53
1 ¿Piraj riguiran noganchi willacushanchïtaga?* Rom. 10.16
Tayta Diosga ¿pitataj munayniyoj cashanta musyachisha?* Juan 12.38
2 Tayta Diosga munasha mallwa lanta wiñar
chaqui allpaman sapichashanno sirbejnin wiñanantami.
Payga manami cuyayllapaj buyna-mösupischu caran.
Manami ricapänapänöpischu caran.
3 Runacunaga manacajman churaj; fiyupa jamurpaj.* Sal. 22.6–7; Isa. 49.7
Payga fiyupa nanaywanmi ñacasha.
Pipis manami ricäriyta munajchu.
Manacajmanmi churaranchi.
Paytaga manami cäsojchu canchi.
4 Chaypis payga ñacaycaran noganchi ñacananchïpaj cajtami.
Noganchi nanächicunanchïpaj cajtami payga nanächicuycaran.* Mat. 8.17
Noganchëga yarparanchi Dios payta chayno ñacaycächishanta,
chayno castigaycashanta, pasaypa manacajman churaycashantami.
5 Ichanga noganchi Diosta mana wiyacushanchïpitami juchayoj runatanöpis tucsiran.
Noganchi mana allita rurashanchïpitami fiyupa ñacachiran.
Pay ñacashanpitami noganchi alli goyayta tarishcanchi.
Payta däñar-ushashanpitami noganchëga allchacashana caycanchi.* 1Ped. 2.24
6 Llapanchïmi uyshacunano ogracasha carcaycashcanchi.* 1Ped. 2.25
Cada-ünunchïmi quiquinchi munashanchïno goyäcushcanchi.
Ichanga juchanchïcunapita paylla ñacananpämi Tayta Diosga camacächisha.
7 Payga ñacachiptinpis upällallami cacusha.
Paytaga aparan uyshata pishtananpaj apaycajnömi.* Apoc. 5.6
Manami ni juc shimillapis rimacuranchu.
Payga millwanta rutuptin uysha upällalla wiyaräcushannömi upällalla cacuran.
Manami ni juc shimillapis rimacuranchu.
8 Imatapis mana allita mana ruraycaptinmi jusgananpaj prësu apasha.
Paytaga manami pipis washaranchu.
Paypäga manami pipis yarpachacuranchu.
Paytaga juchanchïcunapitami wañuchiran.* Hech. 8.32–33
9 Fiyu runacuna pamparänanmanmi pampanan caran.
Chayno caycaptinpis rïcu runa pampacunanmanmi pampaycäriran.
Chaynöga ruraran pitapis mana allita mana rurasha captinmi
pitapis mana engañaypa willapasha captinmi.* 1Ped. 2.22
10 Tayta Diosmi chayno manacajman churaypa ñacachiyta munaran.
Sirbejninnami llapan juchayojcunapa ruquin wañunan caran.
Chaypitami payga unaycama cawanga.
Paypita mirajcunatapis ricangarämi.
Tayta Dios munashancunataga llapanta paymi ruranga.
11 Ñacashanpitaraj chaycunata ricar fiyupami cushicongapaj.
Tayta Diosta sirbëga achcajtami salbangapaj.
Payga achcajpa juchantami apanga.
12 Chaypitami paytaga Tayta Dios mas alliman churanga.
Chaychöga munayniyojcunawan iwalmi alli cajta chasquengapaj.
Chaynöga chasquengapaj wañushanpitami,
juchayojcunano ñacashanpitami.* Mar. 15.28; Luc. 22.37
Rasunpa payga aypalla runacunapa juchantami aparan.
Juchayojcunapäpis ruwacur mañacusha.