1 Kíchóni, éxí xja̱nna tꞌíkua̱n tí jahará, a̱ ntá tjékjian tí xroon tsꞌayéhérá tsochrónka kíxin chrókjuásinhyará jie̱. A̱ ntá tí jnkojínrá chrókjuásinrá jie̱ la chóntani ijnko nkexro tsonixjayákonhe̱nni nkayakon Itꞌéni Dios, tíha mé Jesucristo, la jehe chꞌán mé ijnko nkexro jína. 2 Jesucristo mé kꞌuenyákonhe̱nni chꞌán kíxin tí jie̱ chóntani; a̱ ntá jehya iji̱éni ó. Náhí. Iji̱é kaín chojni siín chjasintajni.

3 Tí tsitekaonni tí nkehe kꞌue̱to̱an Dios ntá tso̱noexínni chaxín kíxin chóxinni chꞌán. 4 A̱ ntá jnkojín nkexro ntáchro kíxin chóxin Dios, a̱ ntá titekakonhya tí nkehe tsíkꞌe̱to̱an Dios, la mé chꞌia la noehya tí nkehe chaxín. 5 A̱ ntá tí nkexro titekaon tí nkehe tsíkꞌe̱to̱an Dios la chaxín tjuèhe Dios; mé xi̱kaha noheni kíxin chaxín jnkoko̱á tjejókoni chꞌán. 6 Tí nkexro ntáchro kíxin chaxín tinkáchónki Dios chrókjuakꞌe éxí kjuákꞌe Jesucristo.

7 Kíchóni, méxra̱ tí nkehe tjékjian jehya ijnko nkehe ni̱xin tsíkꞌe̱to̱an Dios. Náhí. Tíha mé tí nkehe kꞌuayéhérá tí xrankíxixín, mé tí mandamiento ósé tjen, mé tí nkehe ó tsíkinhínrá. 8 Kjánchó tí nkehe ikjian mé yóhe̱ ijnko nkehe ni̱xin, éxí kjua̱ko̱xi̱n Cristo mé xi̱kaha tja̱ko̱xi̱nni, kíxin tí sítié la tinkákꞌitjáyan kíxin ijie la ó tꞌinkaséyanxín tí xrohi chaxín.

9 A̱ ntá tí nkexro tsontáchro kíxin ixri tí tꞌinkaséyan, a̱ ntá na̱xa̱ nínkakonhen kíchó, na mé tí xi̱kaha na̱xa̱ itjen tí sítié a. 10 A̱ ntá tí nkexro tjuèhe kíchó mé tjen tí tꞌinkaséyan, a̱ ntá xi̱kaha jína tjen, chóntahya jie̱ la chrókjuachruèhya chꞌán ninkexró kíxin chrókjuasin sín jie̱ ínaá. 11 A̱ ntá tí nkexro nínkakonhen kíchó mé tjejó sín la ko ixri sín tí sítié a la ko noehya sín nketí nó sátsji sín kíxin tí sítié la kjuíchꞌéna ntakótán sín.

12 Éxí xja̱nna tꞌíkua̱n tí jahará, la méxra̱ tjékjian tí xroon tsꞌayéhérá kíxin tso̱nohará kíxin kjuachaxin ihni̱é Dios kjuínchetjuáxinrá tí iji̱árá kíxin kꞌuenyákonhe̱nni Ìnchéni Jesucristo. 13 Jahará itꞌé xjan, ikjian tí xroon tsꞌayéhérá jahará kíxin choxínrá tí nkexro tjen tí xrankíxixín. A̱ ntá jahará ntasoírá kja̱xin ikjian tí xroon tsꞌayéhérá jahará kíxin kjuachará kíxin kjuachahya tí Jínahya chrókꞌue̱tua̱nhanrá.

Ikjian tí xroon tsꞌayéhérá jahará chánjanrá, kíxin choxínrá Itꞌéni. 14 A̱ ntá jahará itꞌé xjan ikjian tí xroon tsꞌayéhérá kíxin ó choxínrá tí nkexro itjen tí xrankíxixín tí na̱xa̱ tꞌónahya chjasintajni. Ikjian tí xroon tsꞌayéhérá jahará ntasoírá, kíxin na̱xa̱ fuérte̱rá, la ko kꞌuayéhérá tí itén Dios, la ko kjuachará kíxin kjuachahya Tsochren chrókꞌue̱tua̱nhanrá.

