1 Ntá ntáchro chꞌín Jesús kíxin:

―Imá tjetoan tí nkehe tjétjo̱nka̱rá kíxin tí tsꞌixenhen ijnko chojni tí tꞌinkachjina kolélo ntá jehya puerta tí corral tꞌixenxín chꞌán na mé ókjé chrokꞌuixenxín chꞌán na mé xíche̱e tíha la tjinkaon chrókueé. 2 A̱ ntá tí nkexro tꞌixenxín tí puerta na mé nkexro tꞌayakonhen tí kolélo a. 3 La ko tí chꞌín tjetꞌayakonhen tí puerta a mé tsakitje̱he̱ chꞌán tí puerta a kíxin tsꞌixenhen tí nkexro chaxín tꞌayakonhen tí kolélo a. A̱ ntá tí kolélo a mé tsjatso̱an va itén chꞌán. Ntá tꞌíye̱xi̱n chꞌán jnkojnko ihni̱é jnkojnko tí kolélo kuènte chꞌán ntá tsꞌaxrjexín va nto̱e va. 4 Ntá tꞌikon chꞌán kíxin kꞌuaxrje kaín va ntá kuítonhen chꞌán va nti̱a ntá tinkáchréhe̱ va kíxin tjatso̱an va itén chꞌán. 5 Chrohya va tjichréhe̱ va ijnko chojni ókjé na mé tsinkéhe va tí chojni a kíxin tjatso̱anhya va itén ókjé chojni ―ichro chꞌán.

6 Mé xi̱kaha ntáchro chꞌín Jesús kjuíncheyóe̱xin chꞌán. Kjánchó tienxínhya sín nkexrí tꞌaxrjexín tíha.

7 Ntá chrónka chꞌín Jesús ínaá ntáchro chꞌán kíxin:

―Ijnko nkehe tjetoan tso̱tjo̱nka̱rá kíxin janhan la éxí tí puerta tꞌixenxín tí kolélo tí tꞌinkachjina va. 8 Kaín tí sín kuitónxin nti̱a kui senó mé xíche̱e la ko chrókueé. La ntá tí kolélo la ánto̱sén va tí nkehe ntáchro tí jehe sín. 9 Janhan mé tí puerta a mé tꞌixe̱nxínrá tí janhan mé tsaárá la mé tso̱yóha̱rá tí kolélo siín kjuachaxin tsꞌaxrjexín va tí kòrré va sátsjikjine va la ko siín kjuachaxin tsꞌixenhen va tí tsꞌinkachjina va ínaá.

10 ’A̱ ntá xíche̱e mé jehó chrókueé la ko tjinkaon chrókꞌóyán la ko chrókjuinchekꞌitjáyan kaín nkehe. A̱ ntá janhan kꞌuinka kíxin tsochontaxinrá kjuachón na mé kjuachón jnkochríxín. 11 Janhan mé ijnko pastor jína a̱ ntá tí pastor jína mé tsꞌenyákonhe̱n tí kolélo a. 12 A̱ ntá tí nkexro chꞌe xra̱ tjinkaon chrókjuacha ó na mé tsꞌikon chꞌán itsi ijnko kolobo tsíto̱he chꞌán tí kolélo sátsji chꞌán kíxin jehe chꞌán la jehya tí nkexro tꞌayakonhen tí kolélo la ko jehya kolélo kuènte chꞌán. Ntá tí kolobo mé tsotsé va tí kolélo ntá tsinká va la sátsjichroe va. 13 Mé xi̱kaha tí chojni tjinkaon chrókjuacha tí xra̱ chrókjuichꞌe ó la mé sátsji. A̱ ntá tí kolélo la ánto̱sén chꞌán kuáhya chꞌán kuenté tí jehe va.

14-15 ’A̱ ntá janhan mé ijnko pastor jína. Mé xi̱kaha Tꞌaná chóxin chꞌán tí janhan la ko kja̱xin janhan choxian tí jehe chꞌán mé xi̱kaha choxian janhan tí sín éxí kolélo kuènta̱na la ko jehe sín mé chóxin sín tí janhan. Ntá tsꞌényákonha̱n tí sín éxí kolélo kuènta̱na. 16 Kja̱xin chonta kolélo na̱xa̱ jehya kòrré va ntihi mé kja̱xin tꞌichjánxi̱n sátsjícakjián va. A̱ ntá tí tsitekakonna va ntá tsꞌóna jnkoko̱á kòrré va la ko jnkoko̱á nkexro tsꞌayakonhen va.

17 ’Tjua̱na Tꞌaná kíxin kjónté itsꞌén la tsoxechónna ínaá. 18 Kohya nkexro tsakitsjena tí kjuachón chonta janhan tí chrókjuánjonhya kjuachaxin. Chonta janhan kjuachaxin itsꞌén la ko chonta janhan kjuachaxin tsoxechónna ínaá. Tíhi mé kꞌue̱tua̱nna Tꞌaná ―ichro chꞌín Jesús.

19 Tió kuínhin tí sín judío tí nkehe ntáchro chꞌín Jesús ntá kjuankíxin jnkoko̱áhya kjuenka̱yáxin sín. 20 Nchónhya tí jehe sín ntáchro sín kíxin:

―¿Nkekuènté tinhínrá tí nkehe ntáchro chꞌán? Jehe chꞌán mé chónta chꞌán ncha̱kuen tí jínahya la ko lóco chꞌán ―ichro sín.

