SALMOS.
119.
Cushishami cawanga juchata mana rurajcunaga, Tayta Dios yachachishancunata cumlejcunaga. 
Cushishami cawanga Tayta Diospa estatutuncunata wiyacojcunaga, llapan shongunpa Tayta Diosman yäracojcunaga, 
juchata mana rurajcunaga, Tayta Diospa caminullanpa purejcunaga. 
Tayta Dios, gammi willapashcanqui llapan nishayquicunata mana pantaypa cumlinanpaj. 
¡Ima alliraj canman layniqui nishanta cumliptë! 
Mandamintuyqui nishanta cumlerga manami imapitapis pengacushächu. 
Alli jusgaj cashayquita sumaj yachacurcorga llapan shongöpami alabashayqui. 
¡Layniquitami cumliyta munä! ¡Ama cachaycamaychu ari! 
¿Imanöparaj mösuga juchata mana ruraypa cawanman? Gampa palabrayquita wiyacushpanmi juchata mana rurangachu. 
Nogaga llapan shongöpami gamman yäracamö. Ama camacaycachiychu mandamintuyquicunapita pantacänätaga. 
Gam aunimashayquitaga llapan shongöpa yarparaycä juchata mana ruranäpaj. 
¡Alabasha cay Tayta Dios! ¡Layniquicunata yachaycachimay! 
Nogaga willacushämi imano jusganayquipäpis nishayquitaga. 
Estatutuyquicunata cumlerga ima-aycatapis charar cushicushäpita masrämi cushicushaj. 
Willapämashayquicunata cumlinäpämi yarpachacushaj. Caminuyquipa puriyta manami gongashächu. 
Layniquicunata cumlirmi cushicushaj. Palabrayquitaga manami gongashächu. 
Nogaga gamtami sirbiycä. Cawachimay ari. Palabrayquitaga wiyacushämi. 
Alli yarpayta gomay yachachimashayquicunata sumaj tantiyanäpaj. 
Cay pachachöga gorpallami caycä. Nogataga mandamintuyquicunata yachaycachimay ari. 
Imano y imapita jusgashayquitapis musyayta munarmi imay örapis yarpachacuycä. 
Gamga piñacunquimi mana wiyacojcunata, mana allita rurajcunatapis. Paycunaga mandamintuyquita manami cumlinchu. 
Paycuna achäquita ashipämänanpita, manacajman churamänanpita salbaycamay. Nogaga estatutuyquicunatami cumlishcä. 
Munayniyoj runacuna mana allita ruramayta yarpaptinpis nogaga layniquicunallatami yarparaycä. 
Estatutuyquicunata cumlir noga fiyupa cushicö. Chaycunami nogataga tantiyachiman. 
Wañuycänami. Allchacaycachimay ari palabrayquicho aunimashayquino. 
Imano goyaycashätapis gamtami willashcä. Gamnami wiyamar yanapämashcanqui. Layniquicunata yachaycachimay ari. 
Willapämashayquicunata cumlinäpaj sumaj yarpayta goycamay. Almiraypajcunata rurashayquitami tantiyayta munä. 
Fiyupa llaquicuywanmi wagaycä. Palabrayquicho niycashanno alli goyaycachimay ari. 
Llullacunätaga ama munaycuychu. Chaypa ruquenga yanapaycamay yachachimashayquinölla. 
Nogaga acrashcä alli cajta rurar goyänäpämi. Chaymi alli jusgashayquita yachacuyta munä. 
Tayta Dios, estatutuyquicunatami cumliycä. Pengaycho canäpäga ama cachaycamaychu. 
Shongöta cushicachiptiquimi mandamintuyquicunataga cushisha cumlë. 
Tayta Dios, yachachimay layniquicunata imano cumlinäpäpis. Wañunäcamami cumliyta munä. 
Tantiyachimay yachachimashayquicunata mana gonganäpaj. Llapan shongöpami wiyacuyta munä. 
Mandamintuyqui nishanno cumlinäpaj yarpayta gomay. Chaycunata cumlirmi cushishalla goyäshaj. 
Estatutuyqui nishallanta ruranäpaj yarpächimay. Ama camacächiychu suwacullar rïcuyänäpäga. 
