PUK EN PSALM..
1.
MEID pai ol o, me sota alialu ni padak en me doo sang Kot akan, o me so duki ong me dipan akan, o me so mondi ren me malaun akan, 
A me kin peren kida kapung en Ieowa o madamadaua duen a kapung ni ran o ni pong! 
A rasong tuka pot, me padedier ni kailan pilap akan, me kin kapareda wa ni a ansau, o ta kan sota kin mongala, a karos a wiawia pwaida. 
Me doo sang Kot akan sota kin dueta, a re rasong dip me ang kin iririp sili. 
I me doo sang Kot akan sota pan pwai kida nan kadeik, o me dipan akan nan momod en me pung kan. 
Pwe Ieowa kotin mangi al en me pung kan; a al en ir, me doo sang Kot akan, pan soredi.