Jesucristuman creyicoq israel nunacunapaq carta.
1.
Une tiempuchomi Diosnintsic profetancunatawan awiluntsiccunata atsca cuti y tuquinopa parlaparqan; 
peru canannam tsurintawanna parlapätsimarqontsic. Petam Dios churarqan imecachopis mandacoq cananpaq, pewan que munduta camashqa carnin. 
Diospa tsurin Jesucristoqa quiquin patenti Diosnintsicmi, y pëchomi ricantsic Diospa allapa puedeq queninta. Pemi llapan camanqancunata poderninwan tsararëcan mana ushacänanpaq. Y jutsantsiccunata limpiaramarnintsicmi, sieluman cuticushqa. Cananqa Diospa derechu caq ladunchomi tëcan pewan juntu mandacur. 
Tsemi Jesucristoqa anjelcunapitapis mas puedeq, porqui manam ni meqan anjeltapis Jesucristutanoqa podernin qoshqatsu, ni manam meqan anjeltapis nerqantsu: “Qamqa tsurïmi canqui, y noqam papäniqui cä” nir. Y manam ni meqan anjelpaq Jesucristupaqnoqa nerqantsu: “Pepa papäninmi cashaq y pemi tsurï canqa” 
Tsenollam wamaqshu tsurinta que patsaman cachamurninpis, queno nerqan: “Llapan anjelnïcuna peta adorayätsun” nir. 
Anjelcunapaqqa palabrancho quenollam nican: “Sirwimaq anjelnïcunaqa bientunollam y rupecaq ninanollam cayan” nir. 
Tsurin Jesucristupaqmi siqa queno escribirëcan: “Qamqa Dios carmi, wiñepa wiñenin mandacur imecatapis muneniquicho catsinqui; y mandacurpis, llapan nunapaq iwalmi canqui. 
Qamqa alli rurecunatam cuyarqonqui, y mana alli rurecunataqa manam. Tserecurmi Dios acrashorqonqui waquin yanaqiquicunapitapis mas cushitsishunequipaq” nir. 
Jina quenopis nicanmi: “Qammi Teytallä, shumaq patsacätsir, camarqequi que patsata y sielutapis. 
Tsecunapis llapanmi ushacärenqa. Que patsapis sielupis ropanomi macwayärenqa; peru qamqa wiñepa wiñeninmi quecanqui. 
¡Imeca ropata piturcoqnomi janaq patsatapis y que patsatapis piturinqui y imeca ropata trocareqnomi juclayaman tumaratsinqui! Tseno captinpis, qamqa canqanllam quecanqui” nir. 
Diosqa manam ni meqan anjelnintapis nerqantsu: “Que ladüman täcamï mandacunantsicpaq, asta llapan chiquishoqniquicunata nopequiman churamonqäyaq” nir. 
Porqui llapan anjelcunapis jäninollam cayan. Pecunataqa Diosmi cachamushqa, salbasionta erensiatano chasquiyänanpaq caq nunacunata yanapananpaq.