UOLI VOLOXU ANE PAULO MUKAUKAVU MULAI NOXIꞌA
TA ROMU
Vaikala lamana
Paulo mukaukavunu uoli voloxu ane ꞌo mulai noxiꞌa ta temanu lalotu ne Romu, xo anu mumasaxa lexe uvikalaneꞌi lamana lexe anu mumasaxa lexe ulai umaisiꞌa. Anu mumasaxa lexe ulai uxolu mo iloꞌa ixaxai sevile mo mumasaxa lexe usuꞌuli sevile xe ukalu la sou anu ulai uaꞌaloxu aꞌalo laixe no xalee lia tila ne Sipeini. No anu uoli voloxu noxou Paulo, la anu muvikala lamana no anu aꞌalo laixe sou Iesu Kalisito mo no anu ꞌilixo maꞌia ta mitema ane noxou Kalisito imulinu no anu maulixaꞌa.
Tei la Paulo musovanu aso laixe noxou mulai noxiꞌa ta temanu lalotu noxou Kalisito ne Romu, mo muvikalaneꞌi lamana lexe anu ukilakasiꞌa utotomu. Xe ilꞌi la anu mupalaꞌalixu tavaꞌu a loxovaa la sou anu mukaukauvunu uoli voloxu ne. Tavaꞌu aloxo, “No anu voteꞌi sou tamuxaxu tanengesi la sou Lataua umoxoꞌinge lexe nenge ta mitema mulapu.” (1:17) Vaikala kisou sou aꞌalo noxou Paulo ane.
Paulo musolonu vaivaikala noxou sou mulamanalixu vaikala kisou ne la aloxo ꞌo. Ta mitema tavuꞌalo iouiou no lialia ꞌo iloꞌa ta Iutaia mo ta Xiliki ne aneꞌi iouvilesisi. Aneꞌi tavuꞌalo ne, aneꞌi ta mitema sou susu mukalusi. Aloxo ne la sou Paulo mulamanalixu lexe, ta mitema ane mimuxaxu taneꞌi noxou Iesu Kalisito la Lataua ulivulixaꞌa la iloꞌa Lataua ixolu xe ixali Iesu ta vimovimou. Mo lexe Lataua ulivulixu itema vile la itema ne maulixu uxiu uxali alavua. La ilou Lataua ixolu xe Uleenu Tavuna uꞌanaꞌana noxou. Aloxo ne la sou xavi no anu susu xe soli umomomo sou usaxilaꞌu xe utaloxolixu la uasi. No anu mautunu 5-8, la Paulo mululusou laaxu lapuloto noxou Lataua xe xaviinu Uleenu Tavuna no anu itema maulixu no mine umuxaxu tanu noxou Iesu. No anu mautunu 9-11, la Paulo mupalaꞌalixu tuꞌumaxu noxou no anu masaxa noxou Lataua noxiꞌa aneꞌi ta Iutaia xe ta mitema ane ta Iutaia uasi. Paulo mukalusou vaivaikala noxou la muvikala lexe tei la Lataua musosovosiꞌa ta Iutaia ne lexe anu ta naꞌu muꞌisalili, ia aneꞌi meꞌa la, la itongonu mii maꞌia e Lataua umasaxa lexe uꞌoxonu noxiꞌa ne uasi, la mixiunu tumaliꞌa noxou Iesu. Aneꞌi miꞌoxonu aloxo ne la ta mitema tavuꞌalo vaꞌavaꞌaxu mimuxaxu taneꞌi noxou Iesu. Xavutala talume noxou Lataua lexe ta Iutaia iꞌoxonu aloxo ne, mo sou no anu xaixai noxou Iesusi, la Lataua ulivulixaꞌa ta mitema ane vaꞌavaꞌaxu. La sou Paulo muꞌoxu lexe anu susu noxiꞌa ta Iutaia xo mixiu tumaliꞌa noxou Iesu la sou Lataua mualaunasiꞌa leviani. Ia anu muxavutala lexe male iliꞌi la aneꞌi ta Iutaia ilivu ineꞌe ixali ta mitema noxou Iesu la.
Xe kaluxusou vaivaikala noxou la anu muvikala no anu ꞌilixo maꞌia ta mitema noxou Kalisito imulinu no anu maulixaꞌa. Anu muvivikala tavuꞌalo no anu ꞌilixo sou tamasaxainge ngatongatoꞌo. Xe muvikala no anu ꞌilixo sou taxolu no laaxaꞌa mo talomuxaꞌa ta mitema e ilaxunenge no anu xoluxolunenge xe muvikala kalumo no anu ꞌilixo sou tasuꞌulineꞌi ta menexinge. Xe kaluxusou vaivaikala noxou manina la mukalusou no anu vaikala sou sexela xe ꞌosaꞌila.
