Lita Paulalu Walkatjuṟa Iyantja Manta ini Kalaitjiyalakutu
Galatians
Nyangatja Ngaṉmanytju Nyakula Wangkanytjaku
Nyangatja Godaku tjukurpa Paulalu Jesuku walytja tjuṯakutu walkatjuṟa iyantja tjana tawunu ini Akani-yamala, Litjuṟala, Tuupila, Antiyakala tjanala nyinanyangka. Ngura nyara paluṟu tjana panya manta ini Kalaitjiyala ngaṟangi Israelta alinytjara munu kakaraṟa. Panya Paulanya ngaṉmanypa anu ngura nyara palula tjanalakutu munu Tjukurpa Palya Jesunyatjara tjanala tjakultjunangi. Kaya tjuṯa mulapa kuliṟa mulamularingkula Jesuku walytjaringangi, kutjupa tjuṯa Jew tjuṯa, kutjupa tjuṯa Jew wiya tjuṯa Moseku tjukurpa kulilpai wiya kuḻu.
Ka Jew wiya tjuṯa Jesuku walytjaringkunyangka Jew kutjupa tjarangku Jesuku walytjangku tjananya ngunti wangkara wituwituningi tjana Moseku tjukurpa waṉantjaku munu tjananya puṟunypa arkaṟa nyinanytjaku. Munuya paluṟu tjana Paulaku kuḻu kuraringangi panya tjana kuliningi Jesulu palunya ngurkantaṟa iyantja wiya palumpa tjukurpa para-wangkanytjaku.
Palulanguṟu Paulalu lita nyangatja walkatjunu Jesuku walytja tjuṯaku manta nyara Kalaitjiyala nyinanytja tjuṯaku. Munu paluṟunku wangkangi panya tjukurpa paluṟu wangkanytja Jesulu kutjungku palula nintinu aṉangungku palula wangkara nintintja wiyaṯu. Munu paluṟu Jew wiya tjuṯangka wangkangi alatji, “Jew tjuṯangku nyurala ngunti wangkanyangkaya kulilwiyangku wantima. Munuya mulamularingama Jesuku Christaku kutjuku. Panya tjana nyurala ngunti wangkanyi alatji, ‘Godalu nyuranya palumpa walytjaringkunytjaku palyanmankuku nyura Jesuku mulamularingkunyangka kutju wiya, palu Moseku tjukurpa kuḻu wangaṉarangku kulinnyangka.’ Palu nyangatjaya ngunti wangkanyi. Panya Jesunya nyura kura palyantjitjanguṟu anga-ilungu nyurampa ngalkilpa ka nyara palulanguṟu Godalu nyuranya kalypangku wantinyi pungkuwiyangku. Ka nyura Jesunya ilura wankaringkula pakantjitjaku mulamularingkunyangka kutju Godalu nyuranya palumpa walytjanmankuku. Palulanguṟuya Jesunya waṉanma munuya Kurunpa Miḻmiḻṯa wangaṉarangku kuliṟa Jesunya puṟunypa wiṟuṟa palyanyku nyinama.” Alatji Paulalu tjanala wangkangi lita nyangangka.
Tjukurpa nyanganpa ngarinyi:
1:1-10 Paulalu ngaṉmanytju wangkanytja
1:11—2:21 Paulalu paluṟunku wangkanytja panya Jesulu palunya ngurkantaṟa iyantja
3:1—4:31 Paulalu tjananya wituwituntja Jesuku kutjuku mulamularingkunytjaku
5:1—6:10 Jesuku walytja tjuṯa uti palyanyku nyinama nyanga alatji
6:11-18 Utila Mayatja Jesunya kutju mirawaṉima panya nganampa puṉu kaṯakutjarangka anga-ilunytja
1
Paulalu Ngaṉmanytju Wangkanytja
1 Uwa, Jesuku walytja tjuṯa, ngayuluṉa Paulalu nyurampa lita nyangatja walkatjunanyi manta pala Kalaitjiyala nyinanytja tjuṯaku. Panya ngayuluṉa tjukurtjara Jesulu Christalu iyantja. Aṉangungkuṉi ngurkantaṟa wituntja wiyaṯu, palu Jesulu Christaluṉi wituṉu Mama Godalu kuḻu palumpa tjukurpa tjakultjunkunytjaku. Panya Godalu Jesunya ilunyangka wankaṟa pakaltjingaṉu, nyara paluṟuṉi wituṉu waṟka nyanga palunya palumpa palyantjaku. 2 Kala nganaṉa ngura nyanganguṟu Jesuku walytja tjuṯangku nyuranya pukuḻarira kulini manta pala Kalaitjiyala nyinanytja tjuṯa, panya nyura manta pala palula ngura kutjupangka kutjupangka Jesuku walytja tjuṯa nyinanyi.
