MELKAHKA KAN.
87.
KAUN-O ketin kauwada sapwellime kahnimw pohn dohl sarawio; 
e kin ketin loalloale kahnimw Serusalem laudsang wasa teikan nan Israel. 
Rong mahs, kowe, kahnimw en Koht, irair kapwuriamwei kan me e pahn mahsanih duwen kowe: 
“Ni ei pahn pahngada wehi kan me kin peikiong ie I pahn iangahkihong Isip oh Papilonia. I pahn pil mahsanih tohn Pilisdia, Dair oh Idiopia, pwe irail pil kisehn Serusalem.” 
A duwen Saion aramas koaros pahn ketihtihki me wehi koaros tepisang reh oh pein Wasa Lapalap pahn ketin kakehlahda Saion. 
KAUN-O pahn ketin ntingihedi nan doaropwe eden aramas koaros oh ketin wiahkihla irail koaros pwilidak en Serusalem. 
Re kahlek oh kokoulki, “Atail paiamwahu kan koaros kin tepisang Saion.”