HEBREUS
Jesucristuman creyicoq israel nunacunapaq carta
Manam musyetsu que libruta ni pi escribishqan. Waquin nunacunam niyan Bernabe escribenqanta (Hechos 4.36; 13.1—4). Waquincunanam niyan Apolu escribenqanta (Hechos 18.24; 1 Corintios 1.12; 3.4—6.22). Peru manam rason caqllataqa musyantsictsu pi que cartata escribishqantapis, que carta ruraqpa jutin mana captin.
Tse witsan atscaqmi israel nunacuna Jesucristuman creyicuyarqan; peru creyiquicarpis, Moisespa leynincunapaq siempri yarparäcuyaptin manam allitsu carqan. Tsemi que cartata queno nishpa escriberqan: “Moisespa leyninllata cumplita tïraqcunaqa Dioswan alli quedeta manam puediyanqatsu. Jesucristullaman marcäcurllam, Dioswanqa alli cashun, y pe munashqanno cawacushun. Pëqa quiquinmi wanushqa noqantsicpa rantintsic jutsantsiccunarecur. Tsemi cananqa pellana quecan Dios Yayawan amishtatsimaqnintsic. Tsemi Jesucristu ruranqan Moisespa leyninpitapis mas alli quecan.”
Jina que libruchomi cäyitsimantsic Jesucristu allapa puedeq canqanta. Pëqa anjelcunapitapis (1.5—2.18), Profeta Moisespitapis (3.1—4.13), y mandacoq saserdoticunapitapis (4.14—5.10; y capitulo 7), mas puedeqmi quecan.
Tsenomi musyatsimantsic Jesucristuman naqana marcäcorqa, mana qonqetana marcäcunantsicpaq (5.11—6.20; 10.39). Jina cäyitsimanntsic imecata jiparpis, Jesucristullamanna marcäcunantsicpaqmi (11.1—12.29).
1
Tsurintawan Dios parlapätsimantsic
1 Une tiempuchomi Diosnintsic profetancunatawan awiluntsiccunata atsca cuti y tuquinopa parlaparqan; 2 peru canannam tsurintawanna parlapätsimarqontsic. Petam Dios churarqan imecachopis mandacoq cananpaq, pewan que munduta camashqa carnin. 3 Diospa tsurin Jesucristoqa quiquin patenti Diosnintsicmi, y pëchomi ricantsic Diospa allapa puedeq queninta. Pemi llapan camanqancunata poderninwan tsararëcan mana ushacänanpaq. Y jutsantsiccunata limpiaramarnintsicmi, sieluman cuticushqa. Cananqa Diospa derechu caq ladunchomi tëcan pewan juntu mandacur.
Jesucristoqa anjelcunapitapis mas puedeqmi
4-5 Tsemi Jesucristoqa anjelcunapitapis mas puedeq, porqui manam ni meqan anjeltapis Jesucristutanoqa podernin qoshqatsu, ni manam meqan anjeltapis nerqantsu:
“Qamqa tsurïmi canqui,
y noqam papäniqui cä”* Sal 2.7 nir.
Y manam ni meqan anjelpaq Jesucristupaqnoqa nerqantsu:
“Pepa papäninmi cashaq
y pemi tsurï canqa”* 2 S 7.14
6 Tsenollam wamaqshu tsurinta que patsaman cachamurninpis, queno nerqan:
“Llapan anjelnïcuna peta adorayätsun”* Dt 32.43; Sal 97.7 nir.
7 Anjelcunapaqqa palabrancho quenollam nican:
“Sirwimaq anjelnïcunaqa bientunollam
y rupecaq ninanollam cayan”* Sal 104.4 nir.
8 Tsurin Jesucristupaqmi siqa queno escribirëcan:
“Qamqa Dios carmi, wiñepa wiñenin mandacur
imecatapis muneniquicho catsinqui;
y mandacurpis, llapan nunapaq iwalmi canqui.
9 Qamqa alli rurecunatam cuyarqonqui,
y mana alli rurecunataqa manam.
Tserecurmi Dios acrashorqonqui waquin yanaqiquicunapitapis mas cushitsishunequipaq”* Sal 45.6-7 nir.
10 Jina quenopis nicanmi:
“Qammi Teytallä, shumaq patsacätsir,
camarqequi que patsata y sielutapis.
11 Tsecunapis llapanmi ushacärenqa.
Que patsapis sielupis ropanomi macwayärenqa;
peru qamqa wiñepa wiñeninmi quecanqui.
12 ¡Imeca ropata piturcoqnomi janaq patsatapis
y que patsatapis piturinqui
y imeca ropata trocareqnomi juclayaman tumaratsinqui!
Tseno captinpis, qamqa canqanllam quecanqui”* Sal 102.25-27 nir.
13 Diosqa manam ni meqan anjelnintapis nerqantsu:
“Que ladüman täcamï mandacunantsicpaq,
asta llapan chiquishoqniquicunata nopequiman churamonqäyaq”* Sal 110.1 nir.
14 Porqui llapan anjelcunapis jäninollam cayan. Pecunataqa Diosmi cachamushqa, salbasionta erensiatano chasquiyänanpaq caq nunacunata yanapananpaq.