LAMENTACIONES.
3.
Nogaga fiyupami ñacashcä. Tayta Dios rabyacurcur castigamaptinmi ñacashcä. 
Paymi yanauyaycajman pushamaran. Achqui mana cashancho purichir ñacachimaran. 
Yaparir-yaparirmi imay örapis nogataga castigaycäman. 
Garätapis aychätapis pasaypanami auquisyächisha. Tullöcunatapis pasaypami paquir-ushasha. 
Intëröpa curralta rurajnömi fiyupa ñacachimashpan llaquicaycächiman. 
Wañojcuna pamparaycashan chacaychöno cawanäpämi cachaycamasha. 
Maypapis mana llojshinäpämi curralman wichgarcamasha. Fiyupa lasaj cadinacunawanmi watarcamasha. 
Yanapämänanpaj mañacur gaparaycaptëpis ruwacushätaga manami wiyamashachu. 
Puricunätaga rumicunawanmi pergacurcusha. Caminötaga juc-läpana jitarisha. 
Nogapäga Tayta Dios casha pacaraycaj ucumaryanömi; pintipaycamänanpaj caycaj liyunnömi. 
Allipa aywaycajtami pantacächimasha. Tariparcur rachiramasha. Fiyupa mancharishatami cachaycamasha. 
Lëchanta sumaj chutarcurmi nogataga lëchanwan chayachimänanpaj apuntamasha. 
Tayta Dios jitamushan lëchacunaga cuerpöman fiyupa ruricamami jaticasha. 
Llapanmi marca-masëcunapis nogataga asipäman. Imay örapis nogapaj parlar asircaycanmi. 
Tayta Diosga fiyupa llaquicuyllamanmi churamasha. Ashgaj berbënatami upuchimashapis. 
Guechga rumiwanmi quirötapis jorgusha. Uchpachömi gochpachimasha. 
Nogapäga manami cannachu alli goyayga. Cushisha goyay cashantapis gongaycushcänami. 
Chayno cashpämi nishcä: «Alli goyayta manami yarpänachu. Tayta Diosmanpis imapänataj yäracushaj» nir. 
Yarpämi llaquicushäta, ñacashäta, japallä goyashätapis. 
Chaycuna imano päsamashantapis yarpachacömi. Chauraga alli shacyaycashäpitapis guellanacäcönami. 
Ichanga imaypis shongöcho yarpaycäshämi. Y chay yarpaycashämanga yäracuycäshämi: 
Tayta Dios cuyacoj cashanga manami imaypis ushacanchu. Cuyapäcoj cayninpis manami ushacanchu. 
Alli caynenga waran-waranmi mushojyaycan. Aunishantaga imaypis cumlinmi. 
Shongullächöga në: «Nogapäga Tayta Diosllami llapanpitapis mas alli. Chaymi payllaman yäracö.» 
Tayta Diosga fiyupa allimi payman yäracojcunapäga llapan shongunpa payman yäracuyta ashejcunapäga. 
Tayta Dios salbamänanchïpäga upällalla shuyaraymi mas alli. 
Runapäga mas alli caycan mösu cashanpita-pacha ñacaycunata awantaymi. 
Tayta Dios ñacachishan öra runaga upällalla japallan cacunman. 
Wiyacushpan pampaman uysuräcunman. Chayno ruraptenga capaschari allimanpis churanman. 
Pipis magaptenga cäranta witichipanman. Imata gayapaptinpis upällalla chasquicunman. 
Tayta Diosga pitapis manami para-simriga gongaycunchu. 
Ñacachishpanpis cuyapanmi. Chaynöga ruran fiyupa cuyacoj cashpanmi. 
Rasunpaga pay manami munanchu runacunata ñacachiyta, ni nanächiytapis. 
Tayta Diosga manami munanchu prësu caycaj jäpacunata ñacachinanta. 
Tayta Diosga manami munanchu pï runatapis manacajman churananta. 
Tayta Diosga manami munanchu dimanducho juchayoj cajpa faburnin pipis cananta. 
Tayta Dios mana camacächiptenga imapis manami cay pachacho canmanchu. 
Allipis mana allipis chayamun janajcho caycaj Tayta Dios «chayno cachun» niptinmi. 
Juchasapa cashanpita castigasha caycarga runa ¿imapitataj quijacunman? 
Imano goyaycashanchïtapis sumaj yarpachacushun. Tayta Dios munashannöna cawashun. 
Syëlucho caycaj Tayta Diostaga llapan shongunchïwan, maquinchïta chojpacur mañacushun. 
Nogacunaga gam nishayquita mana rurarmi juchata rurashcä. Chaymi gamga mana perdunamashcanquichu. 
Fiyupa rabyashpayquimi gaticachämashcanqui. Intëröpa chapacaycamashcanqui. Mana cuyapaypami nogapa castacunataga wañuchishcanqui. 
Nogacuna ruwacur mañacamushäta mana wiyanayquipämi pucutayman yagacuycurayqui. 
Llapan runacunapa ñaupanchömi nogacunataga ganratano ricamashcanqui. 
Llapan chiquimajcunapis nogacunapa contrallämi rimarcaycan. 
Nogacunaga goyashcäpis mancharishallami. Mana allicunallami chayamashapis. 
Cuyashä siudäta illgaycächejta ricaptë weguëpis mayunörämi aywaycan. 
Mana chawaypami wagaycä. Cushicuyta manami tarishächu 
syëlucho caycaj Tayta Dios manaraj yanapämashancamaga. 
Siudänëcho tiyaj jipashcuna ñacajta ricaptëmi shongöcamaraj nanäman. 
Achäquita mana ashipaycaptillämi chiquimajcunaga äbita charejnöpis prësu charimasha. 
Cawaycajtami pösuman cacharpamasha. Nircur uchcupa shimintana jatun läjawan chaparcamusha. 
Chaura yacuga ushajpämi ultacarcamaran. Chaymi yarparä «wañushänachari» nir. 
Tayta Dios, pösupa rurincho caycashpämi gamta mañacamurä. 
Mañacamushäta gamga wiyamashcanquimi. 
Gayacamushäta wiyamashpayquimi yanapämarayqui. Nircur «ama manchacuychu» nimarayqui. 
Tayta Dios, gammi ima mana allipitapis chapämashcanqui. Wañunäpitapis gammi salbamashcanqui. 
Gamga ricaycanquimi imano mana alli ruramashantapis. Gampaj alli cashanno arriglaycamay. 
Gamga ricaycanquimi imata rurayta munaycämashantapis, nogapa conträ imano rurananpaj yarpaycashantapis. 
Tayta Dios, masqui wiyaycuy conträ imano rimarcaycashantapis, imata ruramänanpaj yarpaycashantapis. 
Chiquimajcunaga nogapa contrallämi imay örapis rimarcaycan. 
Masqui sumaj ricay. Ima rurashancunachöpis nogapäga shimincayllarämi riman. 
Tayta Dios, paycunataga rurashanmanno castigaycuy. 
Paycuna mana tantiyananpaj camacaycachiy. Nircorga paycunata castigaycuy. 
Tayta Dios fiyupa rabyasha gaticachaycuy. Cay pachapita paycuna illgänanpaj camacaycachiy ari.