SALMO.
6.
A, Tata Dios, ama rabyakushpa piñayawaychu. Ama rabyakushpa kastigawaychu. 
A, Tata Dios, mana fersasyukmi mallinakuni. Chayrayku llakichiway. Tukuy kuerpuynimi chukchukun. Chayrayku alliyachiway. 
Manchakushpayni chukchukuni. A, Tata Dios, sukaman munani yanapawanaykipa. 
A, Tata Dios, shamuy yanapawak. Kuyawashpayki wañuymanta salvaway. 
Wañushpayni manana kay allpapi yuyashkaykinachu. Pampadu kashpayni manana atipashanachu alabaynikita. 
Chayta yuyashpa sukaman wakakushpa shaykuni. Tukuy tuta sukaman wakakuptini almadayni ñawini illiwan ñuyun. 
Chikniwak runakuna sufrichiwaptinkuna wakakuptini ñawini shaykushpa puyuyashka. 
Kankuna, mana alli rurak runakuna, ñukamanta anchuychi. Sukaman llakiptini ñami Tata Dios uyariwashkana. 
Oraptini Tata Dios uyariwashkana. Tukuy mañashkaynita ñami Tata Dios almitiwashkana. 
Chayrayku chikniwak runakuna pinkakushpa turbakunkasapa. Tata Dios yanapawaptin pinkakuywan raslla kallpankasapa.