Vaikala Noxou Lataua LUKA 1

AꞌALO LAIXE NOXOU IESU KALISITO ANE

LUKA

MUKAUKAVU VAIKALA LAMANA MULAI NOXOU TEOPILO

Vaikala lamana

Aꞌalo laixe sou Iesu Kalisito e Luka mukaukavu ꞌo ne anu muaꞌaloxu Iesu lamana lexe Anu muneꞌe sou unoꞌa ta Isilaeli iloꞌa ta mitema latala ukalusi ilivu. No anu aꞌalo noxou (4:18), la Iesu muvikalaneꞌi ta mitema lexe, Uleenu Tavuna muavutilixu sou uaꞌaloxu vaikala laixe noxou Lataua ulai noxiꞌa ta mitema ane paꞌusiꞌa no anu mimii tavuꞌalo. No anu lavuku noxou Luka ꞌo, la muaꞌalo tavuꞌalo no anu mauli sou ꞌosaꞌila. Musoko no anu aꞌalo noxou la muaꞌaloxu xali noxou Iesu ne, muxalixu ꞌosaꞌila toxoxaꞌa manina (1:42-48; 2:10) xe no anu kaluxusou (24:52). No mine Iesu mulivu mutelai teitexi no opo loxotolo.

Luka anusisi muaꞌaloxu xaixai noxou Iesu xe mimii tavuꞌalo Anu muꞌoxonu. Mo vaikala tovolaꞌi moseꞌi Anu muꞌoxonu kalumo ne umomomo sou namaisou no anu lavuku leviani uasi. Loxo lexe sou ꞌosaꞌila noxiꞌa ta angelo (2:13-14), xe ta mitema sou isaxilaꞌa ta sipsip milai mimaisou Iesu no mine nenu mivoꞌonu. Mo Luka muaꞌaloxu Iesu no mine nenu ilou momu minoꞌu milailixu no nano no anu taasou lalotu tatila noxou Lataua sou mialusou loxo lapuloto noxou Mosesi mivikalaneꞌi sou imulinu. Mo muaꞌaloxu vaikala tovolaꞌi vile sou itema ne Samalia e muꞌoxonu ꞌilixo laixe noxou itema vile ane ta mitema ta masua mivau xe molomolo e muꞌumesou momu. No nano no anu lavuku noxou Luka, la anu muaꞌaloxu ꞌilixo sou lakilala maninasou mo muaꞌaloxu xaixai noxiꞌa ta sema no nano no anu xaixai noxou Iesu, mo xaixai no anu Uleenu Tavuna xe ꞌilixo sou Lataua uxiunu tumalou no anu ꞌilixo masumasua noxiꞌa ta mitema.

Aꞌalo noxou Luka ukalu ane ꞌo uasi, anu musolonu aꞌalo noxou la no anu lavuku vile mukaukavunu aꞌalosou xaixai noxiꞌa ta aposeli. Lavuku ane xaixai noxiꞌa ta aposeli ne, anu muaꞌaloxu xaixai noxiꞌa ta aposeli no mine Iesu mulivu mulai teitexi no opo loxotolo.

