Pjalm.
37.
KOE dor makaraki me jued akan; o dor peirinki me kin wia japun. 
Pwe re pan jorala madan jora lii ni, o ro pan monedi dueta tan tuka kan. 
Kaporoporeki Ieowa o wiada me amu, kaukaujonta nan jap o, o wiawia me pun. 
Plauleki Ieowa, a pan kotiki on uk, me monion om inon ion. 
Mueid on Ieowa om wiawia kan o kaporoporeki i, a pan kotin wia mau. 
A pan kapwareda on wiawia me pun dueta marain, o om tiak pun dueta nin jauaj. 
Kaporoporeki Ieowa ap nenenla o auiaui, o koe der makar kida pan me kin pwaida ni a wiawia kan, ol o, me kin kapwaida me jued. 
Muei jan makar o pwilikidi om linaranar; koe der makar, pwe koe der pil wia me jued. 
Pwe me jued akan pan kokoka jan, a me liki leowa, pan japaneki jap o. 
Anjau takij, ap jolar me japun o, o ma koe men kilan deu a, a jolar mia. 
A me opampap akan pan jojoki jap o, o re pan pereperen ki ar kapwa toto. 
Me japun o kin kamajak me pun o, o ni tete on i. 
A leowa kotin kiparamateki i, pwe a kotin mani a anjau. 
Me japun kan kin nape kida kodlaj o kaonopada kajik katieu, pwen kajikiedi me luet o jamama, o kamela me kekeit wei ni melel. 
A ar kodlaj pan dokodi pein monion arail, o ar kajik katieu pan tip pajan. 
Me malaulau en me pun amen, me mau jan dipijou toto en me japun kan. 
Pwe pa en me japun kan pan tip pajan, a leowa pan kotin kolekol me pun kan. 
leowa kotin manier ran en me lelapok kan, o ar dipijou pan duedueta. 
Re jota pan namenokala ni anjau apwal, o ni anjaun lok a pan itar on ir. 
Pwe me japun kan pan lokidokila, o imwintiti on leowa, ma re rajon jap kajelel eu, re pil pan mokonaidi duota at itiniai. 
Me japun kan kin pwaipwand ap jota kapunala, a me pun o kin kadek o kin kijakija wei. 
Pwe me paie kin i, pan jojoki jap o, a me a kotin karialar akan pan kokoka jan. 
Ieowa kin kotin katenetene jon en aramaj due met ar kakakewei, o a kotin peren kida a wiawia kan. 
Ma a pan pupedi, a jota pan lokidokila; pwe Ieowa kotin kolekidi i lim a. 
Nai pulepul ap malar, a i jaikenta kilaner me pun amen likidmalielar, de na kan poekipoeki prot. 
A kin kadek anjau karoj o kin men kijakij wei, o na kan pan paida. 
Muei jan me jued ap wia me mau, koe ap pan mimieta nan jap o. 
Pwe Ieowa kotin peren kida me pun, o a jota pan kotin likid maliela japwilim a jaraui kan; re pan nekinek kokolata, a kadaudok en me japun kan pan kokoka jan. 
Me pun kan pan jojoki jap o, ap mimieta kokolata. 
Au en me pun amen kin kida me lolekon, o lo a kaparokki me pun. 
Majan en a Kot mi nan monion i, a jota pan krijedi. 
Me japun kin majamajan me pun, pwen kamela i. 
A Ieowa jota pan kotin mueid on, en mi nan pa a kan, o a jota pan kotin kajela i, a lao pan pakadeikada. 
Auiaui Ieowa o weweid nan a al akan, a ap pan kotin kajapwil uk ada, pwe koe en jojoki jap o; koe pan kilan, me japun kan pan kokoka jan. 
I kilaner me doo jan Kot amen, me katiwo o pwaida o maurada dueta tuka mau pot. 
A ni at dauli waja o, kilan, a joer mia; i idok duen i, a a jolar kak diarokada. 
Dadaurata om lelapok, o wiawia me pun; pwe jon due met pan pwaida mau ni imwi. 
A me katiwo kan pan wiaki eu lokidokila, o me japun kan pan koka jan ni imwi. 
A Ieowa kotin jauaja me pun kan, i me kele parail ni ar apwal akan. 
O Ieowa pan kotin ieian ir o pan dore ir ala; A pan kotin dore ir ala jan me japun kan, o a pan jauaja ir, pwe re kin liki i.