1 Runakuna mana allita ruraptinkunapish

ama turbakuychu.

Chay mana alli rurak runakunata kawashpa

ama paykunashina kawsanayaychu.

2 Chay runakunata Tata Dioska

utka kastigankasapa.

Kastigaptinkuna tipidu kiwashina tukunkasapa.

3 Tata Dios yanapashunaykita yachashpa

allita rurashpalla kawsay.

Kay allpapi kawsashpaykira

Tata Diosllata allita kasushpa kawsay.

4 Payta tukuy shunku kuyashpa kawsay.

Chashna payta kuyaptiki

alli munanaykita almitishunki.

5 Tata Diosta kuyashpa

payta willay munananta ruranayanaykita.

Chashna payta willaptiki yanapashunki.

6 Tata Dios yanapashuptiki

tukuy runakuna alli ruranaykita

lustashina kawankasapa.

Alli ruranaykita ruraptiki

inti llipyanantashina kawankasapa

paykunapish yachanankunapa

allita rurashpa kawsayta.

7 Allita rurashpa mana turbakushpa

Tata Dios yanapashunanta shuyay.

Suk runakuna tukuy imayuk kaptinkuna

ama llakishpa rabyakuychu.

Mana allita yuyaykuptinkuna

ama rabyakuychu.

8 Ama rabyakushpa piñakuychu.

Ama munaychu turbakushpa

mana allita rurayta.

9 Tata Dios tukuy mana allita rurak runakunata kastigankasapa.

Chaymanta Tata Dios yanapashunanta

shuyaptiki payka yanapashunki.

23 Tata Dios tukuy runakunata yachachiwanchisapa.

Yanapawanchisapa paypa munananta rurananchikunapa.

24 Mana allita ruraptinchikuna

Tata Dios makinchikunamanta apiwakninchishina yanapawanchisapa

ama uchallikushpa kawsananchikunapa.

25 Wayna kashkaynimanta

ñami viejuyashkanina.

Manami kawashkanichu

Tata Dios alli rurak runakunata sakiptin.

Paykunapa wambrankunapish

mana nimata mañakushpachu kawsansapa.

26 Alli rurak runakuna kashpanchikuna

tukuy oras llakichikushpa

runamasinchikunata yanapanchisapa.

Chay runakunapa wambrankunaka

tukuy pita sukaman kushichinsapa.

27 Chayrayku mana alli rurashkaykimanta wanashpa

allikunallata rurashpa kawsay.

Chashnarami Tata Dios mana tukuyniyukta yanapashunki

allita rurashpa kawsanaykipa.

28 Tata Dios alli rurak runakunata kuyansapa.

Payta kasushpa kawsaptinchikuna

mana sakiwanchisapachu.

Chaymanta mana alli rurak runakunata kulluchin.

Tukuy wambrankunatapish kulluchin.