Jeremías
¿Imataj päsan llapanpis mana allina llojshipämaptinchi?
¿Tayta Diosninchïmanchu aywanchi o paypita gueshpicunchïchu?
¿Pitaj caran? Jeremías ninan caycan «Tayta Dios alliman churan» ninanmi. Pay caran Jerusalenpa sercancho caycaj tacshalla Anatot marcapitami. Cüra famillyami caran. Tayta Dios gayashan öraga wamra mösullami caycaran. Ichanga Tayta Dios nishanta llapantami willacuran chuscu chunca (40) watantin.
¿Maychötaj willacuran? Tayta Diospa willacuyninta Jeremías willacuran Judá nasyuncho caycaj Jerusalenchömi.
¿Imaytaj willacuran? Tayta Diospa willacuyninta Jeremías willacuran Joacim y Sedequías Judäpa raynin cashan-wichanmi (626–585 a.C.). Chay wichan Judá nasyun runacunataga Egipto y Babilonia nasyun runacuna charicurcuyta munaycaran.
¿Imataj caycan cay librucho? Capítulo 1–25 caycan Jeremías willacushan y artita rurashancuna. Chayno artita rurashpanmi musyaycächiran manapis aycällatana Judá y Jerusalén runacuna castigasha cananpaj cashanta. Judá runacunaga manami Tayta Dios munashannöchu cawaycaran. Chaypa ruquin juc-lä nasyunpa diosnincunata aduraj. Pasaypa Tayta Diospa contranmi ricacuran. Tayta Diosllaman yäracunanpa ruquin juc-lä nasyun runacunawan parlacuran. Tayta Dioswan conträtu rurashanta mana cumliycarpis Judá runacunaga yarpaj Jerusalenta y Templunta illgächinanta Tayta Dios mana camacächinanpaj cashanta.
Capítulo 26–45 rimaycan rimëru willacushancuna cumlicashanpaj. Chaychömi rimaycan yapay mushoj conträtutana rurananpaj cashanta (30–33). Capítulo 46–51 rimaycan nasyuncunata imanöpis päsananpaj cashantami. Capítulo 52 rimaycan Jerusalén imanöpis ushacashantami. Chaynöpami musyaycächimanchi Jeremías rasunpa profëta cashanta.
1
Gallaycunan
1 Cay libruchöga willacuycan Hilciaspa wamran Jeremías willacushanpämi y rurashanpämi. Jeremiasga caran cüra castapita mirar aywajmi. Payga Benjamín trïbu tiyashan Anatot marcachömi tiyaran.* 1Rey. 2.26–27 2 Amonpa wamran Josías* 2Rey. 22.3–23.27; 2Crón. 34.8–35.19 chunca quimsan (13) watana Judäpa raynin caycaptinmi Jeremiastaga willacunanpaj Tayta Dios willaparan. 3 Josiaspa wamran Joacim* 2Rey. 23.36–24.7; 2Crón. 36.5–8 Judäpa raynin cashan wichanpis Tayta Diosga Jeremiasta willapaycaranmi. Josiaspa jucaj wamran Sedequías* 2Rey. 24.18–25.21; 2Crón. 36.11–21 chunca juc (11) wataman aywaj pichga quillana Judäpa raynin cashan wichancamapis willapaycaranmi. Chay wichanmi Sedequiasta, Jerusalencho tiyaj runacunata juc-läman prësu apacuran.
Jeremiasta Tayta Dios gayashan
4 Tayta Dios gayarcamar cayno nimaran:
5 «Mamayquipa pachancho manaräpis yuriptiqui gamtaga maynami rejsishcä.
Manaräpis mamayqui gueshyacushuptiqui maynami acrarä.
Gamtaga maynami distïnuyquita gorä nasyuncunapaj profëta canayquipaj.»* Isa. 49.1; Gál. 1.15
6 Chayno nimaptin noga nirä: «Tayta Dios, nogaga wamra mösullarämi cä. Manami imano parlaytapis camäpacörächu.»
7 Chayno niptëpis Tayta Diosga nimaran: «Ama ‹wamrallarämi cä› niychu. Gamga maymanpis noga mandashämanmi aywanquipaj. Noga nishätami willacunquipäpis. 8 Pitapis ama manchacuychu. Nogami imapitapis chapäshayqui. Noga Tayta Diosmi chayno në.»
9 Chayno nimarmi Tayta Diosga shimi wirpäta yataycamar nimaran:
«Nogami yarpayta goshayqui gam parlanayquipaj.
10 Cananmi gamta churä nasyuncuna, mandajcuna munayniquicho cananpaj.
Chaymi gamga paycunata jorgunquipaj; waquintana sajtarinquipaj.
Waquintana illgächinquipaj; waquintana tunichinquipaj.
Waquintana alliman churanquipaj; waquintana sumaj jamachinquipaj.»
11 Chayno nimarmi Tayta Diosga tapumaran: «Jeremías ¿imatataj ricaycanqui?» nir.
Chaura noga nirä: «Ñawin wiñamoj almendro yörapa rämantami.»
12 Tayta Diosna nimaran: «Au, rasunpami. Chay yörapa ñawin wiñamushannömi nogapis manapis aycällatana cumlishaj gamta willacachishäta.»* Isa. 55.10–11; Eze. 12.28
13 Tayta Diosga yapay tapumaran: «¿Cananga imatanataj ricaycanqui?» nir.
Chaura noga nirä: «Manca timpuycajtami. Timpushpan nortipita puwamunanpämi caycan.»
14 Chaura Tayta Dios nimaran: «Chaynömi cay nasyuncho tiyajcunamanga nortipita fiyupa manchariypaj ñacaycuna chayamongapaj. 15 Norte caj-lä nasyuncunacho tiyajcunata llapantami gayamushaj. Noga Tayta Diosmi cayno në.
«Chay runacunaga rayninwan-camami shamongapaj.
Jerusalenman yaycuna quiquin puncucunachömi mandananpaj sillunnincunata churacarcärengapaj.
Sillunnincunata mandananpaj churacarcärenga curalaraycaj perga wajtancunachömi,
Judá nasyuncho caycaj llapan siudäcunachömi.
16 Chay siudäcunacho tiyaj runacunataga juchata rurashanpitami castigashaj.
Paycunaga nogatami gongaycamasha.
Juc-lä nasyun runacuna ‹diosnë› nishancunallapämi insinsutapis goshtachisha.
Quiquincuna diosnincunata rurarcurmi adurasha.
17 «Gam ichanga Jeremías, sumaj balurchay. Paycunaman ayway. Noga nishäta juctapis mana gongaypa willapanqui. Paycunataga imanillarpis ama manchacuychu. Paycunata manchacuptiquega nogapis paycunapa ñaupancho gamta mancharachïmanmi. 18 Cananmi gamta noga churaycä sumaj curalasha caycaj siudäno, fyërru tushano, runsipita tapya caycajno jinyu canayquipaj.* Jer. 15.20 Chaynöpami intëru Judá nasyuncho tiyaj runacunawanga mana manchacuypa llapanwan parlanquipaj. Parlanquipaj Judá nasyunpa raynincunawan, mandajnincunawan, cürancunawan, llapan runacunawanpis. 19 Paycunaga gamwan pillyangapaj. Ichanga manami binsishunquipächu. Nogami chapäshayquipaj. Noga Tayta Diosmi chayno në.»