1 Ka Moselu tjananya Israelkunu uwankara aḻṯira uṯuḻuṟa wangkangu, “Mayatja Godalu nganaṉanya wangkangu nyanga alatji palyantjaku. 2 Nyurampa tjiṟirpi 6 waṟkarinytjaku ngaṟanyi, palu tjiṟirpi 6 ngaṟala wiyaringkunyangka maḻangka tjiṟirpi panya 7 nyurampa miḻmiḻpa ngaṟanyi pakuwiyaringkula Mayatja Godanya kulintjaku. Ka tjinguṟu aṉangu kutjupa tjiṟirpi nyara palula tungunpungkula waṟkarinyangkaya palunya iluntanama. 3 Munuya nyurampa ngurangka waṟu tililwiyangku wantima tjiṟirpi panya pakuwiyaringkupaingka.” Alatji Moselu tjanala wangkangu Godalu wangkanytjitja.

4 Munu piṟuku tjanala wangkangu, “Mayatja Godalu nganaṉanya wangkangu nyanga alatji palyantjaku. 5 Nyura kanyintja uwankaranguṟuya tjaraṟa katima Mayatja Godanya ungkunytjikitjangku. Nyura mukuringkula munytjangku ungama nyanga palunya tjananya kanyintjatjanungku apu panya gold munu tjiilpa, munu ayana maṟu ini puṟantji. 6 Munuya mantara wiṟu ukiṟi ini flax-nguṟu palyantja, munu inyu kuka tjiipinguṟu walka panya puyul-puyulpa, purple, tjitin-tjitinpa kuḻu ungama, nanikuta inyu kuḻu. 7 Munuya tjiipi nyiṯayira miṟi kuḻu ungama tjitin-tjitinpa palyantjatjanungku, munu miṟi panya rapa puṟunypa antipina puḻkanguṟu katira ungama, munu puṉu palya ilykuwaranguṟu kuḻu ungama. 8 Munuya uwila mai ini alipanguṟu katira ungama panya lampangka tjutintjaku tiliku, munu panya kurpiṟa miḻmiḻmankunytjaku kuḻu uwila palunya katima. Munuya uwila palula tjunguntjaku kutjupa kutjupa paṉṯi wiṟu katira ungama, munuya paṉṯi panya wiṟutjara piṟuku katima panya kampara wiṟu paṉṯinytjaku. 9 Munu apu wiṟuly-wiṟulypa wiṟu kutjupa kutjupa tjuṯa walka wiṟutjara kuḻu katira ungama wati tjukurtjara puḻkangku piḻpirta tanpaṟa kanyintjaku. Uwa, nyanga palunya tjananya nyura kanyintjatjanungku katira ungama Tiinta Miḻmiḻku, munu tjukurtjaraku mantaraku kuḻu.” Alatji Moselu tjanala wangkangu Israelkunu tjuṯangka.

10-11 Munu piṟuku tjanala wangkangi Moselu, “Utiya wati wiṟu palyalpai nintipuka tjuṯangku pitjala kutjupa kutjupa uwankara palyanma panya Godalu wangkanytjitjangka. Nyanga alatjiya palyala tiinta puḻka ngura miḻmiḻpa Godala tjunguringkula kulintjaku. Ngaṉmanytjuya puṉu tjuṯa kaṯala para-muṟutjuṟa waṉantjaku munu palulanguṟu puṉu kutjupa tjuṯa kuḻu palyala kaṯakutjara para-ngaritjuṟa waṉantjaku katu kuḻu, munuya ayana kutjupa kutjupa tjuṯa kuḻu palyala puṉu tjuṯa witiṟa kanyintjaku. Munuya palulanguṟu tiinta puḻka tjiipi miṟinguṟu palyala katu ngampaḻtjunkunytjaku, munu palulanguṟu tiinta kutjupa antipina miṟi panya rapanguṟu palyala palula katuku waṉinytjaku. 12 Munuya Pakutja Kalkuntjitja puṉunguṟu palyala munuya gold-nguṟu liitangka katutja angelpa nyaḻpitjara kampa kutjara nyinanytja palyala. Munuya puṉu waṟa kutjara kampa kutjara tjura witiṟa katinytjaku, munuya mantara waṟa palyala pakutja palula kuranyu waṟaly-waṟalyngaṟala angatjuṟa kanyintjaku. 13 Munuya taipula kuḻu palyala, munu puṉu waṟa kutjara kampa kutjara tjura witiṟa katinytjaku, munuya kutjupa kutjupa tjuṯa kuḻu palyala taipulangka tjunkunytjaku, munuya mai nyuma panya Godanya ungkunytjitja kuḻu palyala taipulangka tjunkunytjaku. 