5
Maikka Veriktem Se Uut Marevan
1 Ma Kristus dai sa qa veriktem se uut be qurl uut per aa arlim, ip kuasik mager iv ama Lo ngere uas tem uut. Taqurla dai be maikka mager ip ngen deraarl malkuil. De saqias kuasik mager iv a ngen a ding se ama tekmeriirang iv iirang ngere kuap per a ngen.
2 Ngene narli. Ngua ma Paulus i ngul sil ba ngen, ai ariq aiv a ngen a ding se liina ip te sesik men a ngen a qetdengiit, dai ma Kristus aa rletki dai maikka quasik mager ip kia raat never a ngen. Maikka quasik. 3 I ngen ama quatta mai i a ngen a ding se liina i ip te sesik per a ngen, dai ngu narliip saqiaskerlka ngu raqal sil ba ngen ma’, ‘Ariq aip ngene tekmet ne liina raqurla, dai saqikka mager ip maikka ngene taqat mit kut ngen ama Lo mai.’ 4 De ariq aip ngene narliip ngen diit kur ama Lo, i ne liina i ngene narliiv ama Ngemumaqa qa tis ngen ai ama seserlta na ngen, dai sa ngen mit nemen ma Kristus. De ngen mit nemen ama Ngemumaqa aa ngimsevetki.
5 I qatikka ne ama Qevepka ama Glasingaqa aa dlek dai uut tu auur a qevep sever ama Ngemumaqa. De qurl uut de ver a qa ip ka tis uut ai ama seserlta. 6 De ariq aiv iak i qurli qa men ma Kristus, dai liina i re sesik men aa qetdengiit dai quasiq a qeni. De luqa i aa tekmeriirang i quasik ta sik per a qa dai saqikka quasiq a qeni. Dap luqa i aa tekmeriirang i qa tu aa qevep de rlas tem ka mene ma Kristus dai liina nge taarl na qa ip maikka qe rarliq iari, dai liina dai maikka ama barliini.
7 Mekai dai ai de ngene taqat dadem ma Kristus aa aiska. Dap nemka qa vesdet men ama aiska be sa quasiq ai ngen diit kur ama lengi ama revan nget? 8 Lunger iara ama tuaqevep i iara ngen diit kut nget, dai quasiq ai nget nagel ama Ngemumaqa. I ngen, dai ai de ama Ngemumaqa qes nes tem ngen.
9 Be ngen drlem, ai iang ama lengi muqas dai nget ip taquarl ama Yis i ama langas na nget dap mager ip ngere tekmet ne ama plaua mai ip ngere riirl ama bret. 10 Dap ngua tu gua qevep ai diiv ama Slurlka qa tat never a ngen be diip kuasik ngene taneng a qeng ama tuaqevep muqas. I quasik nguat drlem aip nemka qa tit se a ngen a tuaqevep puuqas. Dap kuasiq a qeni, i qatikka luqa dai diip ke raneng ama ranbandem sever ama viirang arle ves.
11 Gua rluavik, ariq ama revan i qatiaskerl ai de ngul sil ne ama lengi bareq ama qaqet ip maikka mager ip te sesik per ama quatta, dai dap katiaskerl ngu lu nanaa be re tekmet ne ama vu sagel ngua? Dai ariq aip ngu tuqun a ra ip te sesik men ama qetdengiit per ama quatta, dai ama lengi sever ama lalemka, dai liina dai quasiq ama dlek pem iini de diip kuasik te serlin sever iini arle ves. 12 Dai lura ama qaqet i ra tit se a ngen a tuaqevep puuqas, de re dlek se liina ip te sesik men ama qetdengiit. Dap katikka ani mager ip te sesik per a nas de re sik naset ngen araa quvel mai.
13 Guariqena, maikka ama revan, i sa ma Ngemumaqa qa nes tem ngen ip mager ip kurli ngen per aa arlim. Dav arik ma ngen dru a ngen a qevep ma’, “Uut dai sa ma Kristus ka veriktem se uut. Taqurla dai be qua mager iv uure tekmet ne ama rutka ama murlaska aa tekmeriirang?” Kuasik.
Maikka quasik mager ip ngen dru a ngen a qevep taqurla. Dap ngen i iak de iak dai qatikka mager ip ngen derat never iari ama qaqet i ama Ngemumaqa aa uis. De mager iv a ngen arlem never a na.
