3
Mayor waugui imano cayänanpä cashganpis
1 Musyashgayquinöpis waugui-panicuna niyan: Mayor waugui cayta munagcunaga alitami yarpaycäyan. 2 Mayor wauguicuna cayanman pipitapis mana jamurash, juc warmiyogla, shumag tantyacog, shumag yarpachacurir imatapis rurag, respëtuyog, runa mayinta cuyapar posädasicog y yachasinanpä habilidäyog. 3 Saynöpis cayanman mana upyag, pitapis mana wajupag, pitapis cuyapag y guellaylapä mana wachacash. 4 Surincunata y wayincho tagcunatapis shumag ashmayanman. Saynöpis surincunata yachasiyanman cäsucog car pï-maytapis respitayänanpä. 5 Surincunata shumag mana ashmarga ¿imanöparä Jesucristuta chasquicogcunatapis shumag yachasiyanman? 6 Saynöpis Jesucristuman sayrä yäracuycagcunaga manami mayor waugui cayanmansu. Mayor waugui cayänanpä churayaptin capascher yachag-tucuyanmanpis. Sayno yachag-tucorga Satanás castigash cashgannömi paycunapis castigash cayangapä. 7 Mayor wauguicunaga cayanman pï-maypitapis ali ricash. Mana ali cawarga Satanás munashgantami ruraycan. Saymi mana ali cawashganta ricar Jesucristupa wilacuyninta parlapaptinpis runacuna chasquicuyanganasu.
Diäconucuna imano cayänanpä cashganpis
8 Saynöpis diäconucunaga* Diäconoga imachöpis yanapäcog cayänanpä cag acrash wauguimi caycäyan. cayanman ali ricash, rasun caglata parlag, mana upyag y mana saqueapacog. 9 Jesucristupa wilacuyninta yachacuyashgannöla mana jusalicuypa cawayanman. 10 Sayno ali cawayashganta ricaycurrä diácono cayänanpäga churash casun.
11 Saynöla diaconïsapis canman ali ricash, pipa washantapis mana parlag, shumag tantyacog y Tayta Diosninsi munashganno imaypis cawag.
12 Diäconucunaga juc warmiyogla cayanman. Saynöpis surincunata y wayincho tagcunatapis shumag yachasiyanman Tayta Diosninsi munashganno cawayänanpä.
13 Ali cawagcunata diácono cananpä churayaptenga pï-maypis respitayangapämi. Saymi Jesucristupa wilacuyninta parlapaptinpis chasquicuyangapä.
Pablo imapä cay cartata cartacushganpis
14 Timoteo, gam cagman shamuyta yarparpis puntataga cay cartalatami cartacarcamö. 15 Jucla mana shamuptëpis cay cartata liyirnami tantyanquipä Jesucristuta chasquicogcunata imano ricanayquipä cashgantapis. Jesucristuta chasquicogcunaga Tayta Diospa wamrancunami caycäyan. Paycunatami Tayta Diosninsi churash wilacuyninta pï-maytapis shumag tantyasiyänanpä.
16 Lapansimi musyansi Jesucristupa wilacuynin lapanpitapis más ali cashganta. Saymi himnutapis cantansi:
Jesucristumi runanöla yurergan.
Wanushganpita Santu Espiritumi cawarisimorgan.
Angilcunapis paytami adoraycäyan.
May-saychöpis wilacuynin wilacushmi caycan.
May-saychöpis paymanmi yäracuycäyan.
Gloriaman cutirmi Tayta Diospa naupanchöna caycan.