Ama cachamaychu manacajcunallaman ricaränätaga. Cawachimay ari gam munashayquino caminullayquipa purinäpaj. 
Sirbishojcunataga allilla goyächinayquipämi aunirayqui. Nogatapis allilla goyächimänayquipaj aunimay ari. 
Ama camacächiychu manchacushä pengayman chayanätaga. Gam jusgashayquicunaga llapanpis allimi. 
Nogaga mandamintuyquicunata sumaj yachacuytami munä. Cawachimayraj ari. Gamga alli juezmi canqui. 
Tayta Dios aunimashayquino musyachimay cuyacoj, salbacoj cashayquita. 
Chaynöpami achäquita ashipämajcunataga cutichishaj. Gampa palabrayquimanmi yäracö. 
Ama gongaycachimaychu rasun cajta parlanäpaj caycajtaga. Gam jusganayquipaj cajllamanmi nogaga yarparaycä. 
Imaycamapis yachachimashayquicunallatami cumliyta munaycä. 
Chayrämi goyäshaj mana yarpachacuypa. Nogaga willapämashayquicunatami cumlishcä. 
Estatutuyquicuna imano niycashantapis raycunapa ñaupanchömi willacushaj. Mana pengacuypami willacushaj. 
Nogaga mandamintuyquicunata cushicurmi cumlë. Chaycunata cumlirmi fiyupa cushicö. 
Nogaga cushishami mandamintuyquitapis chasquicö. Layniquicunatapis manami gongächu. 
Nogata nimashayquicunataga yarpaycuy. Nogaga palabrayquimanmi yäracuycä. 
Llaquicuycho caycashä örapis aunimashayquimi cushicachiman. 
Mana rispitacojcunami mana jamaypa achäquita ashipaycäman. Nogami ichanga yachachimashayquicunata mana gongächu. 
Ñaupata jusgashayquicunatami yarpaycä. Chaycunami shacyächiman. 
Yachachicuyniquita cachaycoj fiyu runacunaga fiyupami rabyachiman. 
Cay pachachöga gorpallami tiyä. Layniquicuna alli cashantami willacushaj. 
Tayta Dios, chacaycunapis gamtami yarpä. Yachachishayquicunatami cumliyta munä. 
Willapämashayquicunataga wiyacuycämi. 
Tayta Dios, gamllamanmi yäracaycämö. Palabrayqui imanöpis nishanta cumlinäpämi aunishcä. 
Llapan shongöpami gam munashayquino goyashcä. Aunimashayquino alli ricamay ari. 
Imanöpis cawashätami yarpachacushcä. Chaymi estatutuyqui nishancunatana wiyacushaj. 
Jucllami cumlishcä mandamintuyquicunataga. 
Fiyucunaga tucuy-jinanpami achäquita ashipämasha. Chaypis manami gongashcächu yachachicuyniquitaga. 
Pullan pagas jatarcurmi gamtaga mañacö alli jusgacoj cashayquipita. 
Nogaga allimi ricanacö gamta rispitashojcunawan, willapashayquita cumlejcunawan. 
Tayta Dios, cay pachachöga llapantami cuyanqui. Layniquicunatapis masta yachaycachimay ari. 
Tayta Dios, palabrayquicho niycashannömi nogataga alli ricamashcanqui. 
Alli fisyuyoj, yarpaysapa canäpaj yarpayta goycamay. Nogaga yäracö mandamintuyquicunamanmi. 
Manaraj mandamintuyquicunata wiyacushäcamaga achcatami llutancunata rurarä. Cananmi ichanga palabrayquicho nishannöna cumliycä. 
Gamga allimi canqui. Allitami ruranqui. Layniquicunata yachaycachimay. 
Mana rispitashojcunaga mana cajtami jitapäman. Chaypis nogaga llapan shongöpami willapämashayquicunata cumlë. 
Mana rispitashojcunaga llutallantami yarpanpis. Nogami ichanga cushicö yachachicuyniqui nishanta cumlir. 
Nogapäga allimi casha pengayman churamashan. Chaynöparämi layniquicunata yachacushcä. 