15 Chrótjuèhyará tí chjasintajni la ko ni tí nkehe siín chjasintajni. A̱ ntá tí chojni tjuèhe tí chjasintajni, na mé chaxínhya tjuèhe sín Itꞌéni Dios. 16 Kíxin ninkehó tí nkehe chrókjuanjon chjasintajni chrókui̱xi̱n tí tjen Itꞌéni Dios. Tí nkehe tjinkaon tsjanjon chjasintajni na mé tíhi, mé tí nkehe jínahya chrókjuichꞌeni, la ko tí chrókjuakꞌe a̱sénni tí nkehe tsꞌikonni, la ko tí kjuahnke xrikoni kíxin itsjé nkehe chróchóntani. 17 A̱ ntá tí chjasintajni sítinkákjeje̱ la ko tí nkehe jínahya tjenka̱yáxin chojni; a̱ ntá tí nkexro nchexiteyá tí nkehe tóxrjínhi̱n Dios mé tsꞌejó sín jnkochríxín.

18 Éxí xja̱nna tꞌíkua̱n tí jahará, la chrókónohará kíxin ó kuichjina tí ya̱on tsjixixín. Jahará ó kuínhínrá kíxin ó tsi tí nkexro nínkakonhen Cristo. A̱ ntá ijie tinkákónoxín nchónhya tí sín a, mé noexínni kíxin ó kuichjina tí ya̱on tsjixixín. 19 Jehe sín tsíkꞌaxrjekjanxín sín tí tjejóni; kjánchó chaxínhya kuinkáchónki sín éxí tinkáchónkini. Náhí. Tí chaxín chrókuinkáchónki sín éxí tinkáchónkini la chrókꞌuaxrjekjanxínhya sín tí tjejóni, na̱xa̱ chrókꞌuejókoni sín jnkoko̱á. A̱ ntá xi̱kaha kónhen kꞌuaxrjekjan sín kíxin tso̱noxín kíxin kuinkáchónkihya sín éxí tinkáchónkini.

20 A̱ ntá jahará la Cristo tsíkjanjon Ncha̱kuen chꞌán tsíkꞌayéhérá kaín rá, ntá jie tiénxinrá intsí kuènte chꞌán. 21 Ikjian tí xroon tsꞌayéhérá kíxin ó nohará tí nkehe chaxín, jehya kíxin chrókónoahyará; jahará la ó nohará kíxin nijnko kjuachꞌia ti̱xi̱nhya tí nkehe chaxín.

22 ¿Xá nkexro tí chꞌia? Mé tí nkexro ntáchro kíxin Jesús la jehya tí Cristo. Tí nkexro a mé nínkakonhen Cristo, mé titekakonhya Itꞌéni Dios la ko tí Xje̱en chꞌán. 23 A̱ ntá tí nkexro titekakonhya tí Xje̱en Dios la kja̱xin chóntahya sín tí Itꞌé chꞌán, a̱ ntá tí nkexro chrónka kíxin chóxin tí Xje̱en Dios mé kja̱xin chóxin sín tí Itꞌé chꞌán.

24 Méxra̱ tí nkehe tsíkinhínrá tí xrankíxixín la chróxráxinkáonrá jnkochríxín. A̱ ntá xi̱kaha tí chróxráxinkáonrá jnkochríxín tí nkehe tsíkinhínrá tí xrankíxixín, la kja̱xin xi̱kaha jnkoko̱á chrókuinkachónkirá tí Xje̱en Dios la ko tí Itꞌé chꞌán. 25 Kíxin Jesucristo tsíntáchro chꞌán kíxin tsjanjon chꞌán tí kjuachón jnkochríxín.

26 Méxra̱ xi̱kaha tjékjian tí xroon i tsꞌayéhérá kíxin chrókónohará kuènte tí sín tjinkaon chrókjuitꞌayahará. 27 Kjánchó jahará la ó chontará Ncha̱kuen Dios tsítjáhará Jesucristo, a̱ ntá xi̱kaha la í tꞌichjánxi̱nhya kíxin ókjé nkexro chrókjua̱ko̱ha̱rá, kíxin tí Ncha̱kuen Dios mé tja̱ko̱ha̱rá kaín xín nkehe, mé tjako tí nkehe jína la jehya kjuachꞌia tíha. A̱ ntá chaxín chrókuinkachónkirá Cristo éxí kjuako tí Ncha̱kuen chꞌán.

28 A̱ ntá jie éxí xja̱nna tꞌíkua̱n tí jahará, chrókui̱to̱éhyará chrókuinkachónkirá Cristo, kíxin tió tsi chꞌán la a̱ntsí chróchoxínrá chꞌán la ko chrókósuàhyará chrókóchjinará tió tsi chꞌán, 29 kíxin ó nohará kíxin Jesucristo la jína chꞌán. A̱ ntá chrókónohará kíxin kaín nkexro jína la xje̱en Dios tíha.