Inma Psalm Tjuṯa
Psalms
Nyangatja Ngaṉmanytju Nyakula Wangkanytjaku
Nyangatja Godaku tjukurpa inma tjuṯatjara munu Godala tjapintjatjara kuḻu. Ka uwankara tjunguringkula inma tjuṯa ngarinyi nampa nyangatja 150. Palu nyiri nyangangkala 13 kutju palyaṟa tjunu. Kala uti Godanya waḻkuntjikitjangku inma nyanga tjuṯa nyakula wangkama.
Wati panya Mayatja Davidalu inma tjuṯa mulapa walkatjunu. Paluṟu kutjupa tjuṯa walkatjunangi pukuḻpa nyinara Godanya waḻkuṟa mirawaṉinytjikitja mukuringkula, munu kutjupa tjuṯa paluṟu walkatjunangi tjituṟu-tjituṟu palumpa wituwitu utiringkunyangka. Munu piṟuku paluṟu inma kutjupa tjuṯa walkatjunangi kura puḻka palyantjatjanungku Godala miṟangka kuṉṯaringkula wangkanytjikitjangku.
Uwa, inma nyanga paluṟu tjana Godanya wangkanyi, panya paluṟu uwankara mulapa paluṉu, munu wiṟu mulapa witulya puḻkanya nyinanyi mayatja puḻka mulapa uwankarangka waintarinytja.
Ka panyaya tjukurpa panya maḻatjangka Matthew-lu, Luke-alu, Paulalu tjana kuḻu inma nyanga tjuṯanguṟu tjukurpa walkatjunu. Panya Matthew-lu walkatjunu tjukurpa panya psalm 91-nguṟu tjukurpa palu puṟunypa, (nyawa Matthew-ku 4:6 munu Psalm 91:11-12). Ka panya Paulalu lita walkatjuṟa iyaṉu ngura Rome-alakutu munu lita pala palula paluṟu Psalm 51-nguṟu tjukurpa palu puṟunypa walkatjunu, (nyawa Romans 3:4 munu Psalm 51:4).
Inma psalm nampa nyanganpa nyiri nyangangka ngarinyi:
1, 3, 6, 8, 13, 19, 20, 23, 40, 46, 51, 61, 63, 91, 121, 131, 133, 136, 146
1
1 Godalu pukuḻmankupai palula wangaṉarangku kulilpai tjuṯa.
Nyara paluṟu tjana panya kuliṟa wantipai aṉangu kurangku tjananya wituwitunnyangka,
munuya iwara kurangka ankunytjaku aḻṯinyangka wantipai,
munuya Godanya kaṉany-kaṉanytju analpai tjuṯangka tjunguringkupai wiya.
2 Paluṟu tjana pukuḻaripai Godaku tjukurku munuya wangaṉarangku kulilpai,
munuya nyakula wangkara tiṯutjarangku kulilpai kaḻaḻa mungangka kuḻu.
3 Munuya tjana kuṉpu ngaṟapai, panya puṉu tjuṯa uṟungka itingka ngaṟala waṉalpai, palu puṟunypa.
Panya puṉu paluṟu tjana tiṯutjara maitjararingkupai munu nyaḻpi piḻṯiringkupai wiya.
Palu puṟunypa nyanga tjana Godaku tjukurpa tiṯutjarangku mulamulangku kulilpai,
munuya palulanguṟu kuṉpu ngaṟapai, ka Godalu wiṟu tjuṯa tjanampa palyalpai.
4 Palu aṉangu kura palyalpai tjuṯa tjana puṟunypa wiya.
Panya paluṟu tjana unytjunytju puṟunypa nyinanyi,
panya kaṉiṟa mai uṉinypa tjaraṟa unytjunytju ma-uṉṯuṟa waṉipai,
nyanga palu puṟunypa tjananya Godalu waṉiku tjaraṟa.
5-6 Uwa, tjanampa kuranguṟu Godalu ngula tjananya ngurkantaṟa tjaralku palumpa walytja tjuṯanguṟu mauṉṯalpa nyinanytjaku,
kaya ngura kurangka tiṯutjara nyinaku.
Ka Godalu palumpa walytja tjuṯa aṯunymaṟa kanyilku palula wangaṉarangku kulilpai tjuṯa.