Aꞌalo muai no nano aloxo ꞌo

Vaikala lamana mulai noxou Tiopilasi 1:1-4

Aꞌalosiꞌa Iesu ilou Ioanesi ta neniꞌa mivoꞌoneꞌi xe ta molomoloxaꞌa 1:5–2:52

Xaixai noxou Ioanesi itema sou uꞌulosiꞌa ta mitema 3:1-20

Iesu muꞌulo xe mukalu la mulai no anu tovotovo 3:21–4:13

Xaixai noxou Iesu ne Xalilaia 4:14–9:50

Iesu mulutu ne Xalilaia sou mulai ne Ielusalemu 9:51–19:27

Voxo kalukaluxusou no ale xe no nano ne Ielusalemu 19:28–23:56

Iesu mutulu, mo mupalaplaꞌalixu, xe mulivu mulai teitexi no opo loxotolo 24:1-53

1 ✡Eni akaukavu vaivaikala ano ꞌo ulai noxine, nini tila Teopilo. Tei, la ta mitema tapiena mitovo avoꞌa sou mikaukavunu aꞌalo sou mimii ane Lataua mumomomosou muxali no nixi noxixe. 2 Aneꞌi mimulinu vaikala noxiꞌa ta mitema aneꞌi e mimaisou mimii ane ne no ieꞌi no voxo ane mimii ne musoko muxali. Aneꞌi ta mitema ane ne, mixolu lexe aneꞌi ta mitema sou xaixai sou vaikala noxou Iesu. La sou aneꞌi milosixe aꞌalo sou mimii ane ne. 3 Loxo ne, la sou eni kalumo emasaxa lexe akaukavunu aꞌalo sou mimii ane ne mo asovanu ulai noxine. Eni exaxai maxuveeni musuku sou ekakamulinu mimii mukalusi ne tavaꞌu laixe. Mo vaimomo ꞌo, eni ekaukavu laixe aloxo nesi, aloxo mimii ane ne muxali. 4 Nini naitisou, la sou nalavu laixe lexe vaivaikala ane aneꞌi milosienixu ne, anu maninasi.

Elisaveti Mivoꞌonu Ioanesi

5 No voxo ane Elodesi muxolu loxo tatananu tuala no xalee lia tila ne Iutaia, la ailiꞌi vile muxoxolu lai ne, ualasou lexe Sakalia. Anu itema vile no anu laꞌoluxaꞌa ta Avia. Semau ne, ane Aloni mutuꞌu ovuxu e ualasie lexe Elisaveti. 6 Ilou mixolu milapu no iou Lataua mo milavusou mimulinu vaivaikala noxou Lataua mo lapuloto noxou mukalusi, la isusu no iou uasi. 7 Ia, ilou ta ꞌiliꞌa uasi, xo Elisaveti imomomosou ipalaa la uasi, mole ilou ta aululu mukalu ne.

8 Alaxu vile, la laꞌoluxaꞌa noxou Sakalia milai miꞌoxonu xaixai noxiꞌa sou iꞌelaxaꞌa ta sipsip no iou Lataua. 9 ✡La aneꞌi miꞌoxonu vilaꞌi vile mimulinu ꞌilixo noxiꞌa sou misosovosou vile noxiꞌa sou lexe uꞌunalai no taasou lalotu tatila noxou Lataua sou uꞌelaxu mimii ane tumaꞌu lailaixe. Xe miꞌoxo aloxo ne, la misosovosou Sakalia. 10 Voxo sou anu uꞌelaxu mimii ane tumaꞌu lailaixe muxali, la ta mitema tapiena mipita no ale sou milinga mulai noxou Lataua.

11 La sou angelo vile noxou Tila muxali mupalaꞌa noxou Sakalia. Muxali la mutulu no xalee tema no anu valovalo e iꞌelaxu mimii tumaꞌu lailaixe no anu. 12 Anu mumaisou angelo ne, la mukuluke xe mumamaꞌu. 13 Ia angelo muvikalanu aloxo ꞌo, “Sakalia, naꞌume mamu! Lataua mulomusou linga noxine ne. Iliꞌi, la semameni Elisaveti ivoꞌonu keakea mulu vile. La nini namoxoꞌu ualasou lexe Ioanesi. 14 Ulai iliꞌi, la oponeni uꞌosaꞌosasou mo ta mitema tapiena kalumo iꞌosasou no voxo mine ivoꞌonu. 15 ✡Xo anu uxali itema tila vile no iou Lataua. Anu umomomosou uiexu uaini mo lexa pekiaꞌu uasi. Xo no mine anu uxolu noxie nenu opoone sio mo no anu maulixu ukalusi ne, la Uleenu Tavuna uꞌanaꞌana noxou. 16 Anu ulivulixaꞌa ta mitema tavuꞌalo ne Isilaeli ilivu ilai noxou Tila, anu Lataua noxiꞌa. 17 ✡Anu unoꞌu uleenu mo xavi noxou Eliasi sou uuli noxou Tila. Anu upitaneꞌi ta mamiꞌa iloꞌa ta ꞌiliꞌa sou oponeꞌi upita vilesisi mo uxiuneꞌi aneꞌi ane ilomuxu vaikala noxou Lataua uasi mo ixali ta mitema sou ilavu no anu voteꞌi ane mulapusi. Anu ulalaaxineꞌi ta mitema sou ixomaiou Tila.”

