3
Señor Jesucristoga Moiséspitapis mas poderyogmi
1 Tsaymi waugecuna y panicuna, Dios Yaya munangannö cawacuyaptiqui, Paywan pagta cieluchö cawayänayquipag Señor Jesucristo yanapar acrayäshushcanqui. Tsaynöpa Señor Jesucristollaman imaypis yarparar firmi criyicur cawacuyay. Tsaynöllam rasumpa firmi criyicurnin willacuntsic japallan apostolnintsic Señor Jesucristo mandacug sacerdötintsic cangantapis. 2 Señor Jesucristoga Dios Yayapa acrashgan carmi llapan imaycatapis cumplirgan, unay tiempu Moisés israelcuna Dios Yayata adorayanganchö servicuglla car, llapan mandanganta cumplingannö. 3 Pero Señor Jesucristota mas respetarnin adorashun unay Moiséspitapis mas mandacug poderöso canganpita, imayca waji ruragta mas respetayangannö waji ruranganpitapis. 4 Tsaymi Dios Yayaga llapan imayca ricangantsicta camashga car, llapan imaycapapis ämun imayca juc waji rurag runa wajipa ämun canganölla. 5 Tsaynömi Moiséspis Dios Yayapa wajinchö llapan mandanganta allish cumplirnin, Señor Jesucristo imanö päsananpag cangantapis israelcunata willargan. 6 Pero Dios Yayam Tsurin Jesucristota cumplïdu canganpita, japallan mandacug cananpag churashga. Tsaynö canganpitam Señor Jesucristo cutimunanta cushishga shuyararnin, mana mantsacur firmi criyicuynintsicwan alli tsaracur, Dios Yayapa wajinga cantsic.
Mana criyicugcunapag alverticuycuna
7 Tsaymi Espïritu Santo ningannö:
“Si gamcuna canan Dios Yaya niyäshungayquita wiyarga,
8 ama chucru shongo mana cäsucugga cayanquitsu.
Tsaynö mana cäsucug carmi,
unay israelcunapis Dios Yaya tsunyagchö pruebaptin,
Paypa contran shärir jutsaman ishquiyargan.
9 Tsay tsunya mana ni imacagchömi,
imayca pruebata ruramagnö awiluyquicuna reclamayämarnï
Nogaman confiacayämurgantsu,
chuscu chunca wata tucuyläya milagrucunatawan
señalcuna rurangäta ricaycarpis.
10 Tsaymi nogaga, tsay tiempu runacunawan rabiasquir nirgä:
‘Paycunaga imayca ogracashga üsha llutanpa aywagnömi,
shongoncuna tucuyläyata munanganllachö puriycäyan.
Tsaynö carmi paycunaga rasumpacag alli nänïpa mana regernin pushanäta munayantsu.’
11 Tsaymi alläpa piñascatsiyämaptin jurarnin nirgä:
‘Nogaman mana confiacuyanganpitam ni imaypis nogawan pagta tranquïlo descansagnö cayänanta dëjashagtsu.’ ”✡ Sal 95:7-11.
12 Waugecuna y panicuna, cuidädutatag maygayquipis Dios Yayaman mana confiacurnin jutsata rurar, mana cäsucug chucru shongo cayniquicunawan cawaycag Dios Yayapita raquicar caycäyanquiman. 13 Mas bien tsaypa rantinga cada junag jucnin jucninwanpis animatsinacuyay, Diospa Palabran ningannö canan cay tiempu canganyaglla. Tsaynöpa ni maygayquipis jutsaman ishquir, llullacuycunawan chucru shongo jutsasapaman mana ticrayänayquipag. 14 Si puntata rasumpa confiacungantsicnölla firmi criyicurnin cawacurga, Señor Jesucristowanmi imayyagpis jucllayllanö pagta cawacushun. 15 Tsaynöllam Diospa Palabran nirgan:
“Si gamcuna canan Dios Yaya niyäshungayquita wiyarga,
ama chucru shongo mana cäsucugga cayanquitsu.
Tsaynö mana cäsucug carmi,
unay israelcunapis Dios Yayapa contran
shärirnin jutsaman ishquiyargan.”✡ Sal 95:7-8.
16 ¿Picunatan Dios Yaya ninganta wiyaycarpis contran shäriyargan? ¿Acäsu manacu Egipto marcapita Moisés jorgamur pushangan Israel runacuna contran shäriyargan? 17 ¿Tsaynölla picunawantan Dios Yaya piñashga cargan chuscu chunca watantin? ¿Acäsu manacu tsay jutsata rurar wañurnin ushacag israelcunapa cuerpuncuna tsunyagchö jitaragcunawan piñashga cargan? 18 ¿Picunatatan Dios Yaya jurarnin nirgan, nogaman mana confiacuyanganpitam ni imaypis tranquïlo descansagnö cayänantaga dëjashagtsu? nir. ¿Tsaynöga nirgan, mana cäsucug israelcunatam? 19 Tsaynöpam musyantsic Dios Yayaman mana confiacugcunaga, tranquïlo descansagnö cayänanpag yaycuyta mana puediyanganta.