1-2 A, Señor Tatayni Dios,

kantami maskayki amachawanaykipa.

Sufrichiwak runakunamanta salvaway.

Paykunamanta kishpichichiway.

Mana amachawaptikika llullakushpa chatawashpa

pumashina wakllichiwanmansapa.

3 A, Tata Dios,

¿ima mana allita rurashpatí uchallikushkani?

4 Purikmasini allita rurawaptin manami chiknishkanichu.

Chikniwak runata mana nimanachiwaykaptin

manami payta sufrichishkanichu.

5 Payta sufrichishka kaptinika ñukatapish sufrichiwachun.

Payta chiknishka kaptinika ñukatapish mana nimatashina kawawachun.

6 A, Tata Dios,

piñakushpa atariy.

Favorninipi chikniwak runakunata tinkuysapa.

Kanmi rimashkanki mana alli rurak runakunata kastiganaykipa.

Chayrayku favorninipi llukshiy.

7 Tukuy llaktakunata tantanachishpayki

paykunata kamachiysapa.

8 A, Tata Dios,

kanmi tukuy llaktakunapi kawsak runakunata

willanki allitachu mana allitachu rurashkasapa nishpa.

Chayrayku allita rurashpa kawsashkaynirayku

willaway allita rurashkaynita.

9 A, Tata Dios,

kanmi allillata rurak kanki.

Tukuy runakunapa yuyayninta riksinki.

Chayrayku tukuy mana alli rurak runakunata kulluchiy.

Ñukaykuna alli rurak runakuna kaptinikuna

sinchichiwashpa yanapawaysapa

ama uchallikunaynikunapa.

10 Altu sielupi kawsak Tata Dios

tukuy alli shunkuyuk runakunata amachan.

Chayrayku ñukata amachawan.

11 Tata Dios kuskanpi kastigakun.

Tukuy tiempu tukuy mana alli rurak runakunata kastigansapa.

17 Tata Dios alli rurak kaptin

payta alabasha.

Altu sielupi kamachikuk Tata Diosta yuyashpa

payta kuyashpa himnokunata kantasha.