1 Ni ahnsou me Mordekai esehda dahme wiawihero, e inenen nsensuwedla oh tehrpeseng eh likou kan. E ahpw pwuhriong nan likoun nsensuwed, kihong pehs pohn moange, oh tangseli nan kahnimwo wie mwahmwahiei laud, ndinda, “Wehi mwakelekel ehu pahn kamwomwmwomwla!” 2 Ni eh lel ni wenihmwen tehnpesen nanmwarkio, e ahpw uhdi. E sohte pedolong pwe e sohte kin mweimweiong me mi nan likoun nsensuwed oh kihong pehs pohn moange en pedolong loale. 3 Wasa koaros nan wehi kan, wasa me sapwellimen nanmwarkio kalohko wiawiher ie, lapalahn mwahiei wiewiawi rehn mehn Suhs kan. Re sengiseng, mwahmwahiei, oh pwuhriong nan likoun nsensuwed oh kihong pehs pohn moangarail kan.

4 Ni ahnsou me nein Ester papah serepein ko oh ohl lekwusol ko ndaiong dahme Mordekai wiewia, e inenen pwunodkihda. E ahpw kadaralahng Mordekai likou kei pwe en pwuhriong loale, pwe en dehr mi nan likoun nsensuwed, ahpw e sohte ale likou ko. 5 E ahpw ekerodo Adak, emen ohl lekwusol me kin mi nan tehnpaso me pilpilida en kin papah, oh ndaiong en kohla rehn Mordekai oh idek reh dahme wiewiawi. d Ekei ntingdien pwuhk sarawi kin kapatahiong ire tikitik; 6 me ketihtihki: Adak eri kohla rehn Mordekai ni wasahn mwomwohd en kahnimwo ni wenihmwen pedolong nan tehnpaso.

7 Mordekai eri ndaiong mehkoaros oh duwen Aman eh inoukidahr duwen eh pahn kihong ten en silper 375 nan sapwellimen nanmwarki wasahn nek mwohni, ma mehn Suhs koaros pahn kamakamala. 8 Ih eri kihong Adak kalohko me wiawidahr nan Susa, me koasoanehdi kamwomwmwomwlahn mehn Suhs koaros. Mordekai eri peki en walahng rehn Ester pwe en peki ni ngidingid rehn nanmwarkio en kupwur mahkohng mehn Suhs kan. Mordekai pil ndaiong Adak, “Patohwanohng en tamataman ahnsou me e wia kisin serepein mwahl me kekeirda pahn epwelpei. Eri met, pwehki Aman, keriaun kaunen wehi, eh uhwong kiht met oh ngidingidki se en kamakamala, en kapakapohng Kaun-o oh mwuhr en mahseniong nanmwarkio duwen kiht. Ester uhdahn pahn doareikitasang mehla.”

9 Adak eri pwurala rehn Ester oh padahkihong dahme Mordekai ndaiong. 10 Ester ahpw ilakihala Adak rehn Mordekai, mahsanih, 11 “Ma mehmen, ohl de lih, pahn pedolong masloalen sapwellimen nanmwarki kehl oh tuhwong nanmwarkio ni nanmwarkio eh sohte malipe, aramaso pahn ale kalokolok en kamakamala. Aramas koaros nan wehiet ese duwen irair wet. Ihte ma nanmwarki pahn kapahla sapwellime reireiso kohlo powe, me e pahn kak pitkihla. Ahpw sounpwongehr ehu nanmwarkio sohte ketin malipei ie.”

12 Ni Mordekai eh alehdier pakair sang Ester, 13 e ahpw kadaralahng ilek wet: “Ester, komw dehpa kupwukupwure me komwi kelehpw sohte pahn iang mehn Suhs kan nan wehiet kamakamala. 14 Ma komw sohte wia mehkot ni soangen ahnsou duwehte met, sawas pahn kohieng mehn Suhs kan ni ehu ahl tohrohr oh re pahn pitla, ahpw komwi oh peneinei en omwi pahpa pahn kamakamala. Ahpw ihs me kak ese? Mweinele soangen rahn duwehte met me kahrehiong omwi wiahla lih nanmwarki!”

