CANTARES.
7.
Raypa wamran, llanguiquichöga chaquiqui imano cuyayllapäshi camaran. Chegllayquipis imano cuyayllapaj camarajshi caycan. Adurnucunata fiyupa rurayta yachajcuna rurashanörämi camaraj caycan. 
Pupuyquega caycan cöpano ruyru, imaypis chaycho alli bïnu mana pishishanno. Pachayquinami caycan juc gotuy rïgu goturaycajta intëru cantunpa liryu wayta tumaparaycajno. 
Ishcan chuchuyquicunaga caycan millish lluychucunanömi. 
Cuncayquega llushwaypa llushwaycan cuyayllapaj arusha törrinömi. Ñawiquinami caycan ishcay yacu ishtanqui Hesbón siudächo caycajno, Bat-Rabim puncupa ñaupancho caycajno. Sengayquinami caycan Damascuman ricaraycaj törri Libanucho caycajno camaraj. 
Umayquipis cuerpuyquichöga caycan Carmelo puntano cuyayllapämi. Ajchayquicunapis cuyayllapaj achic-achicyaycan. ¿Ajchayquiwanga rayta imanaycushcanquitaj pasaypa cuyacurcushunayquipäga? 
Cuyaynë, gamga canqui fiyupa cuyayllapämi. Mana cachaypa cuyacuypaj, fiyupa cuyayllapämi canqui. 
Palma yöra ichiraycajno cuyayllapämi canqui. Chuchuyquicunanami chay yörapa wayuynin warcurpaycajno. 
Nogaga palma yöramanmi wichayta yarpaycä, wayuynin warcuraycajcunata duyñu-tucurcunäpaj. Chaura chuchuyquicunaga cangapaj sartanpa-sartanpa übas wayuraycajnömi. Jämayniquinami mansänano asyanga. 
Parlacuyniquega mishquej alli bïnunömi. Chayga caycan mishquej bïnu shimi-wirpanchïpa, quirunchïpa mishquilla chayar päsarejnömi. 
Nogaga cuyaynëpami cä. Paypis nogawan iwal caytami munan. 
Cuyaynë, juclla aywashun jircaman. Cuyayllapaj asyaj waytacunapa chaupincho warämushun. 
Tutapanami tumapacoj aywashun übas chacracunapa. Chaychömi ricashun; mä maynachush mullcuycan wayunanpaj; mä waytaraycannachush; granadacunapis mä waytaycannachush. Chaychömi musyachishayqui rasunpaypa cuyashäta. 
Alayrimi mandragorapa alli asyayninpis mayacaycämun. Ñaupanchïchöga intërupami caycan tucuy casta frütacuna: chaquisha frütacuna, chayraj pallarisha cajpis. Chaytaga gampämi acrashcä.