Kaukavu Vile Ane Ionesi Mukaukavu Mulai Noxiꞌa Ta Mitema Noxou Lataua Vaikala Sou Mauli.
1.
Mii ane muxolu tatei no mine Lataua ukoinu mimii uao ne, nexi telomusou mo temaisou no iexi mo temaisou laixe manina mo tekasou. Anu vaikala sou mauli ane nexi taaꞌaloxu ꞌo. 
Mauli ane ne muxali, la nexi temaisou. La sou nexi tavikala lamana no anu ꞌo, xe taaꞌaloxu mauli ane ukalu uasi ulai noxinge. Mauli ane kaluxu uasi ne, Anu ilou Momu Lataua mixolu mipita, ia Anu muxali noxixe. 
Tavaꞌu xo nexi taaꞌalomengixu mii ane nexi temaisou mo telomusou ne, nexi temasaxa lexe nenge nengeꞌa taxali vilesisi. Taxali vilesisi, la nenge tapita noxou Maminge ilou ꞌOlu, Iesu Kalisito. 
Nexi tekaukavunu vaivaikala ane ꞌo, sou lexe nenge taxali vilesisi, la nexi taꞌosa manina. 
Lataua anu lamana, ia ꞌilixo sou isivoxo vile uxolu noxou uasisi manina. Anu aꞌalo ane ne, nexi telo-musou noxou Iesu Kalisito, la sou nexi taaꞌalomengixu. 
Lexe nenge tavikala lamana lexe nenge noxou Lataua texali vilesisi, ia nenge tamuli-mulinu ꞌiliꞌilixo sou isivoxo, la nenge tekalavoi mo tamulinu vaikala manina noxou Lataua uasi. 
Ia lexe nenge tamulimulinu ꞌiliꞌilixo sou lamana loxo anu umulimulinu, la nenge nengeꞌa taxolu tapita mo sialuxu ꞌOlu Iesu munixisinge la sou nenge noxou Lataua taxali laixe no anu ꞌilixo masumasua ukalusi. 
Lexe nenge tavikala lexe nenge taꞌoxonu ꞌilixo vile masua uasi, la nenge xavutalamenge ukalavoinenge, mo vaikala manina noxou Lataua uxolu noxinge uasi. 
Ia lexe nenge tapalaꞌalixu ꞌiliꞌilixo masumasua noxinge, la Lataua uxiu tumalouu ꞌiliꞌilixo ne, mo ukalipalanenge no anu ꞌiliꞌilixo masumasua, xo Lataua uvikala lexe uꞌoxonu mii maꞌia, la umulinu vaikala noxou, la uꞌoxonu mii laixesi. 
Lexe nenge tavikala lexe nenge taꞌoxonu ꞌiliꞌilixo masumasua uasi, la nenge tavikala lexe Lataua anu itema sou kalavoi. Mo vaikala manina noxou Lataua uxolu no nano no maulinenge uasi.