MELKAHKA KAN.
47.
Kumwail tohn wehi koaros, kumwail lopwolopwki amwail peren! Kumwail kapingahki Koht amwail melkahkahn peren! 
KAUN-O, Wasa Lapalahpie, me lammwin kowahlahpie; nanmwarki lapalap emen ih, me kin kakaun sampah pwon. 
Ih me ketikihong kitail manaman en powehdi aramas akan; ih me ketin koasoanehdi pwe kitail en kin kaunda wehi kan. 
Ih me ketin pilohng kitail sahpw me kitail kin kousoan ie, sohso kesempwal en sapwellime aramas akan, me e kin ketin loalloale. 
Koht ketidalahng nan mwoale. Ngilen peren oh koronihda kan kadirehla wasa, nindokon KAUN-O eh ketiket kohda. 
Kumwail koul kapinga Koht; kumwail koul kapinga atail nanmwarki! 
Koht iei nanmwarkien sampah pwon; kumwail koul kapikapinga! 
Koht kin ketiket pohn mwoale sarawi; e kin ketin kakaun wehi kan. 
Kaunen wehi kan pokonpenehr iangahki sapwellimen Koht en Eipraam aramas akan. Ih me kehlailasang karis en sounpei kan koaros; ih me ketin kakaun mehkoaros.