14 I ama Lo mai dai nget mai ve liini iara ama lengi iini ma’,
‘Maikka mager ip ngi rarlik gia ari ip katikka raquarl ai de ngi rarlik nas.’
15 Dap katikka arik parlen me ngen dai ngene serlin de ngene uamet nana maden, dai mager ip ngenet lu. I qatikka arik ma ngen lenges nanas mai.
A Qevepka Ama Glasingaqa De Ama Rutka Ama Murlaska Ian A Gamansena
16 De gua lengi dai raqurliani, maikka mager iv a ngen a ding se ama Qevepka ama Glasingaqa ip ke ruirl se a ngen aatmires. I ariq aip ngene tekmet taqurla, dai quasik mager ip ngen diit kur ama aatmires ama murlases angera narliip.
17 I uut drlem, ai ama rutka ama murlaska dai qe narliip ka sev ama Qevepka ama Glasingaqa aa uuves.
De ama Qevepka ama Glasingaqa dai qe narliip ka sev ama rutka ama murlaska aa uuves. I iam dai ian a qumes-iam nana.
Be liirang aa i ngene narliip ngene tekmet niirang, dai quasik mager ip ngene tekmet niirang. 18 Dai be arik ngen diit naser ama Qevepka ama Glasingaqa, dai quasiq ai ama Lo ngere uas tem ngen.
Ama Tekmeriirang Na De Auura Ran I Ama Viirang
19 Dai sa ngen drlem se ama rutka ama vuqa aa gamansena.
I ama tekmeriirang dai iirang muqasmuqas taqurliani;
Liina i re nanna maden maden, de liina i ra tu ama qevep sever ama viirang taqurla.
De liina i ama rutka qa taarl ip sever ama viirang.
20 De liina i re lautu sever ama Sinap ngen ama iaus de ngen iang ama lautu ama kaak nget.
De liina i re tekmet ne ama qenang muqas muqas.
De liina i ama qumespik nana, de ama qurek per ama rutka,
De ama vu ama rutka,
De liina i re rarliq iari araa quvang iirang.
De liina i qatikka re rarlik nas,
De liina i ra taqen sagelna maden be re barlmet ne ama qaqet araa liin.
21 De liina i maikka ama vu ama rutka sevet lura i qurli ra maget, de liina i re srluuv ama qerlap be re kabaing,
De liina i re ngelanges, de liina i res nes slep maden maden,
de qatikka liirang aa maden maden taqurla.
De qasa mekai ngua sil ba ngen, dap saqiaskerlka ngua tit pet lungera ama lengi. Be lura mai i re tekmet ne liirang aa raqurla, dai quasik mager ip diip ta ran sever ama Ngemumaqa aa luqupki.
Ama Qevepka Ama Glasingaqa Dai Aa Tekmeriirang i Qe Qurl Auut
22 Dav ama Qevepka ama Glasingaqa dai ai de qa taarl ne auur a rut iv uure tekmet ne ama tekmeriirang ama atlu iirang taqurliani;
Liina i maikka re rarliq iari,
De liina i ama arlias sagel ama Slurlka
De liina i ama uupka dama rlan
De liina i quasiq ai masmasna rletrlet per ama qaqeraqa
De liina i ra tat never iari de re tekmet ne ama atlu sagel ta
De liina i qatikka ama seserl ama aatmires masmas
23 De liina i ama sungsung ne ama qaqeraqa
De liina i ren bin ama rutka ama murlaska aa gamansena manep.
Dai maikka quasiq a qeni never ama Lo nge qel a qeni nevet liirang aa ama tekmeriirang. 24 Be lura mai i ama quatta ngen ama nankina i ra nemen ma Iesus Kristus aa liinka, dai ra miirl ama aatmires ama murlases de ngen ama a narliiv ama vu nget, i lungera i re narliip se iari araa tekmeriirang. Dai sa ma Kristus ka ngip men ama lalemka sevet liirang aa.
25 De ama Qevepka ama Glasingaqa dai qa qurl auut te ama iames. Taqurla dai maikka mager iv auur a ding se ama Qevepka ama Glasingaqa ip ke ruirl se auur aatmires mai.
26 De maikka quasik mager ip naqatikka uut taarl ne iari araa rut ip te uamet. De quasik mager iv uure narliip se iari araa quvang iirang.