106
Sapwellimen KAUN-O Kupwur Mwahu ong Sapwellime Aramas akan
1 Kapinga KAUN-O!
Kumwail kapingkalahngan ong KAUN-O, pwehki eh kupwur mwahu;
sapwellime limpoak me poatopoat. 1 Kron. 16.34; 2 Kron. 5.13; 7.3; Esra 3.11; Mel. 100.5; 107.1; 118.1; 136.1; Ser. 33.11.
2 Ihs me kak wehkada soahng kapwuriamwei kan koaros me e ketin wiadahr?
Ihs me kak kapinga nin duwen me konehng?
3 Meid pai irail kan me kin peikiong sapwellime kosonned akan,
me kin kapwaiada dahme pwung ahnsou koaros.
4 Maing KAUN, komw ketin taman ie ni ahnsou me komw kin ketin sewese sapwellimomwi aramas akan;
komw ketin iangahkin ie ni omwi pahn komourirailla.
5 Komw ketin mweidohng ie I en udiahl paiamwahu en sapwellimomwi aramas akan
oh iang ahneki peren en sapwellimomwi wehi,
ni kalingan kansenamwahu en irail ko me komw sapwellimanki.
6 Se dipadahr duwehte at pahpa kalap ako;
se suwedlahr oh sapwungalahr mehlel.
7 At pahpa kahlap ako nan Isip sohte wehwehki wiepen nin limen Koht kapwuriamwei kan;
re manokehla uwen tohtohn pak me e ketin kasalehiong irail sapwellime limpoak,
re ahpw kahngohdiong Wasa Lapalap ni Sehd Weitahtao. Eks. 14.10-12.
8 E ahpw ketin kapitirailla nin duwen me e ketin inoukihong irail,
pwehn kasalehiong irail sapwellime roson lapalap.
9 E ketin ruwese Sehd Weitahtao,
a ni ahnsowohte e ngalangalada;
e ahpw ketin kahre sapwellime aramas akan pohn ngalangalo. Eks. 14.21-31.
10 E ketin doareirailla sang me kin kailongkin irail;
e ketin kapitirailla sang ar imwintihti kan.
11 Ahpw pihlo kaduhala ar imwintihti kan;
sohte emen rehrail pitla.
12 Iei me sapwellime aramas akan kamehlelekihla sapwellime inou kan
oh koulki koulen kaping ong ih. Eks. 15.1-21.
13 Re ahpw mwadangete manokehla dahme e ketin wiadahro
oh re sohte awih re en rong sapwellime kaweid.
14 Re dipada nan ar ngoangkihte ahneki dipwisou nan sapwtehno
oh re ahpw kasongosong Koht; Nempe 11.4-34.
15 ih eri ketikihong irail dahme re patohwan peki,
e ahpw pil ketin kadarodohng irail soumwahu suwed ehu.
16 Nan sapwtehno re peirinkihda Moses
oh Aaron, sapwellimen KAUN-O ladu sarawio. Nempe 16.1-35.
17 Iei me sampah sarahkipeseng oh kedellahla Dadan;
Apiram oh a peneinei ahpw pil serpweldi;
18 kisiniei mwerediong pohn ienge ko
oh kamwasikahla aramas suwed pwuko.
19 Re wiahkihda kohl koupwul men ni nahna Sainai
oh kaudokiong dikedik en enio; Eks. 32.1-14.
20 re kawilianki lingan en Koht
mwomwen mahn emen me kin kang dihpw.
21 Re manokehla Koht me ketin kepitkinirailla
manaman lapalap akan en nin lime nan Isip.
22 Ia uwen kapwuriamwei en soahng kan me e ketin wiahda wasao!
Ia uwen kapwuriamwei en soahng kan nan Sehd Weitahtao!
23 Ni ahnsou me Koht mahsanih me e pahn ketin kamwomwala sapwellime aramas ako,
sapwellime ladu pilipildahro, Moses, patohwanda eh tungoal tomw reh,
pwe sapwellimen Koht engieng en dehr kauweirailla.