Nogapäga waranganpa guellaypitapis goripitapis mas allimi gam yachachimashayquega. 
Quiquiquimi ruramashpayqui formacächimarayqui. Yarpayta goycamay ari mandamintuyquicunata yachacunäpaj. 
Gamta rispitashojcunaga ricamashpan cushicongami. Nogaga palabrayqui niycashanmanmi yäracö. 
Tayta Dios, nogaga musyämi llapanpita alli jusgaj cashayquita. Quiquë imatapis rurashäpitami ñacachimanquipis. 
Cuyacoj cayniqui nogataga cushicachimächun aunimashayquino. 
Cuyapäcoj cashayquita musyachimänayquipaj cawachimay. Nogaga yachachicuyniquita cumlirmi cushicö. 
Mana rispitacojcunaga pengaycho cachun. Paycunaga jitapämallarmi ñacaycächiman. Nogami ichanga willapämashayquicunallata yarparäcushaj. 
Gamta rispitashojcunaga, estatutuyquita cumlejcunaga nogawan shuntacächun. 
Gampa layniqui niycashallanman shongöpis yarpächun. Chaynöpami imapitapis mana pengacushächu. 
Salbamänayquitami pasaypa shuyaraycä. Palabrayquimanmi yäracuycä. 
Gam aunimashayquita ricchacuycaptillämi ñawëpis chulluycan. Chaymi «¿imayraj shamunqui shacyächimänayquipaj?» në. 
Llapan gongashana auquinna cashpäpis, gampa layniquicunataga manami gongärächu. 
¿Imaycamaraj awantashaj? ¿Imayraj jusganqui gaticachämajcunataga? 
Mana rispitashojcunami y yachachicuyniquitapis mana wiyacoj runacunami mana alliman chayanäta munaycan. 
Yanapaycamay ari. Imatapis mana rimapaycaptëmi gaticacharcaycäman. Gampa mandamintuyquega llapanpis rasun cajllami. 
Ichicllapami pishisha wañunäpis. Chayno caycarpis manami gongaycushcächu willapämashayquicunata cumliytaga. 
Cuyacoj cashayquimanno masta cawachimay ari. Chaura estatutuyquicunatapis cumlishämi. 
Tayta Dios, palabrayquega mana gongacajmi. Syëluno mana ushacajmi caycan. 
Aunishayquitaga imaycamapis cumlinquimi. Gammi tacyachishcanqui cay pachata. Chaymi mana cuyucunchu. 
Ima-aycapis gam nishayquinöllami caycan. Chaycunaga llapanpis gampa munaynillayquichömi caycan. 
Yachachicuyniqui mana cushicachimaptenga llaquicuycällarmi wañöman caran. 
Manami imaypis gongashäpächu willapämashayquicunataga. Chaycunami cawaycächiman. 
Salbaycamay ari. Nogaga gampami cä. Willapämashayquicunataga cumliycämi. 
Fiyucunaga shuyarpaycäman imay örapis wañuchimänallanpämi. Nogami ichanga estatutuyquicuna nishallanta cumliycä. 
Nogaga llapantapis ricashcä ushacajllatami. Mandamintuyquicunami ichanga imaypis mana ushacanchu. 
Nogapäga fiyupa allimi yachachicuyniquicuna. Imay örapis chaytaga yarparaycämi. 
Mandamintuyquicunataga imaypis yarparaycämi. Chaycunami nogataga chiquimajcunapitapis mas yachaj cayman churamasha. 
Yachachimajcunapitapis masmi tantiyä. Chaynöga tantiyä estatutuyquicunata yarpararmi. 
Yachajcunapitapis masmi tantiyä. Chaynöga caycä willapämashayquicunata yarpararmi. 
Mana alli ruraycunataga manami ruränachu palabrayquita wiyacunäpaj. 
Alli arriglar jusgashayquicunataga manami gongashcächu. Chaynöga caycä gam yachachimaptiquimi. 
Shimëchöga mil-abëjapa mishquinpitapis masmi mishquëman palabrayquega. 
Willapämashayquicunata wiyacurmi yarpaysapayashcä. Chaymi fiyupa chiquë llutan ruraycunataga. 