18 Sakalia mulomusou vaikala ane ne, la mutaliꞌisou angelo aloxo ꞌo, “Loxovaa, la sou eni alavu manina lexe nini nevikala ne manina? Xo nexi noxie semaxeni ne, ta aululu manina.”

19 ✡La angelo mukolinu vaikalau aloxo ꞌo, “Eni ualasilo lexe Xavulieli. Eni atutulu no talaxu Lataua. La sou Anu mupalusilo eneꞌe noxine sou avikala no anu aꞌalo laixe ane ne. 20 Ioxe, nini nalomu. Usoko vaimomo ꞌo mo ulai utalo no voxo ane mii ane eni evikalanenixu ꞌo uxali manina, la nini anaxene utomu mo navikala uasi. Xo nini namuxaxu taneni no anu vaikala noxilo ane uxali manina no voxo ane Lataua musosovosou ne uasi.”

21 Ta mitema mixomaiou Sakalia maxuveeni, la sou aneꞌi taneꞌi lili lexe tavaꞌu loxovaa la sou anu muxolu maxuveeni no nano no tani tila noxou Lataua ne. 22 Xe iliꞌi, la anu muuatu no ale, ia umomomo sou uvikalaneꞌi uasi. La sou aneꞌi milavu lexe anu mumaisou mii vile loxo aipiepiena no nano no taasou lalotu tatila noxou Lataua. Anu mutovotovolaꞌi no avolusi, ia uvikala uasi.

23 Xe iliꞌi no mine voxo sou xaixai noxou mukalu, la mulivu mulai no tani. 24 Ioxe, iliꞌi la semau Elisaveti opoone. La ane mixolixu no nano no tani mumomomo loxo soꞌio taꞌuve. 25 La mivikala lexe, “Tila tanuxo, la sou muꞌoxonu mii ano ꞌo muxali noxilo sou ukalusou maela noxilo no ieꞌi ta mitema.”

Vaikala Lamana sou Xali Noxou Iesu

26 Soꞌio taꞌuve mukalu xe muxatele vile sou muxali, la Lataua mupalusou angelo vile ualasou lexe Xavulieli muxali muneꞌe no tuala vile ne Naseleti no xalee lia tila ne Xalilaia. 27 ✡Anu muxali noxie sema vile vuanga misosovosie lexe iꞌuluxu itema vile ualasou lexe Iosepu, anu Deviti ꞌilusunu vile. Sema ne, ualasie lexe Malia. 28 Ioxe, angelo muxali noxie, la muvikala aloxo ꞌo, “Opoo seꞌisisi uxolu noxine. Lataua uxolu noxine mo ualusine.”

29 Ia Malia milomusou vaikala ane ne, la tane lili no anu, la mixavutala lexe vaikala ano ꞌo laaxu a loxovaa? 30-31 ✡La anu muvikalane aloxo ꞌo, “Naꞌume uasi. Lataua tanuxene nini Malia. Nalomu, ulai iliꞌi la nini oponeni la navoꞌonu ꞌiline vile mulu. La namoxoꞌu ualasou lexe Iesu. 32 ✡Ulai, la anu uxali tila mo aneꞌi ilemolu lexe Lataua teitexi manina ꞌOlu. La Lataua Tila usosovosou Iesu sou unoꞌu tanixu ꞌilusunu Deviti. 33 Anu sou usaxilaꞌa Iakovo ta xaixasou iloꞌa ta ꞌiluꞌilusunu utotomu mo saxisaxilaꞌu noxou ne umomomo sou ukalu uasi.”

34 Ia Malia mivikalanu angelo aloxo ꞌo, “Mii ane ꞌo uxali a loxovaa? Xo eni vuanga sio.”

35 Angelo mukoline aloxo ꞌo, “Ulai, la Uleenu Tavuna uxolu noxine, la sou Lataua teitexi manina xaviinu uvausine. Aloxo ne, la sou nini navoꞌonu ꞌiline ne. La imoxoꞌu lexe itema vile malemalenge noxou Lataua mo Anu Lataua ꞌOlu. 36 Namaisie tulaneni Elisaveti. Ane aululu mukalu, ia ane ꞌa opoone sou ivoꞌonu ꞌilie mulu. Tei, la ane sema sou ipalaa uasi, ia soꞌioxe sou opoone a muxatele vile sou. 37 ✡Mii vile pekiaꞌu sou Lataua uꞌoxonu uasi.”