3 Ka Mama Godalu, Mayatja Jesulu Christalu kuḻu nyuranya pukuḻtju puḻkangku kanyinma munu nyuranya kurunpa rapaṟa pukuḻmanama. 4 Panya Mama Godalu iyannyangka Jesunya wangaṉara pitjangu munu nganampa kuranguṟu anga-ilungu nganaṉa kura wantinytjaku. Panya manta winkingkaya aṉangu uwankarangku kura palyaṉi, ka palu puṟunypa rawa nyinanytjaku-tawara Jesunya nganampa ngalkilpa ilungu nganaṉa kaṟalyarira Godala tjungu nyinanytjaku. 5 Kala uti Godanya tiṯutjarangku mirawaṉira waḻkunma wantinytja wiyangku. Uwa mulapa.
Tjukurpa Palya Kutju Ngaṟanyi Aṉangu Tjuṯa Wankaringkunytjaku
6 Uwa, nyuranya kuliṟaṉa puḻkaṟa tjituṟu-tjituṟuringu panya mapalku alatjiṯu nyura Godanya wantira paṯuringu tjukurpa ngunti tjuṯa kulintjatjanu. Panya paluṟu alatjiṯu pukuḻtju puḻkangku nyuranya ngurkantaṟa walytjanmanu Jesunya Christanya nyurampa ngalkilpa ilunyangka. Ka panya nyura wantingu tjukurpa kutjupa palya-palku kulintjatjanungku. 7 Palu tjukurpa pala paluṟu palya wiya. Panya aṉangu kutjupa tjuṯangku Tjukurpa Palya Jesunyatjara kampa kutjupaṟa tjukurpa kutjupa wangkara nyuranya ngunti kuraṉi palunya tjananya kuliṟa waṉantjaku. Kaya palunya tjananya kuliṟa wantima. 8-9 Panya tjukurpa palya kutjupa ngaṟanytja wiya alatjiṯu kuliṟa wankaringkunytjaku. Tjukurpa nyanga palunya kutjula nyurala wangkangu Jesunyatjara, ka panya nyura kuliṟa kurunpa winki mulamularingu. Palu tjinguṟu wati kutjupangku nyurala tjukurpa kutjupa wangkaku, ka uti Godalu palunya paiṟa iyanma ngura kurakutu. Tjinguṟu nganaṉa tjukurtjara Jesulu iyantja tjuṯangku nyurala ngunti wangkaku, ka palu puṟunypa Godalu uti nganaṉanya kuḻu ngura kurakutu paiṟa iyanma. Tjinguṟu angeltu ilkaṟinguṟu pitjala tjukurpa kutjupa nyurala wangkaku ka nyara palunya kuḻu uti Godalu paiṟa iyanma ngura kurakutu. Panya ngaṉmanytjuṉa nyurala wangkangu munuṉa kuwari piṟukuṯu nyurala wangkanyi alatji aṉangungku Tjukurpa Palya Jesunyatjara wantira tjukurpa kutjupa nyurala wangkanyangkampa uti Godalu palunya ngura kurakutu paiṟa iyanma alatjiṯu.
10 Kulilaya, tjinguṟu ngayulu tjukurpa ngunti wangkama aṉangu tjuṯa pukuḻmankunytjikitjangku tjana kuliṟa ngayuku pukuḻarinytjaku. Palu wiya, ngayulu aṉangu tjuṯa kulintja wiyangku Godaku tjukurpa tjukaṟurungku kutju wangkapai paluṟu nyakula pukuḻarinytjaku. Tjinguṟuṉa palyanma aṉangu tjuṯangku nyakula ngayuku pukuḻarinytjaku. Palu alatji palyaṟaṉa Jesuku waṟka mulamulangku palyantja wiya.