24 Re ahpw soikala sahpw kaselelo,
pwehki ar sohte kamehlele inou en Koht. Nempe 14.1-35.
25 Re ahpw mihmihte nan imwarail impwal kan oh lipilipahned
oh sohte men rong KAUN-O.
26 Ih eri ketin kahukihla
me e pahn ketin kemeirailla nan sapwtehno
27 oh ketin kamwarakpeseng kadaudokarail ko nanpwungen me rotorot akan,
oh mweidohng re en mehla nan wehin liki kan. Lip. 26.33.
28 Eri nan Peor, sapwellimen Koht aramas ako ahpw iang kaudokiong Paal
oh iang tungoalehda mehn meirong ko me meirongalahr ong koht akan me sohte mour. Nempe 25.1-13.
29 Soangen tiahk pwukat ahpw kahngiangihada KAUN-O,
iei me soumwahu suwed ehu pwarada nanpwungarail.
30 Pineas eri uhdahte oh kaloke me dipada ko,
soumwahu suwedo ahpw tokedi.
31 Sang rahno kohla katamanpen ire wet ahpw kin wiewiawi,
oh pahn kin wiawi kohkohlahte.
32 Ni pwarer en Meripa aramas ako ahpw kahngiangihada KAUN-O,
Moses eri pwukoahkihdi arail kahpwal ko. Nempe 20.2-13.
33 Re inenen kansensuwedihada kowahlap
me kahrehiong eh koasoakoasoi oh sohte uhdi oh medewe dahme eh koasoia.
34 Re sohte kemehla me rotorot akan,
duwen me KAUN-O ketin koasoanediong irail, S.K. 2.1-3; 3.5-6.
35 ahpw re kin pwoudikinirailda
oh iang wia ar tiahk rotorot kan.
36 Sapwellimen Koht aramas ako kin kaudokiong dikedik en eni kan,
oh met kahrehda ar mwomwla.
37 Re kin mweidala pein nair pwutak oh serepein kan
pwehn wia mehn meirong ong dikedik en eni kan en Kenan. 2 Nan. 17.17.
38 Re kin kemehla seri me sohte dipe ko,
pwelen sahpwo ahpw kin saminkihla kamakamala pwukat. Nempe 35.33.
39 Re kin saminkihla pein ar wiewia samin kan
oh kin soaloalopwoat ong Koht.
40 KAUN-O eri ketin engiengda pahn sapwellime aramas ako;
oh ketin kalahdekinirailla. S.K. 2.14-18.
41 E ketin mweidohng pwe re en mihla pahn manaman en me rotorot akan,
arail imwintihti kan uhd kauniraildahr.
42 Ar imwintihti kan katoutouwihiraillahr
oh re uhdahn milahr pahn arail manaman.
43 Pak tohto KAUN-O ketin kapitala sapwellime aramas ako,
re ahpw kin pilada pwe re en uhwong
oh kihrla douluhl nan dihp.
44 KAUN-O ahpw ketin karonge irail ni ar kin likweriong
e ahpw kin ketin mahsanih arail apwal.
45 Pwehki irail, e ketin tamanda sapwellime inou,
oh pwehki sapwellime limpoak lapalap e kupwureirailla.
46 E ketin kupwurehda pwe irail kan me kaloke irail
re en kin poakeirailla.
47 Maing KAUN, at Koht, komw ketin kapitkitala,
komw ketin kapwureikitodo sang nan wehi kan,
pwe se en kin kapingkalahngan ong komwi
oh kapikapinga mwaromwi me sarawi. 1 Kron. 16.35-36.
48 Kapinga KAUN-O, Koht en Israel;
kumwail kapinga met oh pil kohkohlahte!
Koaruhsie en patohwan, “Amen!”
Kapinga KAUN-O!
106:1: 1 Kron. 16.34; 2 Kron. 5.13; 7.3; Esra 3.11; Mel. 100.5; 107.1; 118.1; 136.1; Ser. 33.11.
106:34: S.K. 2.1-3; 3.5-6.
106:40: S.K. 2.14-18.