MELKAHKA KAN.
133.
Ia uwen lingan, ia uwen kansenamwahu en sapwellimen Koht aramas akan ar kin miniminpene! 
E kin rasehng lehn kei kesempwal me kin dingidingidi sang pohn moangen oh alis en Aaron, dingidingidiong pohn tepinweren eh likou puhp. 
E rasehng pwoaik pohn Nahna Ermon, me kin mweremwerediong pohn dohl kan en Saion. Pwe iei wasao me KAUN-O ketin inoukihda me e pahn ketikihong kitail sapwellime kupwuramwahu— mour me sohte kak imwisekla.