Abdías.
1.
Caychöga isquirbiraycan Abdiasta Tayta Dios ribilashanmi. Edom runacunapaj Tayta Diosga caynömi nin: «Nogaga Israelcunapa Tayta Diosninmi cä. Juc cachatami nasyuncunaman cachashcä. Chay cachami cayno niycan: ‹¡Aywashun-llapa! ¡Aywashun Edom runacunawan pillyaj!› 
«Edom runacuna sumaj wiyamay. Nogami camacächishaj llapan nasyuncunapita mas manacaj canayquipaj. Pasaypa pengaymanmi churashayquipaj. 
Gamcunaga gaga shilli uchcucunacho tiyarmi alli-tucurcaycanqui. Altunnin puntacunacho goyarmi yarparcaycanqui pipis mana binsishunayquipaj cashanta. Ichanga chayno alli-tucushpayqui quiquillayquimi engañacuycanqui. 
Ancano may janajcama wichaptiquipis, goyllarcuna caycashancho tiyanayquita ruraptiquipis chaypita garpamushayquipämi. 
«Suwacuna suwapäshunayquipaj chacaypa shamushpan imayquitapis ushajpäga manami apacunmanchu. Übasta pallajcuna gam cajman shamushpan juc ishcay sartataga cachaycunmanrämi. Gamcunatami ichanga contrayquicuna ushajpaj illgächishunquipaj. 
Gamcunataga ima-aycayquicunatapis ushajpämi guechushunquipaj. Llapan aläjayquicunatami apacongapaj. 
Llapan yanapäshojcunami engañashunquipaj. Nasyunniquipitami jitarishunquipaj. Asta yanasayquicunapis chiquicurcushunquipämi. Mas yäracushayqui caj amistäniquicunami llullapäshunquipaj mana alliman chayanayquipaj. Edom runacuna, ¿maytaj musyaj yachaj cashayqui? 
«Edom runacunata castigashä junäga llapan musyaj yachajcunatami illgächishaj. Altucho tiyaj runacuna yachaj cashantapis gongachishämi. 
Manchariywanmi sicsicyanga Temancho caj pillyay yachajcunapis. Gamcunacho tiyajcunaga ushajpämi wañonga. 
«Fiyupa pengaypämi ricacunquipaj. Nircurpis para-simrimi illganquipaj. Chaynöga canquipaj castayqui Israelcunata wañuchishayquipitami. 
Carupita shamoj contrancuna Israelpa ima-aycantapis siudäpita apacuptin, juc-lä nasyun suldärucuna Jerusalenpa puncuncunata paquir-ushaptin, gamcunaga juc-läman witicurirayqui. Guechushancunata raquipänacunanpaj surtita jitaptin, ima-aycantapis apacuptin, chay guechoj runacunanömi gamcunapis rurarayqui. 
Ama cushicunquimanchu caran castayquicuna mana alliman chayasha caycajta ricaycashpayquega. Ama cushipanquimanchu caran Judá ragällan quëdashan öra. Ama asipanquimanpischu caran paycuna llaquicuycashan öra. 
Acrashä runacuna fiyupa llaquicuycashan öra ama siudäninman yaycunquimanchu caran. Paycuna mana allicho caycashan öraga ama cushipanquimanchu caran. Paycuna mana allicho caycashan öra ama imancunatapis suwapanquimanchu caran. 
Tincoj nänicunachöpis ama shuyanquimanchu caran gueshpicuycajcunata wañuchinayquipaj. Fiyupa llaquicushpan gueshpicuycajcunata contrancunaman ama entreganquimanchu caran. 
Imanömi juccunata rurashcanqui, chaynöllami gamcunatapis rurashunquipaj. «Shamur llapan nasyuncunata jusganä junajpäga wallcanami pishiycan. 
Imanömi gamcuna rispitädu puntächo cushicur machänayquicama upurayqui, chaynömi llapan nasyuncunapis castigaptë ashgaj cöpata upongapaj. Paycunaga wicyayllami upongapaj. Chaynöpami paycunaga ushajpaj illgangapaj. 
«Sión lömacho ichanga waquin acrashä runacuna cawaycar quëdangapaj. Chaypitaga Jacobpita mirar aywajcuna chacrancunata yapay shuntangami. 
Chay Israel runacunawan Judá runacunaga canga ninano, nina wapchar imatapis ushacurcojno. Esaüpita miraj Edom runacunami ichanga canga ogshano. Chauraga chay ninano cajcunami ushajpaj usharengapaj. ¡Edom runacunaga manami jucnayllapis salbacongapächu! Noga Tayta Diosmi nishcä chayno cananpaj. 
Chay cawaycar quëdaj Israelcunaga Néguev partitami, Edom jircacunatami shuntanga. Paycuna waquenga shuntanga löma-löma guechwatapis Filistea partitapis. Paycuna waquenga shuntanga Efraín partita, Samariata, Benjamín partita, Galaadtapis. 
Röpanpa juc-läman prësu aywaj Israelcunaga shuntanga Canaán partita Sarepta siudäcama. Jerusalenpita Sefaradman prësu aywajcunapis shuntanga Neguevcho caycaj siudäcunata. 
Llapanta binsiycurnami Sión lömaman aywanga. Chaypitanami Edom runacunataga maquincho chararanga. Ichanga llapanpis nogapa maquëchömi caycanga.»