15
Moselu Inma Inkanytja
1 Ka Moselu tjana Israelkunu tjuṯangku kuḻu pukuḻpa mulatu inma inkara Godanya waḻkuningi, nyanga alatji,
“Ngayulu Mayatja Godanya inkara mirawaṉinyi, panya wiṟuṟalanya wankaṟunu Itjipanya nguraṟa tjuṯa wiyaṟa.
Paluṟu nyanytju tjuṯa uṟungka unngu tjunyinu,
wati nyanytjungka tatilpai tjuṯa kuḻu.
2 Panya Mayatja Godalu kutjungku ngayunya witulyankupai.
Nyara paluṟu kutjungkuṉi wankaṟunu.
Nyara paluṟu ngayuku God,
kaṉa ngayulu palunya mirawaṉinyi.
Nyara paluṟu ngayuku mamaku God,
kaṉa inma inkara palunya puḻkaṟa waḻkulku, witulya puḻka mulapa.
3 Panya paluṟu warmaḻa puḻka mulapa para-ngaṟapai, ini Mayatja Godanya.
4 Paluṟu wiyaṉu warmaḻa Itjipanya nguraṟa tjuṯa uṟungka unngu tjunyiṟa tjingka tjuṯa kuḻu.
Kaya warmaḻa tjuṯaku mayatja tjuṯa ngakaṟa ilungu uṟu panya ini Tjitin-tjitinta.
5 Ka panya uṟu puḻkangku tjananya tjutuṟa patinu uwankara,
kaya apu puṟunypa mantakutu ukalingu uṟu unngu ngaṯi puḻkakutu.
6 Mayatja God, nyuntu witulya puḻkangku palyalpai maṟa wakungku,
munu nyuntu aṉangu mirpaṉtju tjuṯa kaṯantaṟa muṯun-muṯunmaṟa wiyalpai.
7 Nyuntu Mayatja witulya puḻka mulapa,
munu nyuntumpa mirpaṉtju tjuṯa nyuntu wiyalpai alatjiṯu.
Nyuntu panya tjanampa puḻkaṟa mirpaṉarira tjananya uwankara alatjiṯu wiyaṉu.
Nyuntu panya waṟu puṟunypa,
panya waṟungku ukaṟi kampara wiyalpai,
pala palu puṟunytju nyuntu tjananya wiyaṉu.
8 Nyuntu panya uṟu puuṟa tjaraṟa iwaranu,
ka panya uṟu puḻkanya tali puṟunypa wati-ngaringi.
Ka ngaṯi panya tartjaringu munu iwara puṟunypalta ngaṟangi.
9 Kaya Itjipanya nguraṟa tjuṯangku wangkangu,
‘Wanyula Israelkunu tjuṯa waṯaparaṟa witila,
munula tjana kanyintja uwankara mantjiṟa tjaraṟa kutjungku kutjungku ngurakutu kati.
Walawalangkula tjuḻa waṟa mantjiṟa tjananya waṯaparaṟa pungama,
munula mantjiṟa kati tjana kanyintja uwankara.’
Alatjiya warmaḻa tjuṯangku kaṉany-kaṉanytju wangkangi.
10 Palu Mayatja God, nyuntu uṟu panya puuṟa palunya tjananya tjutuṟa patinu Itjipanya nguraṟa tjuṯa,
kaya apu tjuṯa puṟunypa uṟu unngu mantakutu ukalingkula ilungu.
11 Mayatja God, nyuntunya puṟunypa god kutjupa nyinanytja wiyaṯu.
Nyuntu kutjun Mayatja Puḻkanya
munu miḻmiḻpa alatjiṯu wiṟu mulapa.
Nyuntu kutjupa kutjupa wiṟu tjuṯa witulya puḻkangku palyalpai
aṉangu tjuṯa nyakula urulyaraṟa nguḻuringkunytjaku nyuntumpa.
12 Nyuntu maṟa waku katuṉu,
ka tjananya mantangku kuuḻtjanu nganampa mirpaṉtju tjuṯa.
13 Nyuntu panya mukulya puḻkangku kalkuṉu Israelkunu tjuṯa wankaṟunkunytjikitjangku,
munu panyan mulapa wankaṟu tjananya katiṟinanyi.
Nyuntu witulya puḻkangku tjananya katiṟinkuku nyuntumpa ngurakutu, ngura panya miḻmiḻpakutu.
14 Kaya aṉangu ngura kutjupitja tjuṯangku kulilku.
Munuya kuliṟa puḻkaṟa nguḻuringkula tjititingkuku.
Ka aṉangu Pilitjiyanya nguraṟa tjuṯa puḻkaṟa alatjiṯu nguḻuringkuku.
15 Munu panya Iitamakunu tjuṯaku mayatja tjuṯangku puṯu kuli-kuliṟa puḻkaṟa nguḻuringkuku.
Munu Mawapaku wati puḻka tjuṯa kuḻu puḻkaṟa nguḻuringkula tjititingkuku.
Munu panya Kainannga nguraṟa tjuṯa kuḻu nguḻuringkula uparingkuku.
