MELKAHKA KAN.
130.
Maing KAUN, sang nan ei weikeklahr mwuledek, I patohwan likweriong komwi. 
Maing ei Kaun, komw ketin karonge ie, komw ketin karonge ngilen ei pek sawas! 
Ma komw pahn ketin kilelehdi dipat akan, ihs me kak pitsang sapwellimomwi kadeik? 
A komw kin ketin mahkohng kiht, pwe se en kin lemmwikin komwi. 
I kin ngoangki kasikasik sawas sang rehn KAUN-O, oh I kin likih mehlel sapwellime mahsen. 
I kin kasikasik KAUN-O laudsang silepen nipwong kan ar kin awiawih marain en nin sohrahn— ei, laudsang silepen nipwong kan ar kin awiawih marain en nin sohrahn. 
Kumwail tohn Israel, kumwail en likih KAUN-O, pwehki sapwellime limpoak me poatopoat oh e kin ketin kupwurohki doareikitailla ahnsou koaros. 
E pahn ketin doarehla sapwellime aramas en Israel kan sang nan diparail kan koaros.