SALMOS.
136.
Tayta Diosta agradësicuy-llapa alli cashanpita. 
Llapan dioscunapita mas munayniyoj Diosta agradësicuy-llapa. 
Japallan Tayta Diosta agradësicuy-llapa. 
Ima-aycatapis almiraypajcunata rurajta agradësicuy-llapa. 
Tantiyaj cayninwan syëlutapis rurajta agradësicuy-llapa. 
Cay pachata yacu jananpa mashtajta agradësicuy-llapa. 
Intita quillatapis rurajta agradësicuy-llapa. 
Intitaga rurasha junajpa achicyänanpaj. 
Quillatawan goyllartanami rurasha chacaypa achicyänanpaj. 
Egipto runacunapa guechpa wamrancunata wañuchejta agradësicuy-llapa. 
Egiptupita Israelcunata jorgamojta agradësicuy-llapa. 
Israelcunataga Tayta Diosmi munayniyoj cayninwan macyarcur jorgamuran. 
Puca Lamartapis ishcayman raquirejta agradësicuy-llapa. 
Paymi lamar chaupinpa Israelcunata päsachimuran. 
Paymi faraonta suldäruncunatawan Puca Lamarcho shengachiran. 
Chunyaj chaqui jircapa acrashan runacunata pushaj Tayta Diosta agradësicuy-llapa. 
Munayniyoj raycunata wañuchinanpaj binsichejta agradësicuy-llapa. 
Tayta Diosmi wañuchiran fiyupa mandaj munayniyoj raycunatapis. 
Paymi wañuchiran Amorreo runacunapa raynin Sihonta. 
Paymi wañuchiran Basanpa raynin Ogta. 
Tayta Diosmi chay wañuchishan raycunapa chacrantapis Israelcunata raquiparan. 
Nircurnami partisyunta goycuran sirbejnin Israelcunata. 
Tayta Diosga manami gongamashcanchïchu. 
Paymi salbamanchi chiquimajninchïcunapita. 
Paymi micuyta tarichin cawaj cajcunataga llapanta. 
Syëlucho caycaj Tayta Diosta agradësicuy-llapa.