1 RI ai kan i men kataman kin komail ronamau, me i padaki on komail er, me komail pil aleer o pil tinain kidar. 2 O me komail pil dore kila, ma komail pan dadaurata majan o, me i padaki on komail er, ma komail jo pojon mal. 3 Pwe i ujaki on komail er, me i pil aleer duen Krijtuj, me kamata kilar dip atail akan duen kijin likau kan. 4 O me a jaredier o kaiajadar ni kajilu en ran duen kijin likau kan, 5 O me a pwara won Kepaj, ap on irail me ekriamen ko, 6 Ap kotin pwara won jaulan limepuki jama ni anjau takij; kij arail me toto mimieta lei met, a akai mairedier. 7 Murin met a kotin pwara won Iakopuj, ap on wanporon akan karoj. 8 A ikmuri a kotin pwara don ia mon ai ip japal, 9 Pwe pokindidi ren wanporon akan nai, me jota war on kaindinda wanporon amen, pweki ai pei on momodijou en Kot. 10 A mak en Kot, me i wanoron kilar. A kaidin mak mal eu on ia, pwe i dodok laud jan irail karoj, ari kaidik nai, pwe mak en Kot, me mi re i. 11 Ari, ma nai de irail, pwe iduen at padaki wei, o iduen komail pojonlar. 12 A ma i aude pan at padak, me Krijtuj iajadar jan ren me melar akan, a da me akai re omail kin inda, dene me melar akan jolar pan mauredar? 13 A ma me melar akan jota pan maureda, nan Krijtuj pil jota iajadar. 14 O ma Krijtuj jota iajadar, at padak me mal, o omail pojon pil me mal. 15 O kitail pil pan diarokada, me je jaunkadede likam ren Kot, aki at kadededar, me Kot kotin kaiajadar Krijtuj, me a jo kaiajadar, ma me melar akan jota pan kamaureda. 16 Pwe ma me melar akan jota pan kamaureda, nan Krijtuj pil jo kaiajadar. 17 A ma Krijtuj jo kaiajadar, omail pojon me mal, o komail mimieta ni dip omail. 18 Iduen pil irail, me melar ren Krijtuj akan, lokidokila. 19 A ma kitail kaporoporeki Krijtuj nan maur et eta, nan kitail me jued jan aramaj akan karoj. 20 A melel, Krijtuj kaiajadar jan ren me melar akan, ap wiala mejeni nan pun en ir me mamair akan. 21 Pwe mela tapi jan aramaj ta men, iduen maureda jan ren me melar akan tapi jan aramaj ta men. 22 Pwe duen karoj me mela ki Adam, nan iduen karoj pan kamaurela ren Krijtuj, 23 A amen amen ni kakairokdo: Krijtuj maj ap me japwilim en Krijtuj, ni a pan kotin pwarado; 24 A murin mepukat pan imwi, a lao kotiki on Kot o Jam a wei, a lao kaloedier kaun akan karoj, o me poe kan, o manaman akan. 25 Pwe a pan kotin kaunda, lao a imwintiti karoj lodi on pan aluwilu a kan. 26 A ikmurin imwintiti iei mela. 27 Pwe a kotin mueid on meakaroj pan aluwilu a. Ari ni a kotin majanier me karoj lodier a janjaledar, me i jota ian me kotin kaloedi on i meakaroj. 28 A meakaroj lao lodi on i, Na ap pil pan upan i, me kotin kaloedi on i meakaroj, pwe Kot en kotin poedi meakan karujia. 29 A ma me melar akan jolar pan kamaureda, da me irail en wia, me kin paptaijeki on me melar akan? Menda re paptaijeki on irail? 30 O menda kit kin kalokolok anjau karoj? 31 Pwe ran karoj i kin mela, pweki kapin pa i, me i aleer ren Krijtuj Iejui atail Kaun. 32 A ma i pei on man laualo nan Epijuj, duen aramaj akan kin wiada, da kadepa on ia, ma me melar akan jota pan kamaureda? Kitail en mana o nim, pwe lakap kitail pan mela. 33 Der duki on, me kajonejon komail! Kajoi jued kin kawela tiak mau. 34 Komail ari punala, o pirida o der wiada dip! Pwe akai jaja duen Kot. Mepukat i indai on komail, pwen kanamenokki komail. 35 A ele amen pan inda: Iaduen me melar akan ar pan kamaureda? O iaduen war ar, me re pan maur kida? 36 Pweipwei men koe! Pwe me koe kin kamoredi, jota pan maureda, ma a jota pan mela. 37 O me koe kamoredi, kaidin war ota me pan para, pwe wan korn eu ta, ele wan wit de eu wa toror. 38 A Kot pan kotiki on war a, duen a kotin kupura, o eu eu en war akan pan ale udan mom a. 39 Uduk karoj kaidin jon ta ieu, pwe eu jon uduk en aramaj akan, a eu jon uduk en man akan, a eu jon en manpir akan, a eu jon en mam akan. 40 A war lan o war pwel akan mia, a linan en war lan eu jon o linan en war pwel eu jon. 41 A eu jon linan en katipin, o eu linan en maram, o eu linan en uju kan, pwe nan uju kan me wuki pajan ki ar linan eu eu. 42 Nan iduen en me melar akan ar pan maureda. A kin kamoremoredi ap mor pajan, o pan kamaureda jo mor pajan. 43 A kin kamoremoredi ni jo linan, o pan maureda ni linan; a kin kamoremoredi ni luet, o pan maureda ni manaman; 44 A pan kamoremoredi war pwel o pan kamaureda war nenin; pwe ma war pwel mia, nan a pil pan war nenin. 45 Duen a intinidier: Tapin aramaj Adam wiauier, pwen nen maur amen, a Adam tia mur, pwen nen en kamaur. 46 A war nenin kaidin i men maj pwe war pwel, a muri me nenin. 47 Tapin aramaj wiaui kida pwel, a aramaj kariamen kotido jan nanlan. 48 A duen tapin aramaj wiauiki pwel, iduen karoj me wiauiki pwel o duen men nanlan o, iduen men nanlan kan. 49 O duen kitail wa mom en pwel, iduen kitail pil pan wa mom en lan. 50 Ri ai kan, iet me i men inda: Uduk o nta jota kak jojoki wein Kot; o me mor pajan kan jota pan jojoki me jo mor pajan. 51 Kilan, nai me kadiarok on komail kaponepon eu: Kaidin kitail karoj pan mela, a kitail karoj pan nitwilida. 52 Madan ni marep ta ieu, koronete en muri lao popeuk. Pwe koronete pan popeuk, a me melar akan ap pan kamauredan jomor pajan a kitail pan kawilikapada. 53 Pwe mor pajan wet pan kiawikilan jo mor pajan; o mela wet kiawikilan jomela. 54 A mor pajan wet lao kia wikilan jo mor pajan o mela wet kiawikilan jomela, majan o ap pan pwaida, me intinidier: Maur kadalala mela. 55 Mela koe, ia om tata? Mela ia om poedi? 56 Mana en mela dip, a manaman en dip kapun. 57 Danke on Kot, pwe a kotiki on kitail, en poediki atail Kaun Iejuj Krijtuj. 58 Ari ri ai kompok kan, komail kelail kaukaule o der wukiwuk jili, a kakairida ni omail wiawia en Kaun o, pwe komail aja, me omail dodok on Kaun o kaidin dodok mal.