16 Uwa, mulapa paluṟu tjana uwankara puḻkaṟa nguḻuringkuku
nyuntu witulya puḻkangku palyannyangka nyakula.
Tjana tjititingkula nguḻungku pakaṟa ngaṟala nyakuku nyuntumpa aṉangu tjuṯa wati-pitjanyangka.
Panya aṉangu nyanga tjananya nyuntunku mantjiṟa katingu Itjipala puḻkaṟa waṟkarinyangka.
17 Munun tjananya ngalya-katiku ngura panya puḻi nyuntumpangka,
panya ngura pala palunyan nyuntu ngaṉmanytju kuliṟa ngurkantanu nyuntumpa ngura tjunkunytjikitjangku,
ngura pala miḻmiḻpa nyuntu tjunkunytjitja.
18 Mayatja God, nyuntu tiṯutjarangku alatjiṯu uwankara aṯunymaṟa kanyilku mayatja puḻkangku, wiyaringkunytja wiyangku alatjiṯu.”
Alatji Moselu tjana Israelkunu tjuṯangku kuḻu pukuḻpa mulatu inma inkara Godanya waḻkuningi.
Miriamalu Inma Inkanytja
19 Uwa, Israelkunu tjuṯa panya manta piḻṯingka itipiringu. Ka panya Itjipanya nguraṟa warmaḻa tjuṯa uṟungka nguṟurpa tjingkangka tatiṟa ankunyangka Mayatja Godalu uṟu maḻakungku tjunguṉu, ka tjananya tjutuṉu. 20 Ka palulanguṟu Aaronku pulampa Moseku kangkuṟungku Miriamalu tampuṟinpa mantjinu inma inkanytjikitjangku, panya maṟangku pungkula wangkatjingalpai inma inkara. Ka minyma uwankarangku palu puṟunypa tampuṟinpa tjuṯa mantjinu munuya minyma panya palunya uṟilkutu waṉaṟa inkara inmaku nyaṉpingi tampuṟinpa panya tjuṯa pungku-pungkula. 21 Ka Miriamalu tjanampa inma inkangi nyanga alatji wangkara,
“Inma inkama Mayatja Godanya mirawaṉinytjikitjangku,
panya paluṟu witulya puḻkangku tjananya pungkula wiyaṉu, Itjipanya nguraṟa tjuṯa.
Paluṟu panya nyanytju tjuṯa uṟu unngu tjarpatjunu,
wati nyanytjungka tatilpai tjuṯa kuḻu.”
Mina Kaṟur-kaṟurpa
22 Ka palulanguṟu Moselu tjananya ma-katingu Israelkunu tjuṯa, munuya uṟu panya Tjitin-tjitintanguṟu ma-paṯuringkula ma-ilytjingkaringu ngura pilangka ini Tjuula. Munuya tjiṉṯu maṉkurpa pilangka pitjaliṟa mina puṯu nguriningi. 23 Munuya ngura ini Maaṟala wirkaṟa mina nyangu. Palu mina paluṟu palya wiya kaṟur-kaṟurpa. (Ini “Maaṟanya” panya wangkanyi “kaṟur-kaṟurpa” tjanampa wangkangku.) 24 Kaya aṉangu tjuṯangku puṯu tjikiṟa Moseku mirpaṉarira wangkangu, “Mina nyaala tjikilku?”
25 Ka Moselu kuliṟa Mayatja Godala puḻkaṟa tjapiningi, “Yaaltjirikula?” Ka Mayatjalu Mosela nintinu puṉu mantangka ngarinyangka. Ka Moselu puṉu palunya mantjiṟa waṉingu minangka, ka mina panya mapalku palyaringu. Kaya tjikiningi.
Ka ngura nyara palula Godalu tjukurpa kutjupa tjanala wangkangu Israelkunu tjuṯangka. Munu paluṟu arkaṟa nyangangi tjananya wangaṉarangku kulintjaku tjukurpa paluṟu wangkanytjitja. 26 Alatji paluṟu tjanala wangkangu, “Ngayuluṉa Mayatja Puḻkanya nyurampa Godanya, munuṉa nyuranya pikatjararingkunyangka palyaṟungulpai. Ka nyura uti tjukurpa ngayuku wangaṉarangku kuliṟa palyanma munuya ngayuku iwara tiṯutjarangku waṉanma. Kaṉa nyara palulanguṟu nyuranya tjukaṟurungku kuliṟa waṉannyangka pika ungkunytja wiyangku wantiku, panya ngayulu Itjipanya nguraṟa tjuṯa pikatjaraningi, palu puṟunypaṉa nyuranya ngayula wangaṉarangku kulinnyangka alatjinkunytja wiyangku wantiku.” Alatji Godalu tjanala wangkangu palula wangaṉarangku kulintjaku.
27 Kaya ngura nyara palulanguṟu ankula ma-wirkanu ngura kutjupangka ini Ilimala. Ka ngura pala Ilimala mina tjukuḻa ngaṯi 12-ngka ngaringi. Munu puṉu waṟa tjuṯa kuḻu ngaṟangi nampa 70. Kaya Israelkunu tjuṯangku pala palula ngura tjunu minangka itingka.