1 Ay imanöraj canqui jucta illgächej.

Gamtaga manarämi illgächishunquirächu.

Ay imanöraj canqui juccunata engañaj.

Manami engañasharächu caycanqui.

Illgächiyta ushaycorga quiquiquipis illganquipämi.

Juccunata engañayta ushaycuptiquega quiquiquitapis engañashunquipämi.

2  Tayta Dios, nogacunataga cuyapaycamay ari.

Nogacunaga gammanmi yäracaycämö.

Cada tuta yanapaycamay ari.

Ñacaycunacho caycashä örapis salbaycamay ari.

3 Busniqui junrurumushanta wiyaycur runacunaga gueshpirmi aywacun.

Rabyar jataricurcuptiquega llapan nasyun runacunami machiypa-machir aywacun.

4 Gueshpir aywacushanpa cösancunatanami contrancuna charicarcärin.

Chüpacacunanömi llapanta ushacarcärin.

5 Munayniyoj Tayta Diosga syëluchömi tiyan.

Paymi camacächisha Sioncho alli cajta, rasun cajta rurananpaj.

6 Paymi imapitapis imaypis chapanga.

Paymi salbanga, sumaj yachayta gonga, sumaj tantiyachenga.

Tayta Diosta rispitar yäracushanga canga ima-aycatapis charashannömi.

7 Masqui wiyay, jinyu runacunaga imanöshi llaquicurcaycan.

Alli goyänanpaj parlaj cacha aywajcunapis imanöshi wagarcaycan.

8 Nänicunapis chunyajmi ricacusha.

Pipis manami purinnachu.

Alli goyänanpaj parlacushantapis manami cumlinnachu.

Manami mayganpis rispitanacunnachu.

9 Allpaga fiyupami chaquicäcusha. Imatapis mana wayuchinnachu.

Líbano muntipis wañuytacäcushami.

Sarón guechwapis chunyaj chaqui jircanami ricacusha.

Basán puntawan Carmelo puntapis garayashami caycan.

10  Tayta Diosmi cayno nin:

«Cananmi castigayta gallaycushaj.

Cananmi musyachishaj munayniyoj cashäta.

11 Gamcuna rurayta yarpaycashayquiwan rurashayquipis caycan ogshanölla, rïgu päjanölla.

Chayno captinmi pücarcuptillä jämaynëga nina rupacurcojnöpis usharengapaj.

12 Juc-lä nasyun runacunaga rupar uchpayajnömi ushacangapaj.

Cashata muturcur sindipaycusha nina ratarir ushacurcushannömi illgangapaj.»

13 Carucho tiyajcuna wiyay-llapa imano rurashätapis parlajta.

Sercacho caycajcunaga tantiyacuy ari munayniyoj cashäta.

14 Juchayojcunaga Sioncho sicsicyanmi.

Diosman mana yäracojcunami fiyupa mancharishpan cayno nircaycan:

«¿Mayganchïraj awantashwan rupar ushacoj ninataga?

¿Mayganchïraj cawaycushwan imaycamapis mana upej ninachöga?» nir.

15 Alliga cawanga

alli cajllata ruraj cajmi,

rasun cajllata parlaj cajmi,

rïcuyänanpaj firsapita pipa imantapis mana guechoj cajmi,

faburnin cananpaj pacayllapa pägaptinpis mana chasquej cajmi,

wañuchinanpaj shimita goptinpis mana chasquej cajmi,

mana allita ruraycajta mana ricananpaj witicoj cajmi.* Sal. 15.2–5; 24.3–5

16 Chayno cawaj cajmi alli pachacho cawanga.

Chay runaga goyanga gagacho rurasha caycaj pacacunachönömi.

Chay runapaga micuyninpis yacupis manami pishengachu.

17 Rayta ricanquipaj munayniyoj cuyayllapaj caycajta.

Nasyunpa lindancunapis mas carucamami canga.

18 Fiyupa manchacur goyashayquita yarpärir ninquipaj:

«¿Cananga maytaj impuestuta pägashanta yupajcuna?

¿Maytaj ayca imano lasashantapis ricajcuna?

¿Maytaj ricachacuna törricunata yupaycajcuna?» nir.

19 Manami ricanquipänachu mana rispitacoj runacunata,

mana tantiyashayquita parlajcunata,

mayganpis mana tantiyashanta talluypa tallur rimajcunata.

20 Imaypis rispitädu fistata ruracunanchi Sión siudäta masqui ricäriy.

Alli goyay cashan Jerusalén siudäman masqui ricäriy.

Chay siudäga cangapaj witichinalla tolduta ichichiptin

istägancuna mana achucajno,

chutaraycaj wascancunapis mana rachicajno.

21 Chaychömi noganchïtaga Tayta Dios musyachimäshun munayniyoj cashanta.

Chaypaga päsangapaj achca mayucunami, jatuncaray sicyacunami.

Chaymanga chiquinacushanchïcuna manami yaycongapächu

tacsha büquicunawan ni jatuncaray büquicunawanpis.

22-23 Chay büquicunapa wascancunapis

manami watarangapächu guerun ichirajcunaman.

Wayra tangananpaj bëlunpis manami mashtacangachu.

Chaynöga cangapaj Tayta Dios juezninchi captinmi.

Paymi caycan layninchïta ruraj; Paymi rayninchïpis.

Paymi salbamäshunpaj.

Chauraga chiquinacushanchïpa ima-aycantapis aypallatami guechushunpaj.

Guechurcur raquipänacushaga gapracunapis chasquengami.

Wegrucunapis yaycongapämi ima-aycantapis guechur apacunanpaj.

24 Sioncho tiyajcunataga llapan juchanpitami Tayta Dios perdunanga.

Chaycho tiyäga manami pipis «Gueshyaycä» nengapächu.