Godalu Paulanya Ngurkantanu Tjukurpa Palumpa Wangkanytjaku
11 Walytja tjuṯa kulilaya! Tjukurpa Palya Jesunyatjara ngayulu wangkanytjitja Godalanguṟu alatjiṯu aṉanguku tjukurpa wiya. 12 Panya aṉangungkuṉi wangkara nintintja wiyaṯu palu Jesulu Christalu kutjungkuṉi nintinu. 13 Nyura panya ngayuku ninti panya ngayulu wati Jew munuṉa ngaṉmanypa Jew tjuṯaku aṟa kutju kuliṟa waṉalpai, munu panyaṉa ngayulu Jesuku walytja tjuṯa ngaḻṯuringkunytja wiyangku waṯaparaṟa pungangi tjana Jesunya waṉalwiyangku wantinytjaku. 14 Panya ngayulu mulapa Jew tjuṯaku tjukurku ninti puḻka nyinangi ngayuku ngalungku tjuṯangka waintaṟa, munu ngayulu tjamuku tjanampa aṟaku puḻkaṟa alatjiṯu mukuringangi. 15 Palu Mama Godaluṉi ngayunya pukuḻtju puḻkangku ngurkantanu iṯi wirkankunytja kuwaripangka palumpa waṟka palyantjaku. 16 Munu palumpa katja ngayula nintinu ngayulu mulamularingkula ankula malikitja tjuṯangka Tjukurpa Palya palunyatjara tjakultjunkunytjaku, panya Jew wiya tjuṯangka. Kaṉa paluṟu ngurkantaṟa tjunkunyangka ngayulu wati kutjupangka tjapintja wiyaṯu ngayunya wangkara nintintjaku. 17 Munuṉa Jerusalemalakutu ankunytja wiyaṯu Peternya tjananya nyakunytjikitja panya Jesulu iyantja tjuṯa, panya tjananya-waraṟa ngurkantaṟa tjunu ngayula kuwaripangka. Palu anuṉa manta ini Aṟapiyalakutu munuṉa nyara palula kuḻi tjuṯa nyinanytjatjanu ngula mulapa maḻaku anu ngura Tamatjakalakutu. 18 Palulanguṟuṉa kuḻi maṉkurpa wiyaringkula Jerusalemalakutu maḻaku anu Peterla tjunguringkula paluṟu ngali wangkanytjikitja munuṉa nyara palulalta wirkaṟa rawa nguwanpa nyinangi tjiṟirpi 15. 19 Palu nyara palula nyinaraṉa ngayulu Jesulu iyantja kutjupa tjuṯa nyakunytja wiyaṯu, palu Jamesanya kutjuṉa nyangu Mayatja Jesuku panya maḻanypa. Munuṉa palulanguṟulta anu maḻaku Tamatjakalakutu. 20 Palu kulilaya, nyanga palunyaṉa walkatjunanyi Mama Godala miṟangka munuṉa ngunti wangkanytja wiyangku tjukaṟurungku kutju nyurala tjakultjunanyi.
21 Nyara palulanguṟuṉa ankula tjukurpa para-wangkaṟinangi aṉangu tjuṯangka manta Tjiṟiyala pulala Tjilitjiyalawanungku. 22 Katjuya Jesuku walytja kutjupa tjuṯa manta nyara Judeala nyinanytja tjuṯa ngayuku ngurpaṯu nyinangi panya paluṟu tjana ngayunya nyakunytja wiyaṯu. 23 Palu kutjupa tjuṯangku tjakultjunkunyangka kutjuya kunyu kulinu, “Wati panya paluṟu kunyu kampa kutjuparingu, panya paluṟu ngaṉmanytju nganaṉanya waṯaparaṟa pungangi munu panya tjukurpa Jesunyatjara wiyantjikitja mukuringangi. Palu kuwari kunyu wati panya paluṟu tjukurpa panya palunyalta wangkaṟinanyi.” Alatjiya kunyu kuliningi ngayunyatjara kutjupangku wangkanyangka. 24 Munuya palulanguṟu Godanyalta mirawaṉingi ngayulanguṟu.