15 Ester eri kadaralahng Mordekai pasapeng wet: 16 “Kohla kapokonepene mehn Suhs koaros me mi nan Susa; kumwail kaisihsol oh kapakap kin ie. Kumwail dehpa tungoale de nim mehkot erein rahn siluh oh pwohng siluh. Ngehi oh nei serepein papah kan pahn pil wia soahnget. Mwurin mwo, I pahn patohla pahn kupwur en nanmwarkio, mehnda ma e uhwong kosonned, ma I pahn kamakamkihla ei pahn wia met, eri I uhdahn pahn mehla.”

17 Mordekai eri kohla oh kapwaiada mehkoaros me Ester padahkihong en wia.

18 [1] Mordekai eri kapakap ong Kaun-o, katakatamandohng soahng kan me Kaun-o ketin wiadahr kawao: 19 [2] “Maing ei Kaun, komwi me Kaun oh Nanmwarki en mehkoaros me kepikipikda, oh soahng koaros kin peikiong sapwellimomwi mahsen. Ma komwi kupwurki doarehla Israel, sohte emen me kak kapweiengkomwihdi. 20 [3] Komwi me ketin wiahda nanleng oh sampah oh soahng kaselel kan koaros nin sampah. 21 [4] Komwi me kaunen mehkoaros, oh sohte emen kak pelian komwi. 22 [5] Komwi mwahngih mehkoaros. Maing ei Kaun, komwi mwahngih me ni ahnsou me I soikala oh sohte men poaridi mwohn ohl aklapalap, Aman, kaidehn pwehki ei aklapalap de men aramas akan en kapingai ie. 23-24 [6-7] Ahpw pwehki I sohte men wauneki aramas emen laudsang ei wauneki Koht. Maing ei Kaun, I koasoanehdi me I sohte pahn poaridi mwohn aramas emen, ahpw mwohmwi kelehpw; oh met kaidehn pwehki ei aklapalap. I pil pahn perenki metik pateh neh kan ma met pahn kahrehda komourpen Israel.

25-26 [8-9] “Eri, Maing ei Kaun, Koht oh Nanmwarki, Koht en Eipraam, komwi ketin doarehla sapwellimomwi aramas akan; komwi ketin doareikitasang at imwintihti kan. Re koasoakoasoane re en kamwomwkitala; re raparapahki ar ahnsou mwahu en wia met. Mahsie komw ketin pilkitadahr pwe se en wiahla sapwellimomwi oh ketin kapitkitasang nan wehin Isip. Komwi dehr ketin keseikitala ahnsou wet. Eks. 3.6. 27 [10] Kiht sapwellimomwi aramas pilipil, eri, komwi ketin karonge ei kapakap oh kupwurkalahngan ong kiht. Komwi ketin wekidala at pahtou ong ni peren pwe se en kak momour oh wia at koulen kaping ong komwi. Komwi ketin doareikitasang mehla pwe se en kak usehla kokoulkihong komwi at koulen kaping.”

28 [11] Mehn Israel koaros ahpw kapakap ni ngihl laud oh ngidingid pwehki ar pehmehr me re pahn mehla.

29 [12] Lih Nanmwarki Ester, nan pwunod laud me e ketier loale, ahpw pil sohpeiong Kaun-o. 30 [13] E ahpw kapwuhrasang eh likou lingan oh pwuhriong nan likoun mwahiei oh nsensuwed. E ketikidahng pehs oh pwehl pohn tapwi, oh sohla kapwoatik. E wia soahng koaros me pahn kasohwauwihala. E mweidala pitenmoange kan en pingiping oh e sohte kin karada duwehte me e kin wia mahs ni eh kin kapwatahda mwahu paliwere. 31 [14] E ahpw kapakap ong Kaun-o Koht en Israel, patohwan, “Maing ei Kaun oh Nanmwarki, komwihte me Koht. I kalapwukalahr, oh sohte emen me I kak sohpeiong, pwe komwihte. Eri, komwi ketin sewese ie! 32 [15] I pahn pangalahr ei mour. 33 [16] Maing ei Kaun, nin duwen ei tamataman, ei peneinei patohwanohng ie duwen omwi ketin pilada Israel sang nanpwungen wehi teikan oh duwen kawao omwi pilada at pahpa kahlap ako pwe re en wiahla sapwellimomwi kohkohlahte. Komwi kin ketin kapwaiada sapwellimomwi inou kan koaros ong irail.