Palabrayquega juc achquinömi. Purinäpaj caminupa achquipämajnömi caycan. 
Cumlinäpaj jurashätaga cumlishämi: Allita ruranäpaj nimashayquitaga simri cumlishämi. 
Tayta Dios, fiyupami llaquicuycä. Palabrayqui nishanno cawachimay ari. 
Gamta mañacamushäta aunimay Tayta Dios. Alli arriglar jusgashayquita musyaycachimay ari. 
Wañuchimaytami munarcaycan. Chaypis yachachimashayquitaga manami gongächu. 
Fiyucuna mana alliman chayachimayta munaptinpis willapämashayquitami nogaga wiyacö. 
Estatutuyquitami erensyatano chasquicushcä. Chaymi nogataga cushicachiman. 
Layniquicunata llapan shongöpa yachacuytami munä. Imaycamapis wiyacuytami munä. 
Ishcay cära runacunataga manami ricaytapis munallächu. Yachachicuyniquitami ichanga cuyä. 
Gammi canqui washämaj, chapämaj. Gampa palabrayquimanmi yäracö. 
¡Mana allita rurajcuna ñaupäpita witicuy! Nogaga Diosnëpa mandamintuntami cumlishaj. 
Aunimashayquino yanapämay. Chauraga masta cawashämi. Gamman yäracaycämuptëga ama mana alliman chayachimaychu. 
Salbaycamay ari. Chauraga cawashärämi. Layniquitapis cumlishämi. 
Layniquita cachaycojtaga gam disprisyanquimi. Chaura chay runacunaga quiquillanmi llutanman chayan. 
Cay pachacho caj fiyucunataga ganratanömi ricanqui. Chaymi nogaga estatutuyquicunata fiyupa cuyä. 
Gamta manchacur nogaga sicsicyaycä. Imanöpis jusganayquipaj cashayquipitami fiyupa llaquicö. 
Imaypis allillatami rurashcä. Ñacachimajcunapa maquinmanga ama cachaycamaychu. 
Noga allilla goyänäpaj yanapaycamay ari. Fiyucunaga ama ñacachimächunchu ari. 
Ñawëpis chulluycan salbamänayquipaj ricchacur shuyaraycaptillämi, aunimashayquita cumlimänayquipaj shuyaraycaptillämi. 
Yanapaycamay ari cuyacoj cashayquimanno. Layniquicunata yachachimay. 
Nogaga sirbishojniquimi cä. Tantiyaycachimay. Nogaga estatutuyquicunata yachacuytami munä. 
Tayta Dios jusganayquipaj caj diya chayamushanami. Mana wiyacojcunaga yachachicuyniquita manami cumlishachu. 
Nogami ichanga allinnin goripitapis masraj mandamintuyquicunata cuyä. 
Chaymi nogaga willapämashayquino goyä. Llutan ruraycunataga llapantami chiquë. 
Estatutuyquicunaga fiyupa allimi. Chaymi nogaga wiyacö. 
Palabrayquiwan tantiyachiptenga mana yachaj runapis allimi tantiyan. 
Amatarmi munä mandamintuyquicunata masta yachacuyta. 
Tayta Dios, rispitashojcunataga allimi ricanqui. Chayno nogatapis cuyapämashpayqui alli ricaycamay ari. 
Aunimashayquino yanapämay ari. Ama camacächiychu noga mana allita ruranätaga. 
Runacuna ñacachimänanpita salbaycamay. Nogaga willapämashayquicunata cumliytami munä. 
Nogataga alli ñawiquiwan ricaycamay ari. Layniquicunatapis yachachimay. 
Yachachishayquicunata mana cumliptinmi nogaga fiyupa wagä. 
Tayta Dios, gamga juchaynajmi canqui. Rasun cajtami llapantapis jusganqui. 
Estatutuyquicunaga llapanpis allimi, rasun cajllami. 
Nogaga fiyupami rabyä. Chiquimajcuna palabrayqui nishanno mana cumliptinmi rabyä. 
Gam aunishayquega rasun cajmi. Chaymi aunishayquipita nogaga fiyupa cushicö. 
Nogaga umildimi cä. Pï-maypis manacajman churaman. Chaypis manami gongächu willapämashayquicunataga. 
