MELKAHKA KAN.
136.
Kumwail kapingkalahngan ong KAUN-O, pwehki ih me ketin kupwur mwahu; sapwellime limpoak me poatopoat. 
Kumwail kapingkalahngan ong Koht me keieu lapalapasang koht akan koaros; sapwellime limpoak me poatopoat. 
Kumwail kapingkalahngan ong kaun me keieu roson sang kaun akan koaros; sapwellime limpoak me poatopoat. 
Ihete me kin ketin wiahda manaman kupwuriamwei kan; sapwellime limpoak me poatopoat. 
Sapwellime erpit me e ketin wiahkihda nanleng; sapwellime limpoak me poatopoat. 
E ketin kauwada sampah pohn pihl loal akan; sapwellime limpoak me poatopoat. 
E ketin kapikada ketipin oh maram; sapwellime limpoak me poatopoat; 
ketipin mehn kakaun rahn akan; sapwellime limpoak me poatopoat; 
maram oh usu kan mehn kakaun nipwong; sapwellime limpoak me poatopoat. 
E ketin kemehla mesenih koaros nan Isip; sapwellime limpoak me poatopoat. 
E ketin kahluwa mehn Israel ko sang Isip; sapwellime limpoak me poatopoat; 
ni roson oh manaman en nin lime; sapwellime limpoak me poatopoat. 
E ketin pwalangpeseng Sehd Weitahtao; sapwellime limpoak me poatopoat; 
e ketin kahluwa sapwellime aramas ako nansedo; sapwellime limpoak me poatopoat; 
e ahpw ketin kakihrala nanmwarkien Isip oh iangahki nah karis ko; sapwellime limpoak me poatopoat. 
E ketin kahluwa sapwellime aramas ako nan sapwtehn; sapwellime limpoak me poatopoat. 
E ketin kemehla nanmwarki kehlail kan; sapwellime limpoak me poatopoat; 
e ketin kemehla nanmwarki ndand kan; sapwellime limpoak me poatopoat; 
Sihon, nanmwarkien mehn Amor; sapwellime limpoak me poatopoat; 
oh Ok, nanmwarkien Pasan; sapwellime limpoak me poatopoat. 
E ketikihong sapwarail ko ong sapwellime aramas ako; sapwellime limpoak me poatopoat; 
E ketikihong Israel, sapwellime ladu; sapwellime limpoak me poatopoat. 
E sohte ketin melieikitailla ni atail lohdi; sapwellime limpoak me poatopoat; 
E ketin kasaledengkitailla sang atail imwintihti kan; sapwellime limpoak me poatopoat. 
E kin ketikihong mehkoaros me momour kisin tungoal; sapwellime limpoak me poatopoat. 
Kumwail kapingkalahngan ong Koht en nanleng; sapwellime limpoak me poatopoat.