14 Munuya tili tjuṯa witiṟa kanyilpai palyala munu piti tjukutjuku tjuṯa palyala puṉu palula katu uwila tjutinnyangka tili palula tjanalanguṟu kampara irnyantjaku. Nyanga paluṟu lampa tili tjuṯatjara. 15 Munu taipula kutjupa tjukutjuku nguwanpa palyala pala palula katu nyaḻpi paṉṯi wiṟutjara tjuṯa kampanytjaku, munuya puṉu waṟa kutjara taipulangka kampa kutjara tjura witiṟa katinytjaku, munuya nyaḻpi kutjupa kutjupa tjuṯanguṟu palyala paṉṯi wiṟutjara taipula palula katu kampanyangka wiṟu paṉṯintjaku. Munuya uwila wiṟu kuḻu palyala mai ini alipanguṟu aṉangungka katangka tjutiṟa miḻmiḻmankunytjaku. Munuya mantara waṟa palyala tiinta tjaangka waṟaly-waṟalyngaṟanytjaku. 16 Munuya pitjilpa puḻka taipula puṟunypa palyala palula katu kuka tiliwakaṟa Godanya ungkunytjaku. Munuya puṉu waṟa kutjara kampa kutjara tanpaṟa tjura wati tjuṯangku pitjilpa palunya katuṟa katinytjaku, munu waṟika puṟunypa puṉu tjuṯa ayananguṟu palyaṟa ngaritjura pitjilpa katu palula tjanala kuka tiliwakantjikitjangku. Munuya ayananguṟu piti puḻka maṉatjara palyala wati tjukurtjara tjuṯangku mina tjutiṟa paltjintjaku. 17 Munuya piintji puḻka palyala tiinta puḻkangka para-ngaṟala arintankunytjaku. Munuya mantara waṟa ukiṟi flax-nguṟu palyala piintjingka waṟaly-waṟalyngaṟala waṉantjaku. Munuya mantara waṟa kutjupa palyala piintji tjaangka waṟaly-waṟalyngaṟanytjaku. 18 Munuya tiinta puḻka witu kuṉpu ngaṟanytjaku piiki muṯumuṯu tjuṯa palyala mantangka muṟutjunkunytjaku munuya ruupa kuṉpu tjuṯa kuḻu palyala tiinta witiṟa kanyintjaku. Munuya palu puṟunypaṯu piiki munu ruupa kutjupa tjuṯa kuḻu piintjiku palyala. 19 Munuya mantara wiṟu mulapa palyala wati tjukurtjara tjuṯaku mantara pala palula tjarpara Miḻmiḻṯa waṟkarinytjaku. Mantara nyanga paluṟu tjana panya Aaronku munu palumpa katja tjuṯaku kuḻu.” Nyanga alatji Moselu waṟka nintipuka tjuṯangka wangkangu kutjupa kutjupa uwankara palyantjaku panya Godalu uwankara wangkanytjitja.

20 Kaya tjukurpa nyanga palunya kulintjatjanu Israelkunu uwankarangku Mosenya wantikatira ngurakutu anu. 21 Munuya paluṟu tjana mukuringkula kutjupa kutjupa tjuṯa katingi tjana kanyintjatjanungku Mayatja Godanya munytjangku ungkunytjikitjangku tiinta panya miḻmiḻpa palyantjaku. Tjana kutjupa kutjupa uwankara katingi tiinta panya palyantjaku, munu tiinta unngu nyinanytja tjuṯa kuḻu palyantjaku, munu tjukurtjara tjuṯaku mantara kuḻu palyantjaku. 22 Watingku minymangku uwankarangkuya mukuringkula katingi kutjupa kutjupa tjuṯa apu gold-nguṟu palyantja liritja, pinatja, ringi manyirkitja, kutjupa kutjupa wiṟu tjuṯa tjana aṉangungka tanpaṟa kanyilpai uwankara. Munuya maṟangku katira Mayatja Godala miṟangka maṟa uritjingaṟa waḻkuṟa palunya ungangi. 