34 [17] “Ahpw se wiahda dihp ong komwi. Komwi ketikihong kiht pahn manaman en at imwintihti kan pwehki at pwongih ar koht kan. 35 [18] Maing at Kaun, at kalokolok me pwung pahn kupwuromwi. 36 [19] Ahpw at imwintihti kan solahr itarki at wiewie lidu. Re inoukidahr oh kahukihla ong ar dikedik en eni kan 37 [20] me re sohte pahn kamwomwalahte aramas akan me kin kapingai komwi, ahpw re pahn pil kasohrehla sapwellimomwi Kosonned oh kauwehla lingan en tehnpesomwi oh sapwellimomwi pei sarawio kohkohlahte. 38 [21] Re men sampah pwon en pwongih ar dikedik en eni mwahl akan oh lemmwiki nanmwarki kan me duwehte aramas me pahn mehla.

39 [22] “Maing at Kaun, koht pwukat sohte irail mehkot; komwi dehr ketikihong irail omwi manaman de mweidohng at imwintihti kan ar ahnsou mwahu en kouruhrki at pahn pwupwudi. Ahpw komwi wekidohng irail re en pein pwukoahkihdi ar koasoandi suwed kan, oh komw kupwurehda pwe ohl me tepin wiahda koasoandi en kamwomwkitala en wiahla mehn karasepe ehu ong aramas akan.

40 [23] “Maing at Kaun, komwi ketin tamataman kiht. Komwi ketido reht ni ahnsou apwal wet. Komwi ketin kakehlahda nan kapehdi, Nanmwarkien koht akan oh Kaunen me manaman koaros en sampah. 41 [24] Komwi ketikihong ie mahsen me I pahn patohwanda ni ei pahn patohla mwohn Serksihs, laion lemeio. Komwi ketin wekidala kupwure pwe en uhwong Aman, at imwintihtio, oh kemehla ih oh nah pwihn. Sudid 9.13. 42 [25] Maing at Kaun, komwi ketido oh kapitkitala. Komwi ketin sewese ie; I kalapwukalahr, oh sohte emen me I kak sohpeiong, pwe komwihte.

43 [26] “Maing ei Kaun, komwi mwahngih mehkoaros. Komwi mwahngih duwen ei tatki wahu me mehn liki pwukat kin wiahiong ie, duwen ei sautki wendi rehn ohl me sohte sirkumsais oh rotorot pwukat. 44 [27] Ahpw komwi mwahngih me sohte mehkot I kak wiahiong. I tatki lisoarop en lih nanmwarki me I kin kapwatki mwohn aramas akan. I sohte kin kapwatki, ihte ni ahnsou me I uhdahn pahn kapwatkihda; e kasaut duwehte likou samin. 45 [28] I sohte kin men iang tungoal ni en Aman eh tehpelo de iang sapwellimen nanmwarki kamadipw kan pwe I en wauneki, oh I sohte kin tungoale wain me kin kasarawihong eh koht kan. Dan. 1.8; Sudid 12.2. 46 [29] Sang ni rahn me I patohdo wasaht, ihte me kaperen pahi, ei kin kaudokiong komwi, Maing ei Kaun, Koht en Eipraam.

47 [30] “Maing Koht Wasa Lapalahpie, komwi ketin karonge kapakap en sapwellimomwi aramas akan. Komwi ketin kapitasang kiht aramas suwed pwukat, oh ketikihsang ei masepwehk.”