SALMO.
4.
A, Tata Dios, kanmi allita amachawanki. Chayrayku kanta roygaptini yanapaway. Sukaman llakiptini kanmi kushichiwanki. Chayrayku roygaptini llakichiwashpa uyariway. 
Kankuna, chikniwak runakuna, ¿aykapikamantí llullakushpa chatawankichi? ¿Aykapikamantí mana kuskata yuyashpa llullakuyllata munankichi? 
Allita yachaychi Tata Dios payllata kasushpa kawsak runakunallata yanapananta. Allita yuyaychi ñuka Tata Diosta roygaptini yanapawananta. 
Chayta yachashpa manchakushpa chukchukuychi amana ashwanta uchallikunaykichipa. Sirishpaykichi kasillayashpa mana alli rurashkaykichita yuyaychi. 
Chayta yuyashpa tukuy shunku Tata Diosta kuyashpa animalkunata altarpi wañuchiychi. Allita yachaychi amachashunaykichita. 
Aypa runakuna rimansapa: Manami ni pi ñukanchikunata kushichiwanayanchisapachu. Chashna rimaptinkunapish kan, Tata Dios, ñukaykunata llakichiwaysapa. 
Aypa mikunayuk aypa upyanayuk runakuna sukaman kushikunsapa. Kan, Tata Dios, paykunamanta ashwanta kushichiwashkanki. 
Kan kuydawaptiki mana manchakushpa sirishpayni kunanlla gustu puñuni.