Aꞌalo muai no nano aloxo ꞌo
Vaikala lamana xe vaikala kisou 1:1-17
Laꞌia noxou Lataua mulai noxiꞌa ta mitema sou susu 1:18–3:20
Voteꞌi maꞌia ta mitema iꞌoxonu la sou Lataua umoxoꞌa lexe aneꞌi ta mitema mulapu 3:21–5:21
Mauli alavua taxalisou noxou Iesusi 6–8
Ta Isilaeli mixiunu tumaliꞌa noxou Iesu 9–11
ꞌIliꞌilixo noxiꞌa ta mitema noxou Kalisito 12:1–15:13
Vaikala kaluxusou ilou vaikala sou sexela 15:14–16:27
1
1 ✡ Apo 9:15Eni Paulo, amitema sou xaixai noxou Kalisito Iesu. Anu musosovosilo mo muꞌavalilo, sou exali aposeli noxou, sou aꞌaloxu aꞌalo laixe noxou Lataua. 2 ✡ Rom 16:25-26Aꞌalo laixe ne, Lataua muvikalaneꞌi ta mitema sou palomatana tei la sou aneꞌi mikaukavunu muai no nano no anu Lavuku Tavuna teinu noxou Lataua. 3 Anu aꞌalo laixe ne sou ꞌOlu Iesu, anu muxali loxo itema, xo anu mutuꞌu ovuxu Deviti. 4 Xe no mine Lataua mutulusou no anu soli, la Uleenu Tavuna noxou Lataua mulosienge lexe anu Lataua ꞌOlu ne xaviinu musuku. Anu Iesu Kalisito Tila noxinge. 5 ✡ Apo 26:16-18; Xal 2:7-9Mo noxousi la Lataua mualaunasixe, mo no anu ualasou, la sou eni exali aposeli noxou. Anu muꞌoxonu aloxo ne mo sou noxixesi la sou aneꞌi ane ta Iutaia uasi imuxaxu taneꞌi noxou Iesu, xe imulinu vaivaikala noxou. 6 Mo ngingi kalumo ngelomusou ꞌava noxou Iesu Kalisito xe ngemulinu vaivaikala noxou la ngingi kalumo ngexali ta mitema seꞌi noxou ane.
7 ✡ Iti 6:25-26La sou eni ekaukavunu vaivaikala ane ꞌo ulai noxinge ngingi tavuꞌalo e Lataua mumasaxainge misevile mo muꞌavalinge la ngexali ta mitema noxou ne Romu ukalusi. Eni akilaka lexe alauna mo opo seꞌisisi noxou Lataua Maminge mo Tila Iesu Kalisito uxolu noxinge.
Paulo Umasaxa Lexe Uxaxasiꞌa ta Romu
8 Tei la eni alemolu laixe noxou Lataua noxilo no ualasou Iesu Kalisito noxinge ukalusi, xo ta mitema tavuꞌalo no xalexalee tuatuala mukalusi ꞌo milomusou aꞌalosinge lexe ngingi ngemuxaxu tangengi noxou Iesu Kalisito. 9 Xo Lataua e eni aꞌoxonu xaixai noxou sou aꞌaloxu aꞌalo laixe sou ꞌOlu mulavusou taleli mukalusi. Anusi mulavusou lexe eni axavutalangengi utotomu. 10 ✡ Apo 19:21; Rom 15:23La sou no anu lakilaka noxilo. Mo utotomu la eni akilaka aloxo ꞌo, lexe no anu masaxa noxou la anu molu uꞌoxonu voteꞌisilo ukisi, la sou eni aneꞌe noxinge.
11 Xo eni emasaxa lexe amaisinge manina, la sou aalusinge no anu alualu moseꞌi no anu Uleenu Tavuna sou uxolu noxinge mo uꞌoxonu pekiaꞌinge. 12 Ia xavutala noxilo aloxo, eni emasaxa lexe muxamuxaxu tangengi noxinge usuꞌulileli xe eni noxilo usuꞌulingengi aloxo ne la sou anu usuꞌulinenge nengeꞌa ngatongatoꞌo. 13 ✡ Apo 19:21Mo ta vivilo, eni emasaxa lexe ngalavu laixe lexe eni alaxu tapiena exavutala sou aneꞌe noxinge, ia mimii tavuꞌalo uꞌauꞌausilo la alai noxinge uasi mo a muxali vaimomo ꞌo. Eni amasaxa lexe aneꞌe asuꞌulingengi mo sou ngaxali ta mitema noxou Iesu Kalisito loxo aneꞌi ta mitema aneꞌi ane ta Iutaia uasi no tuatuala moseꞌi ꞌo.