38 Malia mivikalanu aloxo ꞌo, “Mii ane nini nelemolu ne, uxali noxilosi aloxo ne. Xo eni asema sou xaixai noxou Tilasi.” Angelo muvikalane aloxo ne mukalu, la muꞌumesie sou mulai.

Malia Mixixaosie Elisaveti

39 No voxo ane ne, la Malia miavuti sou mipalea minuna no xalee lia tila ne Iutaia, la sou mitelo no tuala vile muxolu no laxaꞌilu vile. 40 Mixali la miꞌunalai no tani noxou Sakalia sou misexelaxe Elisaveti. 41 No mine Elisaveti milomusou vaikala sou sexela noxie Malia, la keakea no nano no opoone ne, musuxulae. Xe Uleenu Tavuna muꞌanaꞌana noxie Elisaveti. 42 La ane miꞌava tatila aloxo ꞌo, “Lataua mualusine laixe manina no taiineꞌi ta sema tavuꞌalo, mo mualusou ꞌiline e muxolu no oponeni ne kalumo. 43 Eni asema maꞌi, la sou Tila noxilo nenu mineꞌe noxilo ꞌo? 44 Eni elomusou sexela noxine, la alaxu vilesisi ꞌo, la keakea muxolu no opoleli ꞌo, musuxulae sou muꞌosa. 45 Lataua ualusie ane ane mimulaxu tane no anu vaikala noxou lexe mimii e mulemolu ne, anu uꞌoxonu maninasou.”

Lexeie Malia

46 ✡Xe Malia miavuti, la milexe aloxo ꞌo,

“Eni taleli uꞌitinu Tila ualasou,

47 mo eni uleeleli kalumo uꞌosasou Lataua,

Anu itema sou pamauli noxilo.

48 Xo Anu muxavutalaleli eni asema sou xaixai noxou vitanisi,

la sou ulai iliꞌi, la ta mitema tavuꞌalo ilemelo lexe Lataua mualusilo.

49 Xo itema sou xavi muꞌoxonu mimii tatila manina muneꞌe noxilo.

Anusi anu Lataua malemalenga manina mo anu loxo itema uasi.

50 ✡Anu ualaunaxaꞌa aneꞌi ane itoxonu utotomu mo kaluxu uasi.

51 ✡Anu muꞌoxonu xaixai xaviinu no avolu,

mo mukusaiꞌa aneꞌi ane meꞌa iꞌitinu ualasiꞌa no anu xavutalaiꞌasi.

52 ✡Anu muluꞌelainixiꞌa ta motu sou isaxilaꞌa ta mitema

mo muxexeneꞌi no puloulousiꞌa,

ia mutelailixaꞌa aneꞌi ta mitema vitanisi la mitelai minoꞌu tanixaꞌa.

53 ✡Anu muꞌanaꞌanalixaꞌa aneꞌi ane misolixaꞌa no anu laꞌilali laixe,

ia mukusaiꞌa aneꞌi ane lavulutiiꞌa tavuꞌalo ne, milai viatanisi.

54 ✡Anu musuꞌulineꞌi ta mitema sou xaixai noxou, ta Isilaeli.

Anu muxavutalaneꞌi mo tanuxaꞌa.

55 ✡Aloxo Anu muxavutalanu vaikala e Anu mulemolu noxou Avalaamu

iloꞌa ta xaixasou mo ta ꞌiluꞌilusunu xe ta xaixasiꞌa ta maminge iloꞌa ta ꞌiluꞌilusuneꞌi ta maminge.”

56 Malia ilee Elisaveti mixoxolu mumomomo loxo soꞌio tatalu, xe iliꞌi la ane milivu milai no tualasie.

Elisaveti Mivoꞌonu Ioanesi

57 Voxo sou Elisaveti ivoꞌo muxali, la mivoꞌo ꞌilie mulu vile. 58 Xe ta tema tualasie iloꞌa ta minemine milomusie xo mimaisie lexe Tila tanuxe musuku, la aneꞌi iloꞌa miꞌosa.

