SALMOS.
107.
Tayta Diosta agradësicuy-llapa amatar alli cashanpita. Pay cuyacoj caynenga imaycamapis chaynöllami. 
Tayta Dios salbashan cajcuna willacuy chiquishojcunapita Tayta Dios salbashushayquita, 
llapan nasyuncunapita allpapa juc cantunpita jucaj cantuncama shuntashushayquita. 
Waquenga paycuna chunyaj chaqui jirca agush-agush allpapa pantacasha purircaycaran tiyananpaj siudäman näni aywajta ashir. 
Yargaypita, yacunaypita wañunanpäna carcaycaran. 
Chayno llaquicurnami Tayta Diosta mañacuran. Chaura Tayta Diosga ñacaycunapita jorguran. 
Nircur alli nänita tarichiran tiyananpaj caycaj siudäman chayananpaj. 
Chaymi Tayta Diostaga agradësicuy cuyapäcoj cashanpita, runacunata cuyapar yanapashanpita. 
Paymi yacunaycajtapis yacuta tarichin. Muchuycho caycajtana achca micuyta tarichin. 
Waquenga paycuna llaquisha carcaycaran. Jucta sirbir goyarcaycaran. Manami camäpacuranchu imata ruraytapis ni mayman aywaytapis. 
Paycunaga Tayta Dios willapashanta manami wiyacushachu caran. Tayta Dios rurananpaj caycashanta manacajman churaran. 
Chaymi Tayta Diosga fiyupa ñacay aruycunaman churaran. Mana alliman chayaptin mananami pipis yanapajnachu. 
Chayno llaquicuycho car-rämi Tayta Diosta mañacuran. Chaura paynami ñacaycunapita salbaran. 
Paycunataga llaquisha caycajta jorguran. Jucta sirbir ñacarcaycajta salbaran. 
Chaymi Tayta Diostaga agradësicuy cuyapäcoj cashanpita, runacunata cuyapar yanapashanpita. 
Paymi acapa-acapa rurariran runsi puncucunatapis. Fyërru rancancunatapis acapa-acapa paquiriran. 
Paycuna waquenga juchanpita gueshyarcaycaran, llaquicurcaycaran. 
Llapan micuytanami melanaran. Wañunanpänami carcaycaran. 
Chayno llaquicuycho carnami Tayta Diosta mañacuran. Chaura paynami ñacaycunapita salbaran. 
Allchacächiyta munallarmi allchacächiran. Sepultüraman chayananpaj caycajta allchacächiran. 
Chaymi Tayta Diostaga agradësicuy cuyapäcoj cashanpita, runacunata cuyapar yanapashanpita. 
Tayta Diosta agradësicushpayqui uywacunata pishtay. Ima rurashancunatapis cushicushpayqui willacuy. 
Paycuna waquenga büquicunata rantiran. Nircur chaycunawan juc-lä nasyuncunacho nigusyuta aruran. 
Lamar chaupichöna caycashpan ricaran Tayta Dios fiyupa almiraypajcunata camashanta. 
Tayta Dios rimarcuptin fiyu wayra gallaycuran. Chaywanmi lamar yacu löcuyaran. 
Chaymi yacuga büquicunata syëlucama jitariran. Cutirnami lamar yacu rurincama chayaran. Mana alliman chayananpaj cashanta musyaptinmi büquicho aywajcunapaga balurninpis mana carannachu. 
Chay runacuna machashano tapra-tapra carcaycaran. Yachaj caynincunapis yangami caran. 
Chayno llaquicuycho carnami Tayta Diosta mañacuran. Chaura paynami ñacaycunapita salbaran. 
Löcu wayratapis wall-wallyaycajllaman Tayta Diosga ticrachiran. Yacu löcuyaycajpis chawacäcuran. 
Yacu mana cuyucuptinna paycunaga cushicuran. Maymanpis chayayta munashanmanmi Tayta Dios chayachiran. 
Chaymi Tayta Diostaga agradësicuy cuyapäcoj cashanpita, runacunata cuyapar yanapashanpita. 
Shuntacaycur llapaniqui alabay. Mandajcuna shuntacashanchöpis alabay. 
Tayta Diosmi ticrarachin mayucunata, pucyucunata chunyaj chaqui jircaman, chaqui pachaman. 
Alli chacracunatapis agushman ticrachin chaycho tiyajcuna mana allita ruraptin. 
Ichanga chunyaj chaqui jircatana ticrachin gochaman, chaqui pachacunatana pucyucunaman. 
Chayman tiyachin yargaycajcunata. Chaura paycunanami chaycho jatarachin siudänincunata. 
Chacracho arur übasta lantan. Wayuynintana aypallata shuntan. 
Tayta Dios bindisyunta gon runacuna aypallaman mirananpaj. Uywancunapis mana ushacaypa miran. 
Ñacaptin, mana allicuna chayaptin, gueshyawan wañuptin, wallcayaptin 
ñacachejcunata Tayta Diosga manacajman churar castigan. Chunyaj näni mana cashanpa purichirmi ogracächin. 
Pobricuna llaquicurcaycajtami ichanga Tayta Dios alliman churan. Chay famillyacunatana Tayta Diosga uyshatano aypallaman mirachin. 
Chayta ricar, alli runacunaga cushicun. Fiyu runacuna ichanga imano yarpachacuytapis mana camäpacunchu. 
¿Piraj yarpaysapa yachajcuna? Yarpaysapa yachajcunaga cay willapacunata tantiyajcunami, Tayta Dios cuyacoj cashantapis tantiyajcunami.