14 Xo eni xaixai noxilo sou asuꞌulineꞌi ta Xiliki xe aneꞌi ane ta Xiliki uasi mo aneꞌi ane milavu xe aneꞌi ane ilavu uasi kalumo. 15 Aloxo ne la sou eni opoleli muavuti lexe aneꞌe noxinge ne Romu mo aꞌalomengi no anu aꞌalo laixe sou Iesu Kalisito kalumo.
Xavi sou Aꞌalo Laixe Noxou Iesu
16 ✡ Mak 8:38; Apo 13:46; 1Ko 1:18-24Eni amaela sou aꞌaloxu aꞌalo laixe sou Iesu Kalisito uasi, xo anu xavi noxou Lataua ane, mo anu xaviinu sou ulivulixaꞌa ta mitema e mimuxaxu taneꞌi. Aneꞌi ta Iutaia tei xe ukalu la sou aneꞌi ane ta Iutaia uasi kalumo. 17 ✡ Ava 2:4; Rom 3:21-22Xo no anu aꞌalo laixe ne la Lataua mulosienge no anu ꞌilixo lailaixe noxou e Anu muxali lamana noxiꞌa ta mitema. Lexe nenge tamuxaxu tanenge no ꞌa soko ulai utalo no ꞌa kaluxusou la sou anu umoxoꞌinge lexe nenge ta mitema telapu no iou. Aloxo vaikala mikaukavunu muai no nano no anu Lavuku Tavuna teinu noxou Lataua muvikala aloxo ꞌo. “Ta mitema ane imuxaxu taneꞌi, la Lataua umoxoꞌa lexe aneꞌi ta mitema milapu mo aneꞌi ixolu imauli.”
Laꞌia Noxou Lataua Mulai Noxiꞌa ta Mitema sou Susu.
18 Xo Lataua e muxolu teitexi no opo loxotolo ne laꞌia noxou muxali lamana noxiꞌa ta mitema mukalusi e mixiunu tumaliꞌa noxou xe iꞌoxonu ꞌiliꞌilixo masumasua. No anu ꞌiliꞌilixo masumasua noxiꞌa ne la mutatusou vaikala manina. 19 ✡ Apo 14:15-17; 17:24-28La sou ta mitema ne milavusou ꞌiliꞌilixo tavuꞌalo noxou Lataua ne xo Anu molu mulamanalixu noxiꞌa. 20 ✡ Iop 12:7-9; Lex 19:1Ioxe, musoko no mine Lataua mukoinu mimii latala mukalusi mo muneꞌe muxali vaimomo ꞌo, la ta mitema mimaisou mimii tavuꞌalo e Lataua muꞌoxonu ne. No anu mimii nesi la ta mitema mimaisou ꞌiliꞌilixo talume seꞌi noxou Lataua mo mimaisou xaviinu kaluxu uasi mo aneꞌi milavusou Lataua lexe Anu a loxovaa. La sou itema vile umomomo sou uvikala lexe eni alavusou Lataua uasi, uasi, xo mimii tavuꞌalo ne muai lamana no ieꞌi ta mitema mo milavusou lexe Lataua mukoinu mimii latala mukalusi ne. 21 ✡ Ep 4:17-18Aloxo ne la sou aneꞌi milavusou Lataua manina, io aneꞌi iꞌitinu ualasou mo ilemolu laixe noxou loxo anu Lataua uasi. Ia xavutalaiꞌa mo taneꞌi ne isivoxo mutomu la iꞌoxovulaulausi loxo ilavu uasi. 22 ✡ Iel 10:14; 1Ko 1:20La sou aneꞌi itooxaꞌa la iꞌoxo lexe aneꞌi ta mitema sou lavulavu, ia uasi, aneꞌi mixovulaulau mukalu. 23 ✡ Lap 4:15-19; Lex 106:20Mo mixiunu tumaliꞌa noxou Lataua e umauli kaluxu uasi la ilotu noxou la uasi, ia ilotu noxiꞌa ta mimii ane aneꞌi meꞌa mipuineꞌi e ixolu maxuveeni uasi loxo itema mo ta ngiala mo ta mimii iouiou no lialia xe ta sinana veveeni.