59 ✡Xe mivoꞌo mo voxo muxatele tatalu sou, la aneꞌi mineꞌe mipita sou xooxoo mungaasou xe sou lexe imoxou ualasou sou momu Sakalia. 60 Ia nenu mivikala aloxo ꞌo, “Uasi! Tamoxou ualasou lexe Ioanesi.”

61 Ia aneꞌi mivikalane aloxo ꞌo, “Ta minemineni vile ualasou loxo ne uasi.” 62 La sou aneꞌi milosi no avoꞌa mulai noxou momu lexe umoxoꞌu ꞌolu ualasou a loxovaa? 63 Anu mutovolaꞌi sou lexe inoꞌu ovu alelaxu sou ukaukavu no anu. Xe milosou mukalu, la anu mukaukavu no anu aloxo ꞌo, “Ngamoxoꞌu ualasou lexe Ioanesi.” Aneꞌi mimaisou uala ane ne, la mikuluke manina. 64 Alaxu vilesisi ꞌo, la Sakalia anaxu e mutomu ne, utomu la ua. Anu umomomo sou uvikala la. La sou muvikala sou muꞌitinu Lataua ualasou. 65 Xe ta tema tualasou mimaisou aloxo ne, la mimamaꞌu misevile. La sou aꞌalosou mimii latala e muxali ne, mulutu la mulai no tuatuala e no anu laxalaxaꞌilu sie Iutaia. 66 Ta mitema latala milomusou aꞌalo ane ne, la aneꞌi taneꞌi lili no anu. La sou mivikala lexe iliꞌi, la anu keakea ne uxali itema a loxovaa? Xo milavu lexe xavi noxou Tila a muxolu noxou ne.

Lexeu Sakalia

67 Ioxe, Uleenu Tavuna muꞌanaꞌana noxou Ioanesi momu e Sakalia ne, la sou anu muvikala mupalomatana aloxo ꞌo,

68 ✡ “Nenge taꞌitinu Tila ualasou, anu Lataua noxinge nenge ta Isilaeli,

xo Anu muneꞌe sou mulivulixaꞌa ta mitema noxou.

69 ✡No nano no taiineꞌi ta xaixasou iloꞌa ta ꞌiluꞌilusunu,

Deviti e itema sou xaixai noxou.

la Anu muxalixu itema vile xaviinu sou upamaulinenge.

70 Aloxo, tatei la Anu mulemo noxiꞌa ta mitema sou palomatana noxou e

Anu musosovosiꞌa.

71 ✡Anu upamaulinenge no avoꞌa ta uluamenge

mo no avoꞌa ta mitema ukalusi ane imasaxainge uasi.

72 ✡Anu tanuxaꞌa ta xaixasinge iloꞌa ta ꞌiluꞌilusunenge,

mo muxavutalanu vaikala noxou e Anu musakiinu tatei,

73 ✡noxou Avalaamu, Anu ꞌilusunenge.

74 Sou lexe Anu upamaulinenge no avoꞌa ta uluamenge

mo sou lexe nenge tamamaꞌu mo taꞌume uasi,

75 ✡ia nenge taxaxai noxou, la nenge taxolu vaꞌaxu no anu ꞌiliꞌilixo masumasua

mo tamulinu ꞌilixo ane mulapu no voxovoxo utotomu.

76 ✡Mo nini ꞌalixeni ꞌo, ulai iliꞌi la imoxoine lexe nini itema sou palomatana noxou Lataua teitexi manina.

Xo nini naulaxunu Tila sou namomosou voteꞌisou,

77 ✡mo sou ta mitema noxou ilavusou lexe

Anu uxiu tumalou ꞌiliꞌilixo masumasua noxiꞌa mo upamaulineꞌi

78 ✡xo Anu tanuxaꞌa musuku. Mo no anu alauna noxou,

la Anu usovanu lamana sou tuala teitexi uneꞌe noxinge,

79 sou ukaasiꞌa ta mitema aneꞌi e mixolu no isivoxo

mo mimuamuaꞌi no voteꞌi ane masua sou soli uxalisiꞌa no anu,

mo sou upamuxanenge no anu voteꞌi sou opo seꞌisisi.”

80 Iliꞌi, xe molomolo ne muxali tila, la uleenu tavuna muꞌanaꞌana noxou. La mulai muxolu no xalee lia vitanisi, mutalo no voxo sou anu mupalaꞌa no ieꞌi ta Isilaeli.