Pjalm.
35.
MAIN, kom kotin pei on ir, me kin pei on ia; o kotin palian on ir, me kin u on ia. 
Re kotin ale pere o tatan mauin ap kotida, pwen jauaja ia. 
Napekida katieu jauaja ia on ai imwintiti kan. Kotin majan don nen i: Nai jauaj pam! 
Me men kame ia la, en namenokala o kankaururala; o me men wia jued on ia, en pure wei o jarodi. 
Ren wiala dueta dip en kijin war akan mon kijinian, o tounlan en Ieowa jikin irail wei. 
Al arail en rotorotala o kitentel la, o tounlan en Ieowa on kotin pakipaki irail. 
Pwe re injenjara ia, pwen kame ia la, ap jota karepa, o re wia por on ia, a jota karepa. 
A en jejeinlek lodi on kalokolok; o injar me a wiadar, pein i en lodi on; o mela on lel on i waja o. 
A nen i en perenki Ieowa o polauleki a kotin jauaja ia. 
Kokon ai kan karoj pan inda: Main, ij me rajon komui? Pwe kom kotin jauaja me luet o on me a jota itar on, o kom kotin jauaja me luet o jamama on me lolap akan. 
Jaunkadede likam kai u on ia, kalelapok re i, me i jota aja due. 
Re kin depukki me mau me jued, pwen kainjenjuede kin ia. 
A nai, ni ar jomau, i puri on nan tuk en likau, o kaloke pein nai ni ai kaijejol, o kapakap jan monion i. 
Nai wiai on ir dueta on kompoke pa i o udan ri ai; nai injenjued dueta amen, me kin loleitki in a. 
A irail peren kida ai jikilikel o pokon pena. Men lalaue pokon penan ia o jon en aramaj, me i jaja, kin lalaue ia anjau karoj. 
Re ni tete on ia, irail, me kin janjalmau o lalaue pweki kijin mana. 
Main, arai da, me kom pan kotin majani mepukat? Dorela nen i jan arail me jued, o maur ta ieu ian laien pulepul akan. 
I pan kapina komui nan momodijou laud, o nan pun en aramaj toto i pan danke komui. 
Der mueid on ai imwintiti nin jokarepa, ren peren kin ia, o me kin kailon kin ia nin jokarepa, ren der lalaue ia ki maj arail. 
Pwe ar lokaia jota kin kareda popol, o re kin madamadaua, en dipi on me lelapok kan nan jap o. 
O re jar pajan au arail on ia indada: Io io, pein kit kilaner. 
Main, kom kotin mani mepukat, kom der kotin nenenla, Main, kom der doo jan ia! 
Kotin opala waja o kipada, pwen kapun ia la o ai dodok, ai Kot o ai Kaun. 
Main, ai Kot, kotin kapun ia la duen omui pun, pwe ren der peren kin ia. 
Der mueid on, ren inda nan monion arail: Io, io, i me je men! Der mueid on, ren inda: Kitail katalalar i. 
Irail karoj, me peren kida ai apwal akan, en namenokala o kankaurura la, ir me poponmajo on ia, en likau kida namenok o kankaurur. 
Irail me kin peren kida ai pun en nijinij o pereperen, o ren inda anjau karoj: Meid kapina on Ieowa, me kin perenki jauaja japwilim a ladu o, 
O lo i en kapakaparok duen omui pun, o kapina komui ran karoj.