1 Mwurin ekis ahnsou en nanmwarkio eh engieng ahpw meleileidi. Mehnda ma e solahr kupwurekupwure Pasdi, ahpw e kin kupwukupwurehte duwen dahme e wiahiong liho. 2 Eri, ekei sapwellimen nanmwarki sounkaweid ahpw patohwan, “Dahme komwi sohte rapahkidahki ekei serepein pwulopwul masamwahu me tiahk mwahu? 3 Komwi kak pilada ekei lapalap en nan wehi koaros pwe re en patohwandohng komwi serepein pwulopwul meipwon oh masamwahu koaros wasa me sapwellimomwi lih akan kin patopato ie wasaht nan Susa. Komwi eri ketikihong Ekai, ohl lekwusolo en kin apwahpwalih irail, oh re en kihong serepein ko mehn kapwatairailda oh soahng teikan me re pahn anahne. 4 Eri, komw pahn pilada serepein me komwi keieu kupwurki oh wiliankihdi Pasdi.”

Nanmwarkio eri kupwure me kaweid mwahu ehu met, ih eri kapwaiada.

5 Mie ohl en Suhs men nan Susa, me ede Mordekai, nein Sair; ih keinek en Pensamin oh kadaudok en Kis oh Simei. 6 E iang kisehn mehn Suhs ako me Nepukadnesar, nanmwarkien Papilonia salihiraildi oh kalipeirailsang Serusalem. 2 Nan. 24.10-16; 2 Kron. 36.10. 7 Mordekai me kin apwahpwalih Ester, Ester nein Aminadap, rien en Mordekai eh pahpa. Ester serepein masamwahu men, oh mwurin eh nohno oh pahpa ara mehla, Mordekai ahpw apwalihada e lao laudla.

8 Ni nanmwarkio eh wiahda sapwellime kalohko, serepein tohto ahpw wisikdohng nan Susa, oh Ester iang irail. E pil iang kohdiong pahn epwelpen Ekai, me kin apwahpwalih sapwellimen nanmwarki lih ako. 9 Ekai inenen mwahukihda Ester, oh e ahpw kenikenla pahn Ekai. E mwadangete tapihada kihong eliel oh soangen mwenge mehn kamwomwmwahwihada. E ahpw kilelehdi serepein isimen sang nan tehnpesen nanmwarkio pwe re en kin papah Ester, oh e kin wia mwahu ong Ester oh serepein ko me kin Ester.

10 Eri, sang ni kaweidpen Mordekai, Ester sohte mwahn kasalehda me ih mehn Suhs. 11 Rahn koaros Mordekai kin alialuseli mwohn kelen wasa me lih ako kin mihmi ie, e kin mwasamwasahn dahme pahn wiawihong Ester.

12 Doadoahk en kapwatahda lih ako imwisekla erein sounpar ehu: eliel en lehn mir erein sounpwong weneu oh leh pwohmwahu oh mehn kamwomwmwahwihirailda erein sounpwong weneu. 13 Mwurin mwo, emenemen serepein ko kileldiong aramas emen pwehn kahrelahng nan tehnpaso rehn nanmwarkio. 14 Emen serepein kin kohla nin soutik, oh nimenseng e kin pakahrlahng ehu wasa tohrohr me ekei sapwellimen nanmwarki lih akan pil patopato ie, pahn epwelpen Ekai, ohl lekwusol me kin pwukoahki apwalih irail. E sohte pahn pwurala rehn nanmwarki lao pein nanmwarki kupwurkihda en pwurala reh.

15 Eri, ahnsou ahpw leledo pwe Ester, nein Aminadap, rien en Mordekai eh pahpa, en pas rehn nanmwarkio. E kapwaiada mehkoaros me Ekai kaweidki, oh koaros me kin kilang kin dahkihla eh kaselel. 16 Eri, ni keisuhn sounpar me Serksihs wiewiahki nanmwarki, ni kaeisek riau en sounpwong, sounpwong Adar, e ahpw pakahrlahng rehn nanmwarkio. 17 Nanmwarkio eri poakohng Ester, me kaperenihada laudsang serepein teiko, e ahpw ketikidahng lisoarop en lih nanmwarki pohn moange. 18 Nanmwarkio eri wiahda kamadipw ehu me wiewiawihki wihk ehu ong sapwellime sounkaweid oh lapalap akan pwe re en kawauwih eh kapwopwoud ong Ester. E pil katikitikihala uwen daksis me aramas kin pwain nan wehio pwon.

19 Ni ahnsowo Mordekai kesepwildahng nan dehu ile ehu nan wehio. 20 A duwen Ester, e sohte pil mweseiseikihong emen me ih mehn Suhs. Mordekai ndaiong en dehpa ndaiong emen met, oh e kapwaiada, duwehte eh kin peikiong sang ni eh tikitik. E ahpw usehla kaukaudokiong Koht oh kapwaiada sapwellimen Koht kosonned akan, ni eh sohte kesehla tiahk en mehn Suhs.

21 Ni nanmwarkio eh kasapwilada Mordekai ong pil ehu dehu me ileile mehlel, ohl lekwusol riemeno me kaunda sapwellimen nanmwarki sounsilasil kan ahpw lingeringerkihda oh wiahda koasoandi en kemehla nanmwarkio. 22 Mordekai eri esehda oh ndaiong Lih Nanmwarki Ester; Ester ahpw uhd patohwanohng nanmwarkio ni oaritik duwen koasoandio. 23 Nanmwarkio eri kapeidekihira oh ohl riemeno koaros kalusiamala. Pwehn kawauwih Mordekai, nanmwarkio mahsanih pwe ire wet en ntingdi nan pwuken nanmwarki, pwe eh doadoahk kesempwal wet en dehr manoknokla.