi:
“Jesus kaija'ari ohina-ra
avigaha adani vahoariha;
hora vanaabiniha.
Jesus kaija'ari ohirina-ra okahiki bana ho.”
Nihi ida ija'ari va'ini bodini vara nini, abinini kamahini Ibavi Jaharika'oaki kania okhahi. Ija'ari va'ini bodini abononi ni'ahi:
“Jesus kaija'ari ohina mani ida vahoariha hora
vanaabinivini-ra vanofivini hija.
Oabinihi; oabinihi.
Jokoa kidija'ari ohirina-ra okahirihi.”
Nihi ida ija'ari va'ini bodini vara nini, abinini kamahini Ibavi Jahaka'oaki kania okhahi.
34 Hari. Onokiana kamahini joma vavadiki bana adani ija'ari vi'bamiki vagorana. Deua bianiki ida bana ija'ari hoarani, hojaroniki ida bana ija'ari hoariha. Ka'oa hiki ida a'onira onava'isohijoravini hiki bana. 35-36 Gamo vi'bamikia vigihahi ida boda jo'doni. Deua bianiki ida hoarani. Hojaroniki bana ida hoariha. Makhira vi'bamiki bada vakhaniki jaboni bana vakadisiroia. Deua bianiki bana ada hoarana. Hojaroniki bana ada hoariha — va'ora ni'aha ada Jesus.
37 Oniaroa, ipohina vanana'dohi'aha ada Jesus:
—Aajo, hanaja vania bana namithaja ida haria ini'avini hi'iki?
Jesus va'ora ni'aha:
—Aba'oi 'bathaki hojaroni'ihi; vajorahaki adani majori. Onivani fori vihira bana adani vahojaroniki bana, 'banakarahoki bana ida vaimana — niha ada Jesus.