SALMOS.
76.
Cuerdasniyoj instrumentuwan cantananpaj Asaf isquirbishan alabansa. Judäcunaga llapanmi Tayta Diospaj parlan. Israelcunaga llapanmi musyan pï Tayta Dios cashantapis. 
Jerusalenchömi Wasenga caycan. Chaychömi tiyanan. 
Chaychömi paquiran guërracho chapacuna escüducunata, sablicunata, lëchacunatapis. Selah 
¡Fiyupa munayniyojmi canqui Tayta Dios! ¡Mana ushacaj puntacunapitapis mas munayniyojmi canqui! 
Chaynöpami fiyupa callpayojcunapis ima ruraytapis mana puydishachu. Manami gänasninpis cashanachu. Mananami jatarimonganachu. 
Tayta, Jacobpa Diosninmi canqui. Gam rabyacurcuptiquega carrëtancuna ni cawalluncunapis mananami cuyucunnachu. 
¡Gamga canqui fiyupa puydej y manchanami! ¿Piräshi ichipäshunquiman rabyacurcuptiquega? 
Tayta Dios syëlupita-pachami jusganquipaj. Chaymi cay pachapis mancharir mana cuyucunchu. 
Chaynöga caycan jusganayquipaj jatariptiquimi, cay pachacho ñacaycajcunata salbanayquipaj captinmi. Selah 
Gam rabyacurcuptiquega mas ollgojnin runapis upällacur rispitarmi alabashunqui. 
Aunishanchïcunataga Tayta Diosninchïta cumlishun. Ñaupancho caycajcuna, gamcunapis almiraypaj caycaj Tayta Diospaj garayniquicunata apamuy. 
Payga mandajcunatapis wañurachinmi. Munducho caycaj raycunatapis mancharachinmi.