Miqueas
¿Acrashan runacunapita imatataj Dios munan?
¿Imanirtaj marca-masincunapaj Miqueas llaquicun?
¿Pitaj caran? Miqueas ninan caycan «¿Pitaj Tayta Diosno?» ninanmi. Pay caran chacra runami. Payga caran Jerusalenpa sercan Moreset jutiyoj marcapitami.
¿Maychötaj willacuran? Norte cajcho Miqueas willacuran Israelpa capitalnin Samaria ushacänanpaj cashantami. Jerusalenchöpis willacuran mana allita ruraj mandajcuna castigasha cananpaj cashanta.
¿Imaytaj willacuran? Profëta Amós, Oseas y Isaías cashan-wichanmi Miqueaspis profëta caran. Chay-wichanga Jotam, Acaz y Ezequiasmi Judächo ray caran (742–687 a.C.).
¿Imataj caycan cay librucho? Miqueasga Samariapa y Jerusalenpa mandajnincunata mana manchacuypami willacuran. Chay mandajcunataga suwacushanpita y pobricunapa chacrancunata guechushanpitami piñacuran (1–3). Chaynöpis willacuycan arpinticuptin Jerusalenta salbananpaj cashanta y allina goyänanpaj cashanta (4–5). Nircur willacuycan castïgu cananpaj cashanta y salbananpaj cashanta. Chaynöpis payga llaquicuran Israelcuna pasaypa mana alliman chayashanpita (6–7).
Miqueas sumaj tantiyachicuycan imata rurananchïta Tayta Dios munashantapis. Chaymi palabrancho niycan: «Payga munan: Alli cajllata ruranayquitami, pï-maytapis cuyanayquitami, imata Tayta Dios nishushayquitapis wiyacur cumlinayquitami» (6.8).
1
Samaria runacunata Tayta Dios jusgananpaj cashan
1 Miqueas tiyaran Moreset marcacho. Paytami Tayta Dios willaparan Samaria, Jerusalén siudäcuna imano cananpaj cashantapis. Chayga caran Jotam,* 2Rey. 15.32–38; 2Crón. 27.1–7 Acaz,* 2Rey. 16.1–20; 2Crón. 28.1–27 Ezequías* 2Rey. 18.1–20.21; 2Crón. 29.1–32.33 Judächo ray cashan wichanmi.
2 Tayta Dios rimachiptin Miqueas cayno niran:
«Llapaniqui runacuna wiyay.
Intëru nasyuncho tiyajcuna wiyashpayqui sumaj tantiyacuy-llapa.
Munayniyoj Tayta Diosmi rispitädu Templunpita-pacha
nishunquipaj juchata rurashayquicunata.
3 Tayta Diosga tiyaycashan cajpitami llojshimonga.
Nircorga puntallanpami shamonga.
4 Pay lluchcashan cäga
puntacunapis chullucäconga
ninaman sërata churaycuptin chullucäcojnömi.* Sal. 97.5
Guechwa pampacunapis
aypalla yacu aywar ragrarishannömi ragracäconga.
5 Chayno canga Jacobpita miraj Israelcuna mana wiyacoj cashanpitami,
juchata rurashanpitami.
¿Maychötaj caycan Jacobpita miraj Israelcuna jucha rurashanga?
¡Jucha rurashanga Samariachömi caycan!
¿Maychötaj caycan Judäpita mirajcuna jucha rurashanga?
¡Jucha rurashanga Jerusalenchömi caycan!»
6 Chaypitami Tayta Diosga cayno nin:
«Samaria siudä ushajpaj juchunanpämi camacächishaj.
Übasta lantananpaj yapyasha caycaj chacranömi ricaconga.
Chay siudäpa perga rumincunatapis guechwa ragrapami mashtarishaj.
Chayno rurariptë simintuncuna cashanpis alayrimi quëdanga.
7 Rispitar adurashan ïduluncunatapis ruparachishaj, agullarishaj.
Chaycunataga ruraran
pï-maywanpis cacoj warmicunapita chasquishan guellaywanmi.
Chaypitami yapay ticrachishaj
pï-maywanpis cacoj warmicunata pägananpaj.»
Miqueas llaquicushan
8 Chaypitami fiyupa llaquicushpä wagashaj.
Gara-chaquilla, röpaynajlla purishaj.
Atoj-mallwa aullajno wagashaj.
Avestruz äbipa wawanno gaparäshaj.
9 Samariapa guerenga caycan ima jampiwanpis mana allchacajmi.
Chay gueriga jogushami Judätapis.
Jerusalén siudämanpis chayashami.
10 Chaytaga ama willapaychu Gatcho tiyajcunata.
Ni ama wagaypischu-llapa.
Chaypa ruquenga fiyupa nanayllawan Bet-le-afracho gochpay-llapa.
11 Safircho tiyajcuna nasyunniquipita juc-lämanmi prësu aywanquipaj galalla, fiyupa pengacur.
Zaanáncho tiyajcuna, yanapäshunayquipaj manami pipis yargamongapächu.
Beteselcho tiyajcuna, wagaptiquipis manami pipis cuyapäshunquipächu.
12 Marotcho tiyajcunaga yanapänantami shuyarpaycaran.
Nishan Tayta Diosga camacächisha asta quiquin Jerusalén puncuncama mana alli chayananpämi.
13 Laquis siudächo tiyajcuna, gamcunapis Israelcunano mana wiyacojmi cashcanqui.
Gamcunami caminuta gorayqui Sión runacuna juchata rurananpäga.
Chaypita cananga carrëtayquicunaman cawalluyquicunata watacuyna.
14 Imaypis mana cutinayquipaj Moreset-gat-taga «Aywallä» nicuy.
Israelpa raynincunapäga Aczib siudä canga charinanpaj toglla shuyaraycajnömi.
15 Tayta Diosga cayno nin: «Maresa marcacho tiyajcuna, gamcunamanga
yapaymi cachamushaj nasyunniquita charicurcunanpaj.
Israelcho mas mana manchacoj cajpis Adulamcho caycaj machaymanmi pacacongapaj.
16 Jerusalén siudächo tiyajcuna,
fiyupa cuyashayqui wamrayquicunatami caru nasyunman apacongapaj.
Chaymi ajchayquita rutucuy llaquicushayqui musyacänanpaj.
Ajchayquita jichcaypa rutucuy wisculno gala-uma canayquicama.»