21 Ntá ikjé sín ntáchro sín kíxin:

―Xi̱kahya chrónixja ijnko chojni chónta ncha̱kuen tí jínahya. ¿Á ijnko ncha̱kuen tí jínahya la á jína chrókjuinchekꞌikon ijnko chojni tꞌikonhya? ―ichro sín.

22 A̱ ntá tí ncha̱kuen kin tí chjasin Jerusalén kꞌuíxin kia xraxinkakonxín sín tí ya̱on tsíkjixin tsíkꞌóna ni̱nko. 23 Ntá chꞌín Jesús itjen chꞌán tí ni̱nko tí nta̱sin kuènte Salomón. 24 Ntá tí sín judío kꞌuántatjen sín tí chꞌín Jesús kjuanchankíhi sín chꞌán kíxin:

―¿Hasta nkesá tsꞌejóchónhenni tsinhinni jína? A̱ ntá jie chro̱nka ntoá kíxin á chaxín jaha tí Cristo ―ichro sín.

25 Ntá kjuáte̱he chꞌín Jesús kíxin:

―Ó tjo̱nka̱rá ntá na̱xa̱ títekákonhyará. Kaín tí xra̱ tjétꞌa̱ janhan tí kjuachaxin kuènte Tꞌaná mé tja̱ko̱xi̱n nkexro tí janhan. 26 Kjánchó jahará títekákonhyará kíxin jahará la jehya kolélo kuènta̱na éxí tjo̱nka̱rá senó. 27 Tí kolélo kuènta̱na mé tjatso̱an va tí tanná la ko kja̱xin janhan tjátso̱an tí jehe va la ko jehe va mé chréhe̱ va tí janhan. 28 Janhan mé tja̱ha̱ va tí kjuachón jnkochríxín la í tsꞌitjáyanhya va la ko ninkexró tsjachahya tsakitsjexín va tjaná. 29 Ó kjuanjon Tꞌaná, mé tí nkexro tjetóxin tꞌe̱to̱an, na ninkexró tsjacha tsakitsjexín va tí tja chꞌán. 30 Janhan la ko Tꞌaná na mé jnkoko̱á nkexro tíha ―ichro chꞌán.

31 Ntá tí sín judío kuákja sín xro̱ chróchjéhe sín chꞌán ínaá. 32 Ntá kjuáte̱he chꞌín Jesús ntáchro chꞌán kíxin:

―Nchónhya nkehe jína kꞌuíkonrá kjuáko̱xia̱n kjuachaxin kuènte Tꞌaná. ¿Ntá nkekuènté chróchjìnárá xro̱? ―mé chro chꞌán.

33 Ntá kjuáte̱he tí sín judío kíxin:

―Jehya tí kjuaxroan jína tjásian chrótjiáxiánni xro̱. Náhí. Jaha ijnko chojni ó ntá kjui̱ncheyóhé a̱sán Dios na mé tsotjiáxiánni xro̱ ―ichro sín.

34 Ntá ntáchro chꞌín Jesús kíxin:

―Ntá ntáchro xroon itén Dios tsíkjin sín ósé kíxin ntáchro Dios kíxin: “Kja̱xinrá éxí Dios tí jahará.”* Salmo 82.6 35 Ntá ó noheni nkehe ntáchro xroon itén Dios na ntá xitjahya tsitekakonhyani tíha. Mé xi̱kaha ntáchro Dios kíxin éxí Dios jnkojnko nkexro kꞌuáyéhe̱ itén chꞌán. 36 A̱ ntá kjueyána Dios ichrꞌánna chꞌán chjasintajni, ¿ntá nkekuènté ntáchrorá kíxin kꞌuántaxínha̱n Dios kíxin janhan ntáxrja̱n kíxin Xje̱en Dios tí janhan? 37 Kja̱ tí chrókjui̱tꞌahya tí xra̱ ichꞌe Tꞌaná la chrókuítekákonhyará. 38 A̱ ntá kjónté tjétꞌa̱ tí xra̱ a kjónté títekákonhyará tí janhan na mé chrókuítekáonrá tí xra̱ tjétꞌa̱ chrókónoaxínrá chrókiénxinrá kíxin Tꞌaná la ko janhan mé jnkoko̱á tjékian chꞌán ―ichro chꞌán.

39 Mé xi̱kaha chrótsé sín tí chꞌín Jesús ínaá chrókꞌuikjéhe̱ chꞌán ntá kjuachahya sín ntá sákjuí chꞌán.

40 Ntá chꞌín Jesús xíkjan chꞌán tí í jnko lado nta̱río Jordán ínaá tí kꞌuékjakꞌe chꞌín Juan kꞌuéki̱ki̱texín chꞌán chojni senó. 41 Ntá nchónhya chojni sákjuíchréhe̱ sín chꞌán tsꞌikon sín chꞌán ntáchro sín kíxin:

―Chaxín chꞌín Juan kjuasinhya chꞌán kjuaxroan jié la kjónté ntoá tí nkehe chrónka chꞌán kuènte tí chꞌín i ―ichro sín.

42 Ntá nchónhya sín kuítekaon sín tí chꞌín Jesús tí kjuíji sín ntiha.