1 Juan
¿Rasunpachu Jesucristoga noganchïno tulluyoj y aychayoj caran?
¿Picunataj caycan Tayta Diospa rasun caj wamrancunaga?
¿Pitaj isquirbiran? Cay libruchöga jutinta manami willacunchu. Ichanga ermänucuna imaypis nisha cay libruta apóstol Juan isquirbishantami.
¿Picunapätaj isquirbiran? Cay cartata Juan isquirbiran sumaj rejsishan ermänucunapämi. Waquin yarpan Efesucho caj ermänucunapaj isquirbishantami.
¿Imaytaj isquirbiran? Waquin yarpan wata 90 d.C. wichan isquirbishantami.
¿Imataj caycan cay librucho? Cay rimir caj San Juan cartachöga fäsi tantiyana rimaycunawanmi willapaycämanchi. Yachaycächishanta ishcay u quimsa cutimi cay cartacho cutipan. Quimsa yachachicuypämi parlaycan: 1) Chaycho niycan noganchi runano rasunpa tulluyoj y rasunpa aychayoj Jesús shamushantami. 2) Ermänucuna alli ricanacur cuyanacunanpäpis niycan. 3) Jucha ruraycuna imano cashanta y Tayta Diospa wamrancuna imano cashantapis niycan.
Chay wichan llutan yachachicojcunaga yachachej runacunapa cuerpun pasaypa mana alli cashantami. Chaymi paycuna mana riguejchu noganchi runano Tayta Diospa wamran shamushanta. Chaura Juanga achca cuti niycan chay llutan yachachicojcuna llutanta yarpaycashanta (1.1–4; 2.20–25; 4.1–6; 5.1–12).
Ermänucuna alli ricanacur cuyanacunanpaj achca cuti riman (2.7–11; 3.11–24; 4.7–21). Jesusga Tayta Diospa wamran caycarpis noganchïno runamanmi ticraran y noganchi-raycumi wañuran. Chayno caycaptenga jucninchi-jucninchïpis cuyanacushun (2.5, 6; 3.16; 4.8–12).
¿Picunataj caycan Tayta Diospa rasunpa wamrancuna? Tayta Diospa rasunpa wamrancunaga caycan juchanpita cunfisacojcunami y Tayta Dios munashanno cawajcunami. Chaymi mas alli caycan Tayta Diosta wiyacur jucnin-jucninpis cuyanacushan. Chayno cawajcunami mana ushacaj cawayta tarenga (1.5–2.2; 2.28–3.10; 5.13–21).
1
Gallarinan
1 Gamcunaman isquirbimö Cawachicoj Palabrapitami.* Cawachicoj Palabra niycan Taytanchi Jesucristupämi. Payga gallarinancho imapis manaraj captin maynami caycaran.* Juan 1.1; 1Juan 2.13–14 Nogacunaga rimashantami wiyashcä. Quiquintami ñawëwan ricashcä. Maquëwanpis yatashcämi.* Juan 1.1, 4; 6.68 2 Paytaga cawachicoj captin Tayta Diosmi cachamur rejsichisha. Nogacunaga payta ricashcämi.* Juan 1.14, 18 Chaymi gamcunata willapä mana ushacaj cawayta tarinayquipaj. 3 Ricashäcunatami, wiyashäcunatami willapä gamcunapis nogacunawan juc yarpaylla caycänapaj. Rasunpa juc yarpayllami cawanchi Tayta Dioswanpis, wamran Jesucristuwanpis. 4 Caycunataga isquirbimö fiyupa cushisha cawananchïpämi.
Tayta Dios achquino cashan
5 Cananga Jesucristo willapämashantami willapäshayqui. Payga nimasha: «Tayta Diosga achquimi. Pay cashanchöga ima chacaypis manami canchu» nir. Chay nimashantaga llapantami willapaycä. 6 Chaymi chacaycho puriycar «Tayta Dios munashannömi cawaycä» nerga llullacuycanchïmi. Manami rasun cajtachu ruraycanchi. 7 Tayta Diosninchi munashanno cawarmi ichanga achicyajcho puriycanchi. Chayno caycanchi Tayta Diosga achqui captinmi. Chaymi jucninchi-jucninchïpis cuyanacur alli ricanacunchi. Chaynöpis Tayta Diospa wamran Jesús yawarninta jichashanwanmi llapan juchanchïpita perdunamanchi.
8 «Manami juchata rurashcächu» nerga quiquillanchïmi engañacuycanchi. Manami rasun cajtachu rimaycanchi. 9 Mana pacaypa «Juchayojmi cä» nishami ichanga Tayta Diosninchi perdunamäshun. May-jina juchasapa captinchïpis payga alli carmi, cuyapäcoj carmi perdunamanchi. 10 «Manami juchayojchu cä» nerga Tayta Diostami llullata-japuy ricaycanchi. Tayta Dios «Llapan runapis juchayojllami» nishancunata manacajmanmi churaycanchi. Chayno carga willacuyninta manami rasunpa chasquicushcanchïrächu.* Prov. 20.9