Gamga llapantapis allimi jusganqui. Yachachishayquipis rasun cajmi. 
Fiyupa llaquicurmi imata ruraytapis mana camäpacurächu. Mandamintuyquicunami ichanga cushicachimasha. 
Estatutuyquicunaga allimi. Sumaj tantiyaycachimay, allilla cawaycachimay ari. 
Tayta Dios, llapan shongöpami mañacamö. Wiyaycamay ari. Llapan layniquicunatami cumliyta munä. 
Gamtami mañacamö. Yanapämay ari estatutuyquita cumlinäpaj. 
Manaräpis pacha waraptin jatarcur mañacamö yanapämänayquipaj. Nogaga palabrayquimanmi yäracö. 
Waray-waraymi ricchä aunishayquicunata yachacur. 
Tayta Dios, gamga cuyapäcojmi canqui. Yanapaycamay ari. Alli cashayquimanno cawachimay. 
Fiyupa chiquimajcunaga gaticachämar taripaycämannami. Yachachicuyniquicunatami ichanga gongaycush. 
Tayta Dios, gamga ñaupallächömi caycanqui. Mandamintuyquega llapanpis rasun cajllami. 
Unaypita-pachanami musyä estatutuyquicunataga. Chaytaga quiquiquimi camacächishcanqui imay-yajpis cananpaj. 
Llaquicuycajtaga salbamay ari. Yachachicuyniquitaga manami gongashcächu. 
Faburnë jatarishpayqui jorgamay. Aunimashayquita cumlir shacyächimay ari. 
Layniquicunata mana wiyacuptin fiyucunataga manami salbanquichu. 
Tayta Dios, gamga fiyupami cuyapäcunqui. Alli arriglaj cashayquimanno cawachimay ari. 
Ñacachimajcuna chiquimajcunaga achcajmi caycan. Chaypis nogaga manami gongaycöchu estatutuyquicunataga. 
Juchasapacunata ricashpä pasaypami melanäcö. Chay runacunaga palabrayquita manami wiyacunchu. 
Tayta Dios fiyupami cuyä mandamintuyquicunataga. Cuyacoj cashayquimanno cawachimay ari. 
Palabrayquega llapanpis rasun cajllami. Alli arriglaj cashayquega imaypis manami rucangachu. 
Mana rimapaycaptë munayniyoj runacuna gaticachämajtaga manami manchacöchu. Gampa palabrayquitami ichanga manchacö. 
Aunimashayquiman yäracurmi cushisha caycä. Pamparaycaj guellayta tariycojnörämi cushisha caycä. 
Llullacuytaga fiyupami pengacö. Yachachicuyniquitaga amatarmi cuyä. 
Alli arriglaj captiquimi imay örapis gamta alabaycä. 
Yachachicuyniquita cumlejcunaga cushishami goyan. Paycunataga imapis manami juchaman tunichinchu. 
Tayta Dios, nogaga mandamintuyqui niycashanno llapantami cumlishcä. Salbamänayquitami munaycä. 
Nogaga estatutuyquita wiyacömi. Llapan shongöpami cuyä. 
Nogaga willapämashayquitami estatutuyquitami wiyacö. Gam musyanquimi imano goyashätapis. 
Tayta Dios, ruwacur mañacamushätaga wiyaycamay. Palabrayquicho caycashanno tantiyaycachimay. 
Mañacaycämushätaga wiyaycamuy ari. Aunimashayquino salbaycamay. 
Alabansacunawanmi alabashayqui. Gammi yachachimashcanqui layniquicunata. 
Aunimashayquipitami alabashayqui. Mandamintuyquicunaga llapanpis allillami. 
Gamga yanapämänayquipaj listulla caycay. Willapämashayquicunata nogaga llapantami cumliycä. 
Tayta Dios, salbaycamay ari. Nogaga yachachimashayquita wiyarmi cushicö. 
Alabanäpämi cawayta munä. Alli arriglaj cashpayqui yanapaycamay. 
Nogaga uyshanömi pantacäcushcä. Ashimaj shaycamuy ari. Nogaga manami gongashcächu mandamintuyquicunata.