23 Munuya mantara wiṟu ukiṟi ini flax-nguṟu palyantja kanyintjatjanungku katira ungangi, munuya inyu kuka tjiipinguṟu walka panya puyul-puyulpa, purple, tjitin-tjitinpa kuḻu kanyintjatjanungku katira ungangi, nanikuta inyu kuḻu. Munuya tjiipi nyiṯayira miṟi kuḻu tjitin-tjitinta palyantja kanyintjatjanungku ungangi, miṟi panya rapa puṟunypa antipina puḻkanguṟu palyantja kuḻu. 24 Munuya piṟuku kanyintjatjanungku katingi tjiilpa munu ayana ini puṟantji munuya Mayatja Godanya ungangi. Munuya puṉu wiṟu kuḻu kanyintjatjanungku katira ungangi panya Tiinta Miḻmiḻku puṉu tjuṯa palyantjaku, kutjupa kutjupa tjuṯa kuḻu puṉunguṟu palyantjaku. 25 Kaya minyma nintipuka tjuṯangku puṯuru puḻka rungkaṟa palyaṉu ukiṟi ini flax-nguṟu munu tjiipi inyunguṟu kuḻu puṯuru puḻka mulapa walka panya puyul-puyulpa, purple, munu tjitin-tjitinpa. 26 Munuya piṟuku rungkaṟa palyaṉu nanikuta inyunguṟu puṯuru puḻka. 27 Kaya Israelkunu wati kuranyitja tjuṯangku apu wiṟuly-wiṟulypa wiṟu kutjupa kutjupa tjuṯa walka wiṟutjara katira ungangi, panya wati tjukurtjaraku piḻpirta tjakatjunkunytjaku. 28 Munuya uwila mai ini alipanguṟu palyantjitja katira ungangi panya lampangka tjutintjaku tiliku, munu kurpiṟa miḻmiḻmankunytjaku kuḻu. Munuya uwila nyangangka tjunguntjaku kutjupa kutjupa paṉṯi wiṟutjara kuḻu katingi, munuya paṉṯi panya wiṟutjara piṟuku katira ungangi panya kampanyangka wiṟu paṉṯintjaku. 29 Uwa, Israelkunuku wati minyma uwankarangkuya mukuringkula kutjupa kutjupa tjana kanyintjatjanungku katira ungangi uwankara panya Mayatja Godalu Mosela ungkunytjaku wangkangu. Kaya paluṟu tjana puḻkaṟa pukuḻarira Godanya ungangi Tiinta Miḻmiḻpa palyantjaku munu tiinta unngu nyinanytja tjuṯa kuḻu palyantjaku, munu tjukurtjara tjuṯaku mantara kuḻu palyantjaku.

30 Ka Moselu tjanala Israelkunu tjuṯangka piṟuku wangkangu, “Mayatja Godalu ngurkantanu wati ini Pitjalilnga, panya Uwaṟiku katja, munu Uuku pakaḻi. Nyanga Pitjalilnga tjana Judah-languṟu kanyintja tjuṯa. 31 Ka Godalu palula Kurunpa Miḻmiḻnga tjarpatjunu, munu palunya nintinu kutjupa kutjupa wiṟu tjuṯa mulapa tjukaṟurungku palyantjaku. 32 Ka paluṟu mulapaṯu kutjupa kutjupa tjuṯanguṟu wiṟu mulapa palyaṟa tjungulpai Godalu nintinnyangka, panya gold-nguṟu, tjiilpanguṟu munu puṟantjinguṟu kuḻu. 33 Panya Godalu palunya nintinu apu walka wiṟutjara tjuṯa upala, rupi, apu kutjupa kutjupa tjuṯa kuḻu kaṯaṟa kaṟaly-kaṟalypa wiṟu mulapa palyantjaku. Munu palunya nintinu puṉunguṟu kuḻu wiṟuṟa palyantjaku munu kutjupa kutjupa tjuṯa kuḻu wiṟu mulapa paluṟu witulyankunyangka palyantjaku. 34 Munu Mayatja Godalu wati panya Pitjalilnga pulanya Awu-liyapanya nintinu paluṟu pula aṉangu kutjupa tjuṯa kuḻu nintintjaku uwankara Godalu palunya nintintjitja. Wati panya Awu-liyapanya wati ini Atjimatjaku katja munu walytjapiti Dantanguṟu munu paluṟu kuḻu ninti puḻka kutjupa kutjupa wiṟu tjuṯa tjukaṟurungku palyalpaiṯu. 35 Ka Godalu Pitjalilnga pulanya Awu-liyapanya nintinu kutjupa kutjupa wiṟu tjuṯa ayinayiningku palyantjaku ayananguṟu, puṉunguṟu kuḻu, munu mantara wiṟu mulapa palyantjaku walka tjuṯatjara. Munu pula aṉangu kutjupa tjuṯa kuḻu palu puṟunytjuṯu palyantjaku nintiningi, kaya paluṟu tjana nintiringkula kutjupa kutjupa wiṟu tjuṯa palyalpairingu.” Alatji Moselu tjanala wangkangi Israelkunu tjuṯangka.