24 La sou ta mitema mixiunu tumaliꞌa noxou Lataua aloxo ne la Lataua muxiunu tumalou noxiꞌa la aneꞌi mimulinu masaxa masua sou vasimeꞌa, sou iꞌoxonu masuanu vasimeꞌa no anu ꞌiliꞌilixo masumasua sou voteꞌi. 25 Mo aneꞌi ne mixiunu vaikala manina noxou Lataua la muxali loxo vaikala kalavoi, mo ilotu noxou Lataua e mukoinu mimii latala mukalusi ne uasi, ia ilotu noxiꞌa ta mimii e anu mukoineꞌi. Latauasi anu tavaꞌu mimii latala mukalusi la sou laixe lexe nenge ta mitema taꞌitinu ualasou utotomu mo kaluxu uasi. Manina.
26 Xo aneꞌi miꞌoxonu aloxo ne, la Lataua mutautaloneꞌi mixolu mimulinu masaxa masumasua sou vasimeꞌa ne. Aloxo ne la ta semasiꞌa imulinu ꞌilixo laixe sou taulaꞌi la uasi, aneꞌi meꞌa ixiuiꞌa la, la sou iꞌoxonu ꞌilixo sou voteꞌi. 27 ✡ Liv 18:22; 20:13; 1Ko 6:9Mo anu iouvilesisi aloxo ne noxiꞌa ta mulu kalumo, imulinu ꞌilixo laixe sou taulaꞌi la uasi, ia oponeꞌi uavuti loxo navu sou ixiuiꞌa ta menexiꞌa la, la sou iꞌoxonu ꞌilixo sou voteꞌi. Ta mulu ane iꞌoxonu ꞌiliꞌilixo sou maela noxiꞌa ta menexiꞌa ne aneꞌi meꞌa minoꞌu lakolisou ꞌilixo masua noxiꞌa ne.
28 Aloxo ne la sou aneꞌi ixavutala sou ixolu no laaxu Lataua uasi, la anu muꞌitaloneꞌi milai mimulinu xavutala masumasua noxiꞌa sou iꞌoxoꞌoxonu ꞌiliꞌilixo masumasua e lexe iꞌoxoꞌoxonu uasi ne. 29 La maulixaꞌa ne muꞌanaꞌana no anu ꞌiliꞌilixo masumasua, la iꞌoxoꞌoxonu ꞌiliꞌilixo masumasua aloxo ꞌo, imulinu ꞌilixo laixe uasi, mo iisuxu ta menexiꞌa miꞌamiꞌa mo iꞌoxonu loloxaꞌa ta menexiꞌa la inoꞌu miꞌamiꞌa. Mo oponeꞌi masuaiꞌa ta menexiꞌa e miꞌamiꞌa tavuꞌalo mo ilavilavi ilou iꞌotoꞌoto xe xavutala sou isaxilaꞌu mii vile uasi imamumamulonusi. Xo aneꞌi ta mitema sou munumunu. 30 ꞌIliꞌilixo ne muꞌanaꞌana noxiꞌa mo imunumunuxaꞌa ngatongatoꞌo mo ikalavoisiꞌa ta mitema sou iꞌoxonu ualasiꞌa masuasi. Mo mixali ta uluau Lataua, mo ipulipulinu anaxaꞌa iouiou mo itootooxaꞌa xe iꞌitiꞌitinu ualasiꞌasi. Mo ixoxolu la ixavutala voteꞌi moseꞌi sou ꞌiliꞌilixo masumasua alaalavua la sou iꞌoxonu, la ilomuxaꞌa ta mamiꞌa iloꞌa ta neniꞌa uasi. 31 Mo xavutala vile laixe uxolu noxiꞌa la uasi, mo ivikala lexe iꞌoxonu mii vile la imulinu vaikalaiꞌa mo iꞌoxonu uasi, xe iꞌoxonu laixe noxiꞌa ta mitema uasi iꞌoxoo masuaneꞌisi. 32 Aneꞌi milavusou lapuloto lailaixe noxou Lataua e, lexe ta mitema ane iꞌoxonu ꞌiliꞌilixo aloxo ne, laixe lexe iveꞌa isoisoli. Xo aneꞌi isolonu sou iꞌoxoꞌoxonu ꞌiliꞌlixonesi uasi, aneꞌi iꞌitinu ualasiꞌa aneꞌi ane iꞌoxoꞌoxonu ꞌiliꞌilixo ne kalumo.