1 Nanmwarki Serksihs ketin koasoanehdi daksis en kin kohieng ih sang rehn aramas akan me kousoan nansapw oh ni oaroahr kan en sapwellime wehi. 2 Sapwellime manaman oh wiewia mwahu kan koaros, iangahki reken dipwisou oh lingan en sapwellime wehi ntingdier nan pwuken poadopoad en nanmwarki kan en Persia oh Media. 3 Mordekai me keriau en kaun, Nanmwarki Serksihs kelehpw me e mi pahnangi. E wia ohl lapalap emen nan wehi pwon oh mehn Suhs kan kin wauneki. Aramas akan kin poakohng pwehki e kin nsenohki kamwahupen nah aramas akan.

4 [1] Mordekai ahpw patohwan, “Koht me ketin kupwurehda pwe soahng pwukat koaros en pweida! 5 [2] Oh I tamandahr duwen ouraman me I wiahier me pid soahng pwukat koaros. Oaritik koaros en ouramano pweidahr: 6 [3] kisin pwarer kis me wiahla pillap pwoat, dakadahn ketipin me wiahla marain en ketipin, oh pwilipwildahn pihl me kadirehla wasa. Pillapo iei Ester me nanmwarki likehndkihda. 7 [4] Drakon riemen iei ngehi oh Aman. 8 [5] Wehi ko iei irail kan me ehupenehr pwe re en kamwomwala mehn Suhs kan. 9 [6] Ei wehi iei Israel, me peki rehn Koht en ketin sewese oh doarehla. Kaun-o ketin doarehla sapwellime aramas akan! E ketin kapitkitailsang nan koasoandi suwed pwukat oh ketin wiahda manaman kapwuriamwei kei me sohte kin wiawi nan wehi teikan. 10 [7] Koht ketin wia met pwehki eh ketin koasoakoasoane ehu soahng tohrohr ong sapwellime aramas akan oh ehu soahng tohrohr ong aramas teikan. 11 [8] Eri, rahn oh awa me soahng riau pwukat me e ketin koasoakoasoane ahpw leledo; e lelehr ahnsou me Koht pahn ketin kupwurehda dahme pahn wiawihong wehi kan. 12 [9] Koht eri ketin tamanda sapwellime aramas pilipil kan oh kupwurehda me irail me pwung nan sapwellime kadeik. 13 [10] Eri, nan sounpar koaros, erein dih koaros kohkohlahte, sapwellimen Koht aramas akan pahn kin pokonpene mwohn silangi ni kaeisek pahieu oh kaeisek limau en sounpwong Adar, oh kasarawih rahn ako ni peren oh nsenamwahu.”

Ni kapahieu en sounpar ni mwehin Tolemi oh Kileopadra, ohl emen ede Dosihdeus, me kose me ih Samworo en Lipai men, ahpw patohwanda kisinlikou me sansalehr me pid duwen sarawien Purim. Nah pwutak me adaneki Tolemi me iang ih, oh ira kalohkihda me kisinlikowo uhdahn nein Mordekai, oh Lisimakus, nein Tolemi, peneinei ehu sang Serusalem, iei ih me kawehwehda.